1 aTesalonika 4 - Emakhuwa Bible

Mweettelo woomusiveliha Muluku

¹ Woomaliha, axunna, noohooxuttihani moota wooweetta weera munsivelihe Muluku, ni mwa Yoowo nyuwo munimweera weetta. Vano, ninoovekelani ni ninoodyoonttelelani mwa Apwiya Yeesu weera mupwahereraxe mwa mweetteloweene yoowo.

² Nyuwo moosuwela malamulo noovanghaahuni mwa Apwiya Yeesu.

³ Otthuna wa Muluku ti weera nyuwo mutteelihiwe: musembe oraruwa.

⁴ Khula mutthu a nyuwo asuwele olamula erutthwaawe muneenaawe moota wootteela ni woottittimiheya,

⁵ khoohiyono ni soohaawela soonanara ntoko amalapo ahimusuwenle Muluku.

⁶ Mwaha wa yeeyo, ahikhale mukina aneera amutthekele munneiye, naari ampakele yoonanara. Apwiya eniittaruxe miteko sootheene iyo, ntoko nooleenlaahuni nnenesene,

⁷ niwoko Muluku khaniitthanenle ohitteela, mene otteelihiwa.

⁸ Tivawo yoowo onkhootta itthusene seiya khanimukhootta mutthu, mene Muluku onoovahani Munepaawe Wootteela.

⁹ Mwaha wa omusivela mukhwiinyu khoontthuneya woolepelani, niwoko nyuwo asineenaanyu mooxuttihiwa ni Muluku osivelana mukina ni mukhwaawe.

¹⁰ Vekhaikhai munaasivela axunna ootheene a elapo yootheene ya oMasedoniya. Wa soothesene, axunna, ninoonyesererani weera mutepaxe opwaherera mwa yeeyo.

¹¹ Mwiilipihere okhala ni okumi woomaaleleya; mungwehexexe nnenesene nakoswaanyu, ni muvare muteko ni matataanyu, ntoko nooleenlaahuni,

¹² weera mweettelowaanyu wa khula nihuku owine nttittimiho na yaawo ari oomokoni, ni muhihaawele etthu ya mukina.

Orwa wa Apwiya

¹³ Axunna, khanintthuna weera nyuwo mukhale oohisuwela mwaha wa yaawo akhwiiye, weera muhiithananihere, ntoko akina ahikhanleno oweherera.

¹⁴ Naroromela weera Yeesu ohookhwa ni oovenyerera, ninoororomelatho weera Muluku onimwaaruuha vamoha ni Yeesu yaawo akhwiiye mwa Yoowo.

¹⁵ Ninooleelani nyuwo, nittharaka masu a Apwiya, weera hiyo nri akumi ni nneera nikhale mpaka orwa wa Apwiya, khaninrowa waahoola yaawo akhwiiye.

¹⁶ Apwiya aneenaaya moolamulani, munsuni na ndyelo mutokweene ni woorumani wa nipalapatta na Muluku, eniikhuruwe wiirimu, ni yaawo akhwiiye mwa Kristu eniivenyerere toko.

¹⁷ Vahoolowaya hiyo nneera nikhale ni okumi nnikuxiwe ni yaawo mmahutteni weera naakumanane Apwiya osulu. Ni hiiho nnikhale ni Apwiya mahuku ootheene oohimala.

¹⁸ Mulipiheraneke mukina ni mukhwaawe ni masu ala.