1 aTesalonika 5 - Emakhuwa Bible

¹ Vano, axunna, wa ihuhu ni mahuku oohoolo khoontthuneya woolepelani,

² niwoko nyuwo asineenaanyu moosuwela nnenesene weera nihuku na Apwiya nnirwe ntoko namwiiya ohiyu.

³ Akina yeera: “Murettele ni weetta nnene,” vano woowaakuveya ophwatiwa ngwaakhuruwele, ntoko onrweela woowaakuveya ovoreiya wa oyara wa muthiyana, ni awo hata vakhaani khaanrowa woopowa.

⁴ Nyuwotho, axunna, khamukhanle mpiphini; tivawo nihuku nno khanirwa nootutuxerani ntoko namwiiya.

⁵ Nyuwo ootheene muri anamwane a waara; anamwane a othana. Khanihiyono a ohiyu, naari a epiphi.

⁶ Tivawo nihikone ntoko akina, mene niipasoope ni nikhale oohula maitho.

⁷ Vano, yaawo ankona, ankona ohiyu, ni yaawo anghapaliwa, anghapaliwa ohiyu.

⁸ Wa soothesene, hiyo nri a othana nikhale oohula maitho, niwaraka eyuuma ya vakakasani ya nroromelo ni osivela, ni ekapasete ya oweherera ovuluxiwa.

⁹ Niwoko Muluku khanithanlenle isara, mene weera naakhele ovuluxiwa mwaha wa Apwiyaahu Yeesu Kristu.

¹⁰ Awo anikhwenle hiyo weera, hata nivenyaka, hata nikonaka, nikhale vamoha ni Yaawo.

¹¹ Tivawo, mulipihe mirimasanyu ni mupuhihaneke mukina ni mukhwaawe, ntoko mwa yeeyo nyuwo mumpakaanyu.

Masu ookisera

¹² Ninoovekelani, axunna, weera mwaattittimihe yaawo anlipihera ovara muteko variyariwanyu, ni anoohoolelani mwa Apwiya nitho anoolakani.

¹³ Mwaattittimihaxeke moosivelani niwoko na mutekwaaya. Mukhaleke ni murettele mukina ni mukhwaawe.

¹⁴ Ninoodyoonttelelani nyuwo, axunna: ngwooperere atthu ooreesi; mwaalipihere yaawo oohilipa; mwaakhavihere ookhulumuwa; mwaavilele ootheene.

¹⁵ Mwiipasoope weera ahikhale mukina aneera amuhokoloxere isikula mukhwaawe, mene mahuku ootheene mukhale ooreera murima mukina ni mukhwaawe ni wa ootheene.

¹⁶ Muhakalale mahuku ootheene.

¹⁷ Muvekele woohihiyerera.

¹⁸ Mutthapele mwa ihuhu sootheene, niwoko wu ti otthuna wa Muluku wa nyuwo mwa Kristu Yeesu.

¹⁹ Muhicipihe Munepa.

²⁰ Muhiramuse ithalihero sa otthuna wa Muluku,

²¹ mene ngwehexexe itthu soothesene, ni mwaakhulele yeeyo eri yooreera.

²² Mususe wa soonanara sootheene.

²³ Muluku muneenaawe a murettele ootteeliheni woowaatta. Munepaanyu, okumaanyu ni erutthwaanyu yootheene ethokororiwe woohikhala malepa moorwaani wa Apwiyaahu Yeesu Kristu.

²⁴ Yaawo angwiitthanani ari oororomeleya ni eniipake yeeyo.

²⁵ Axunna, munivekeleletho hiyo.

²⁶ Ngwuulumihe axunna ootheene ni ebeecu yootteela.

²⁷ Kinoovekelani nyuwo vamaithoni wa Apwiya weera ekaratta ela esommwe ni axunna ootheene.

²⁸ Mahala a Apwiyaahu Yeesu Kristu ekhale ni nyuwo.