1 aKorinto 7 - Emakhuwa Bible

Mwaha wa othelana

¹ Mwaha wa milattu nyuwo mukilepenlaanyu, ti wooreera weera mulopwana ahithelane ni muthiyana,

² mene niwoko na oraruwa, ontthuneya weera khula mulopwana amutheleke mwaarawe, ni khula muthiyana ni iyawe.

³ Mulopwana akwanihereke yeeyo entthuneya ni mwaariye moothelanani, ni muthiyana akwanihereke yeeyo entthuneya ni iyawe moothelanani.

⁴ Muthiyana khanono ikuru ni erutthwaawe muneenaawe, mene aani, iyawe. Ni hiihaawotho, iyawe khanono ikuru ni erutthwaawe muneenaawe, mene aani, mwaariye.

⁵ Muhikhoottelane okona vamoha, ohikhanle wa ehuhu vakhaani ni mwiiwanane, weera ehuhuweene yeeyo muvilele mmavekeloni. Vahoolowaya, mupwaherere okona vamoha weera ahiweerereni Satana niwoko na ohiisuumaalihawanyu.

⁶ Eyo miyo kinooleelaakani ti yootthuniheriwa, mene kheehiyono nlamulo.

⁷ Kaatthuna weera atthu ootheene ekhaleke ntoko miyo, mene khula mutthu orino mahalaawe muneenaawe wa Muluku – mmoha moota hiiho, mukina mootaawe.

⁸ Kinaaleela athupa ni asinaamukhweli: ti wooreera okhala mahuku ootheene ntoko miyo.

⁹ Yaahiweratho wiisumaaliha, ethelaneke, niwoko fataari othelana, ohikhanle ohaawelaxa okonano.

¹⁰ Wa oothelana kinaavaha nlamulo nna, hoye, nkihiyono miyo, mene ti Muluku onaavaha: mwaariye ahimwalaneke ni iyawe.

¹¹ Amwalanatho, akhaleke oohithelana, hoye hoye iiraaneke ni iyawe. Iyawetho ahimwalaneke ni mwaariye.

¹² Wa akina ti miyo kinaaleela yeeyo, khaahiyono Apwiya: Akhala munna orino mwaariye oohiroromela, ni yoole atthuna okhala vamoha ni iyawe, ahimwalaneke.

¹³ Vano, akhala muthiyana orino iyawe oohiroromela, ni yoole atthuna okhala vamoha ni mwaariye, ahimwalaneke,

¹⁴ niwoko iyawe oohiroromela ti ootteelihiwa niwoko na mwaariye, ni mwaariye oohiroromela ti ootteelihiwa niwoko na iyawe. Wahaakhanle hiiho, anamwaniinyu yaakhala oohitteela, mene vano ootteela.

¹⁵ Wa soothesene, mutthu oohiroromela amwalana, amwalaneke. Weereya hiiho, munna, naari murokora muKristu, khahiyono ootthukiwa, niwoko Muluku onniitthana weera nikhale ni murettele.

¹⁶ Nyuwo mwaara, taani ansuwela – apaale mmwimvuluxe iyinyu? Hoye hoye nyuwo iya, taani ansuwela – apaale mmwimvuluxe mwaarinyu?

¹⁷ Vanonto, khula mutthu apwaherere okhala moota Muluku onithoonyenraawe ntoko Owo onniitthanaawe. Nna ti nlamulonaka wa ikerexa sootheene.

¹⁸ Mukina iitthaniwa areene oowiineliwa? Iineliwe. Mukinatho iitthaniwa ohiineliwa? Ahiineliwe.

¹⁹ Hata wiineliwa, naari ohiineliwa khoonthoonyera etthu. Yootthuneya ti wiiwelela malamulo a Muluku.

²⁰ Khula mutthu apwaherereke ntoko aaraawe oowiitthaniweene ni Muluku.

²¹ Nyuwo mwiitthaniwa mureene epottha? Muhixupeye ni yeeyo. Vano nyuwo mwawera ophwanya oneethi, ngwereke.

