1 aKorinto 8 - Emakhuwa Bible

Yooca yootteeliheriwa miluku soowootha

¹ Mwaha wa yooca yootteeliheriwa miluku soowootha, noosuwela weera ootheene hiyo nookhalano esuwelo. Vano, esuwelo enruuha wiixoona, mene osivela ompuhiha nnene.

² Mulopwana onuupuwela weera oosuwela etthu, khanaaye osuwela otthuneyaxawaya.

³ Vaheera mulopwana onimusivela Muluku, owo oosuweliwa ni Muluku.

⁴ Tivawo, mwaha wa yooca yootteeliheriwa miluku soowootha, noosuwela weera muluku oowootha khahiyono etthu mweelaponi, ni ookhala Muluku mmoha paahi.

⁵ Vano, hata sikhalaka itthu siniitthaniwa miluku, sa wiirimu, hoye hoye mweelaponi, (mwa yeeyo siri sincipale siniitthaniwa miluku, ni ancipale aniitthaniwa apwiya),

⁶ mene wa hiyo ookhala Muluku mmoharu paahi, Atiithi, mwa Yaawo sinkhumelela itthu sootheene, nitho wa Yaawo hiyo nnaakhalelaahu. Aritho Apwiya Yeesu Kristu amoharu paahi, mwa Yaawo saakhumelenle itthu sootheene, ni niwoko na Yaawo hiyo ninkhalaahu.

⁷ Wa soothesene, khaahiyono atthu ootheene asuwenle yeeyo. Akina nlelo ekhovelenleene miluku soolokottha moota wooweera ancaaya yooca eyo ntoko ereene yooca yootteeliheriwa miluku soolokottha seiyo. Ni seenre soowuupuwelasaya sikhalaka soohilipa, yooca eyo enoovaliheya.

⁸ Vanonto, yooca kheennitatuxa oowaakhuleleya ohoolo wa Muluku. Khaninkhala ootepaxa hiyo naahica, hata ooreeraxa hiyo naca.

⁹ Wa soothesene, mwiipasoope weera oneethaanyu owo ohithatuwe etthu yoowaakwattula atthu oohilipa.

¹⁰ Akhala mukina ni soowuupuwela soohilipa ongwoonani nyuwo murino soosuwela iyo mucaaka mpaani mwa miluku soolokottha, soowuupuwelasawe khasinlipihereiya weera acetho yooca yootteeliheriwa miluku soolokottha?

¹¹ Hiiho, munna owo oohilipa, mwa yoowo Kristu omukhwenlaawe, onoophwateya niwoko na soosuwelasanyu.

¹² Nyuwo mwaatthekela axunninyu mooteene yoowo, mwaavulalihaka soowuupuwelasaya soohilipa, munoomutthekelatho Kristu.

¹³ Tivawo, yeeyo miyo kincaaka yamutthekiha munnaka, nkirwa kikhuuratho enama weera kihinkwattulihe munnaka.