1 aKorinto 9 - Emakhuwa Bible

Ikuru sa arummwa

¹ Nkihiyono neethi? Nkihiyono murummwa? Nkimoonne Yeesu Apwiyaahu? Khamuhiyono nyuwo soowiima sa mutekwaaka mwa Apwiya?

² Hata miyo kihikhalaka murummwa wa akina, vekhaikhai kiri wa nyuwo! Vano, nyuwo muri ethoonyero ya orummwawaka mwa Apwiya.

³ Wu ti wiixaakihawaka ohoolo wa yaale ankithoriha.

⁴ Khaninono hiyo ikuru sa oca ni owura?

⁵ Khaninono hiyo ikuru sa omukuxa vamoha ni hiyo mwaara ori muKristu, ntoko ampakaaya arummwa akina, axunna a Apwiya ni Kefasi?

⁶ Weeraka miyo ni Barnaba paahi nintthuneya ovara muteko weera nikhale?

⁷ Taani ori nakhotto iilivaka mwaneenaawe? Taani omphatteiya ematta ya iwuuva* ni ohinca soowiimasaya? Taani onciha muhuwo ni ohingwura mukakaaya?

⁸ Seiyo kinghimaaka khasihiyono soowuupuwelasaka paahi. Nlamulo khaninghima etthweene yeeyo?

⁹ Vano, yoolempwa munlamuloni na Moisesi: “Ohitthuke eyano ya emombe elopwana enyikalaka inuku.” Weeraka Muluku oneeteteya va ni imombe?

¹⁰ Khoohiyono vekhaikhai niwoko na hiyo Owo ohimmaawe yeeyo? Aani, yeeyo elempwe niwoko na hiyo. Niwoko yoowo onlima, alimeke ni nroromelo, ni yoowo onghepha, ahepheke ni nroromelo, weera eniyaakhele soohepha.

¹¹ Hiyo naala variyariwanyu mimiso sa mmunepani, waari wootepaxa oweherera weera niwaakheleni itthu sa vathi sawinyu?

¹² Yakhalano akina ikuru sa okhaviheriwa ni nyuwo, wootepaxa hiyo? Vano hiyo khanimvarela muteko ikuru iyo. Ohiyanawaya, ninnavilela sootheene weera nihooceelihe masu ooreeraxa.

¹³ Khamusuwenle weera yaawo anrumeela Mpaani mwa Muluku anca itthu sa Empa ya Muluku, ni yaawo anrumeela valtaarini* anca mpatta yoowo amvahiwaaya valtaarini*?

¹⁴ Moota hiiho, Apwiya ahaalamulela yaale anlaleiya masu ooreeraxa weera ekhale mwa masu ooreeraxa.

¹⁵ Vano miyo nkivarenle muteko hata emoha ya ikurusene seiya. Hata nkinoolepelani kiwehereraka weera nyuwo munookivaha etthu. Niwoko fataari kikhwe ahinaaye mukina ocipiha ovuwawaka wu.

¹⁶ Wa soothesene, miyo kaalaleiyaka masu ooreeraxa, nkintthuna wiivuwiha, niwoko koolamuliwa olaleiya masu ooreeraxa. Ii! Wa miyo kaahilaleiya masu ooreeraxa!

¹⁷ Kaalaleiyaka ni otthunawaka, kookhalano ntthuvelo. Wa soothesene, woonaka weera koonyesererihiwa olaleiya, miyo kinkwanihera paahi ikuru seiyo kiroromelihiwaaka.

¹⁸ Vano, ntthuvelonaka tinni? Paahi yeeyo: Olaleiya masu ooreeraxa wa mahalani, hiiho kihivarelaka muteko ikurusaka woolaleiyani.

¹⁹ Kirookhalaru neethi wa ootheene, kohiipaka epottha ya ootheene weera kaawine atthu ancipale.

²⁰ Variyari wa aYuda kohiipaka ntoko muYuda weera kaawine aYuda. Kiri mweeraru miyo kihikhanle vathi wa nlamulo, wa yaawo ari vathi wa nlamulo kohiipaka ntoko kaakhanle vathitho, weera kaawine yaawo ari vathi wa nlamulo.

²¹ Kiri mweeraru miyo kihikhanle neethi a nlamulo na Muluku, mene kiri vathi wa nlamulo na Kristu, kohiipaka ntoko oohikhala ni nlamulo wa yaawo ahikhanle ni nlamulo, weera kaawine yaawo.

²² Wa yaawo oohilipa, kohiipaka ntoko oohilipa weera kaawine oohilipa. Kohiipaka sootheene wa ootheene weera ni mikhalelo sootheene mano kaavuluxe akina.

²³ Kimpaka sootheene seiyo niwoko na masu ooreeraxa, weera kaakhele mareeliho a masu ooreeraxa.

²⁴ Khamusuwenle weera ori mmoha paahi wa yaawo antthimaka mumpikisaanoni anaakhele ntthuvelo? Mutthimake mooteene yoowo weera muwine ntthuvelo.

²⁵ Ootheene yaawo ampaka mpikisaano, anniireherera vancipale weera ephwanye ecireemba yoowaakuva oriheya, mene hiyo ecireemba yoohimala.

²⁶ Wa hiihaawo, miyo nkintthimaka ntoko mutthu ohinsuwela onkelaawewo, ni nkingwana ntoko mutthu ommana epheyo.

²⁷ Kinuumaaliha erutthwaaka ni yeeyo kimpaka epotthaaka, weera kaalaleeraka akina, miyo mwaneenaka kihootheriwe etthu.