²² Vano, yoole oniitthaniwa mwa Apwiya, areene epottha, ti neethi a Apwiya, onlikana ntoko yoole aari neethi iitthaniwaawe mwa Apwiya, ori epottha ya Kristu.

²³ Nyuwo moothummwa ni mutteengo. Muhithatuwe ipottha sa atthu.

²⁴ Axunnaka, khula mutthu akhaleke ohoolo wa Muluku moota yoowo iitthaniwaawe.

²⁵ Mwaha wa aximwali oowiikosoopa, nkinono nlamulo na Apwiya, mene kimvaha mirukusaka ntoko mukina ori oororomeleya niwoko na ikharari sa Muluku.

²⁶ Niwoko na milattu sa vaanaano, kinuupuwela weera fataari mulopwana akhale ntoko oraawe.

²⁷ Nyuwo muri oothelana? Muhaasaase omwalana. Nyuwo muri muthupa? Muhimwaase mwaara.

²⁸ Vaheera mwathela, khamunono yoottheka, ni mwaamwali oowiikosoopa atheliwa, khanonotho yoottheka. Vano yaawo athelanne eniikhalane sookacamiha sincipale mookuminimwaya ni kintthuna owoopolani mwa yeeyo.

²⁹ Mwaakiiwaka hiiho, kinghima weera ehuhu eri vakhaani. Okhuma vaanaano vaava, yaale ari ni axaaraya, ekhaleke ntoko khaanono;

³⁰ yaale aniinla, ntoko khaaniinla; yaale anghakalala, ntoko khaanghakalala; yaale anthuma etthu, ntoko khaanono etthu;

³¹ yaale amvarela itthu sa elapo, ntoko khaamvarela, niwoko mukhalelo wa vaanaano oneera oviraka.

³² Kaatthuna owoonani muhikhanleno sookacamiha. Mulopwana ohithenle oneeteteya ni itthu sa Apwiya, aasaasaka moota heeni aneeraawe aasivelihe Apwiya.

³³ Vano mulopwana oothela oneeteteya ni itthu sa elapo ela, aasaasaka moota heeni aneeraawe amusivelihe mwaariye,

³⁴ ni ookawanyeya. Hiihotho muthiyana ohitheliwe ni mwaamwali oowiikosoopa oneeteteya ni itthu sa Apwiya, weera ekhaleke ootteela mweerutthuni ni mmunepani. Ootheliwatho oneeteteya ni itthu sa elapo ela – moota heeni aneeraawe amusivelihe iyawe.

³⁵ Kinooleelani yeeyo wa oreelawanyu khoohiyono weera kiwooceeliheni, mene weera mukhale moota wooreera ni mwaarumeele Apwiya ni murima wootheene.

³⁶ Akhala mukina onoona wuuliha muru niwoko noowoona weera muthiyana omutthomenraawe onoopwaha masusa ooreera omuthela, ni uupuwelaka weera fataari othelana, apakeke ontthunaawe. Owo khanttheka ni yeeyo.

³⁷ Wa soothesene, yoole onlipiha mmurimanimwawe ahittharaka soohaawelasawe, mene oniisuumaaliha ni otthunawawe, nitho alakela ohithelana ni omutthomenraawe, yoowo ompakatho nnene.

³⁸ Moota hiiho, yoole onthelana ni muthiyana omutthomenraawe, ompaka nnene, mene yoole ohinthelana ni yoowo, ontepaxa opaka nnene.

³⁹ Muthiyana ori vamoha ni iyawe owo areene ni okumi. Vano, iyawe akhwa, owo anaawere otheliwa ni mulopwana aneeraawe amutthune, mene ontthuneyaxa weera owo akhaleke muKristu.

⁴⁰ Woonawaka, muthiyana owo anaakhale oohakalalaxa aakhalaka oohitheliwa. Kinuupuwela weera kookhalanotho Munepa wa Muluku.