1 aKorinto 12 - Emakhuwa Bible

Samahala sa Munepa Wootteela

¹ Axunnaka, nkintthuna weera nyuwo mukhale oohisuwela mwaha wa samahala sa Munepa Wootteela.

² Moosuwela weera, muhinaaye okhala aKristu, nyuwo mwaaronghiwa moota woohiyanahiyana weera mutthare miluku soohuuluma.

³ Tivawo miyo kinoororomelihani weera khaawo onuuluma ni Munepa wa Muluku ongwera weera: “Yeesu alamphwe,” ni khaawo ongwera ohima: “Yeesu ti Apwiya,” ahikhanle mwa Munepa Wootteela.

⁴ Sookhala samahala soohiyanahiyana, mene Munepa ori mmoharu.

⁵ Sookhala miteko soohiyanahiyana, mene Apwiya ari amoharu.

⁶ Sookhala soopakiwa soohiyanahiyana, mene ori Muluku mmoharu ongwera sootheene mwa ootheene.

⁷ Munepa Wootteela onimvaha khula mutthu yoowiixoonihera emoha eerelaka mpuha wa atthu ootheene.

⁸ Mukina omvahiwa ni Munepa nsu na miruku, ni wa mukina nsu na yoosuweliha ni Munepeene Yoowo mmoharu.

⁹ Wa mukina, nroromelo ni Munepeene Yoowo, ni wa mukinatho, yamahala yoolamiha ni Munepa mmoharu.

¹⁰ Wa mukina omvahiwa ikuru sa opaka sootikhiniha, wa mukina onthaliha otthuna wa Muluku, wa mukina ongwera omwalamwaxa ekhaikhai ni yoolokottha, wa mukina muulumo oohiyanahiyana, wa mukinatho ongwera otaphulela muulumo.

¹¹ Itthusene seiya sootheene simpakiwa ni Munepeene Yoowo mmoharu. Ni Owo onkawa samahalasaya wa mutthu ti mutthu, ntoko ontthunaaya.

Erutthu emoha, mipatta sincipale

¹² Vano, hiiho ntoko erutthu eraaya emoha, eri okhalanaru mipatta sincipale, ni mipatta sootheene siri mwaattaru simpaka erutthu emoha, hiihotho ni Kristu.

¹³ Ootheene hiyo noopatisiwa mwa Munepa mmoharu nipakaka erutthu emoha – hata aYuda, hata aGrego, hata ipottha, hata maneethi. Ni wa ootheene hiyo noovahiwa owura wa Munepa mmoharu.

¹⁴ Erutthu kheenono mpatta mmoha paahi, mene mipatta sincipale.

¹⁵ Nnaawo neera: “Keenre kihikhalaka ntata, miyo nkimpakatho mpatta wa erutthu,” mwa yeeyo khaninkhala mpatta wa erutthu?

¹⁶ Naaru neera: “Keenre kihikhalaka niitho, miyo nkimpakatho mpatta wa erutthu,” mwa yeeyo khaninkhala mpatta wa erutthu?

¹⁷ Erutthu yootheene yaari niitho, naakhala woowi naaru? Erutthu yootheene yaari naaru, naahiimureke hai?

¹⁸ Mwa yeeyo Muluku ohiikaathi khula mpatta mweerutthuni ntoko ontthunaawe.

¹⁹ Vano, sootheene saari mpatta mmoha, yaakhala woowi erutthu?

²⁰ Hiiho sookhala mipatta sincipale, mene erutthu emoha paahi.

²¹ Niitho khaningwera weerela ntata: “Nkinootthuna weyo.” Hata muru khoongwera weerela inaawo: “Nkinootthuna weyo!”

²² Ohiyanawaya, mipatta sa erutthu sinkhala ntoko soohilipa, ti sootthuneyaxa.

²³ Vano, mipatta nnuupuwelaahu weera soohittittimiheyaxa, hiyo ninttittimihaxaahu, ni mipatta sa erutthwaahu siri soowuuliheya muru, sinrehereriwa ni nttittimiho ntokotoko,

²⁴ niwoko mipatta sikina khasintthuneya nenno. Mulukutho oopaka erutthu avahaka nttittimiho ntokotoko wa mipatta seiye saahaleenle yeeyo,

²⁵ weera ohikhale ohiiwanana mweerutthuni, mene weera mipatta sootheene sikhale soolikana, sipasoopanaka mikina ni mikhwaaya.

²⁶ Mpatta mmoha wahaawa, mipatta sootheene sikina sinoohaawa ni yoowo; mpatta mukina wattittimihiwa, sootheene sikina sinoohakalalela yoowo.

²⁷ Vano, nyuwo muri erutthu ya Kristu ni mpatta wa erutthweene yeeyo.

²⁸ Hiiho Muluku ohaakhaliha mukerexani vanipuroni noopacera arummwa, nanaaveeli maprofeeti, nanaararu ahusiha, vahoolowaya yaawo ampaka sootikhiniha nitho yaawo arino yamahala yoolamiha, vahoolowaya yaawo arino yamahala yookhavihera, yaawo arino yamahala yoolamula, ni yaawo anuuluma muulumo makina.

²⁹ Apaale ootheene arummwa? Apaale ootheene maprofeeti? Apaale ootheene ahusiha? Apaale ootheene aakhalano yamahala yoopaka sootikhiniha?

³⁰ Apaale ootheene aakhalano yamahala yoolamiha? Apaale ootheene anuuluma muulumo makina? Apaale ootheene angwera otaphulela?

³¹ Tivawo, mwaasaase ni nthiti samahala seiyo siri soottittimiheyaxa. Vano kinoowooniherani ephiro yooreeraxa opwaha sootheene.