1 aKorinto 1 - Emakhuwa Bible

Isalaama soolaxerana

¹ Ya Pawulo, iitthaniwe ni otthuna wa Muluku weera akhale murummwa a Kristu Yeesu, ni wa munna Sostene.

² Wa ekerexa ya Muluku eri oKorinto; wa ootteelihiwa mwa Kristu, ni oowiitthaniwa weera ekhale ootteela, vamoha ni ootheene yaale aniitthana mipatta sootheene Nsina na Apwiyaahu Yeesu Kristu, Apwiyaaya ni awihu.

³ Wa nyuwo, mahala ni murettele wa Muluku Atithihu ni wa Apwiya Yeesu Kristu.

Yootthapela ya Pawulo

⁴ Miyo kinnamvaha asantte wa Mulukwaaka mahuku ootheene niwoko na nyuwo, mwaha wa mahala muvahiwaanyu ni Muluku mwa Kristu Yeesu.

⁵ Mwa Yoowo nyuwo moopuhihiwa mwa sootheene, mwa masu ootheene ni miruku sootheene,

⁶ niwoko onamoona wa Kristu wookhalihiwa variyariwanyu,

⁷ moota wooweera ehoohaleeleni naari vakhaani yamahala ya Munepa nyuwo muwehereraka weera Apwiyaahu Yeesu Kristu ethupululiwe.

⁸ Owo anoolipiheni mpaka ommaleloni, moota wooweera nyuwo mukhale oohootheriwa vanihukuni na Apwiyaahu Yeesu Kristu.

⁹ Muluku ti oororomeleya, Yoowo owiitthanneni weera mukhale ngwiiwananani ni Mwanawe Yeesu Kristu.

Ohiiwanana wa aKorinto

¹⁰ Axunnaka, kinoodyoonttelelani nyuwo ootheene mwa Nsina na Apwiya Yeesu Kristu, weera mwiiwanane mukina ni mukhwaawe yeeyo munuulumaanyu, weera ohikhale ohiiwanana variyariwanyu. Aani, weera ootheene mukhaleno wiiwanana omoharu ni wuupuwela omoharutho.

¹¹ Axunnaka, kileeliwe ni akina a vaate wa Klowe weera wookhala ohiiwanana variyariwanyu.

¹² Mwa yeeyo, kinghima weera mutthu ti mutthu a nyuwo oneera: “Miyo ti a Pawulo”; “Miyo ti a Apolo” ; “Miyo ti a Kefasi” ni “Miyo ti a Kristu.”

¹³ Weeraka Kristu ookawanyeya? Ti Pawulo okhomeliwe niwoko na nyuwo? Ti nyuwo mpatisiwe mwa nsina na Pawulo?

¹⁴ Kinimutthapela Muluku niwoko na ohimpatisa naari mmoha a nyuwo, ahikhanle Krispo ni Gaiyu,

¹⁵ moota wooweera ahikhale mukina a nyuwo aneera eere weera opatisiwe mwa nsinanaka.

¹⁶ Kaahaapatisatho atthu a empa ya Stefana; ehikhanle yaawo, nkingwuupuwelela akina miyo kaapatinsaaka.

¹⁷ Vano, Kristu khakirumme weera kipatise, mene weera kilaleiye masu ooreeraxa. Miyo nkinlaleiya masu ooreeraxa ni masu a miruku sa atthu, weera muttanda wa Kristu ohikhale wa siiyo.

Kristu, miruku ni ikuru sa Muluku

¹⁸ Vano, mutthenga wa muttanda ti anepa wa ariheiye, mene wa hiyo nimvuluxiwa, mutthenga ole ti ikuru sa Muluku,

¹⁹ niwoko yoolempwa: “Miyo nkiphwate miruku sa anamiruku, ni nkikhootte osuwela wa asuweli.”

²⁰ Ori woowi namiruku? Ori woowi namalepa? Ori woowi namakohakoha a ehuhu ela? Muluku aatatuxa anepa osuwela wa elapo ya vathi.

²¹ Muluku aalakela weera amalapo khaangwera omusuwela ni mirukusaya asineenaaya, mwa yeeyo waamusiveliha Muluku waavuluxa yaale anroromela mwaha wa anepa wa olaleiya.

²² aYuda amvekela ineneero sootikhiniheya, ni aGrego anaasaasa miruku;

²³ wa soothesene, hiyo ninimulaleiya Kristu oothomeiwa. Eyo ti nluku nookwattula wa aYuda ni ya anepa wa amalapo.

²⁴ Wa oowiitthaniwatho, ntoko aYuda hiihotho aGrego, Kristu ti ikuru ni miruku sa Muluku.

²⁵ Vano, anepa a Muluku ti osuwela woopwahaxa miruku sa omutthu, ni ohilipa wa Muluku ti woolipaxa opwaha ikuru sa omutthu.

²⁶ Axunnaka, muupuwele yeeyo mwaaraanyu mwiitthaniwaanyu. Vakhaani a nyuwo yaari amiruku vamaithoni wa atthu; vakhaani yaari a ikuru; vakhaani yaayariwa mweemusini sa omwene.

²⁷ Mulukutho aathanla itthu sa anepa sa elapo weera awuulihihe muru asuweli, ni aathanla itthu soohilipa sa elapo weera awuulihihe muru oolipa.

²⁸ Aathanla itthu soohithoonyera etthu sa elapo, soohipwatthiwa ni iye sihikhanle, weera amalihe seiye sinkhala,

²⁹ weera ahikhale mutthu aneera iivuwihe ohoolo wa Muluku.

³⁰ Mwa yeeyo, ti niwoko na Muluku nyuwo muraanyu mwa Kristu Yeesu, Yoowo othatungwe wa hiyo miruku sa Muluku, eyo tiiyo, waakhuleliwawahu, ntteelihonahu ni ovuluxiwawahu,

³¹ weera, ntoko elempwaaya: “Yoole omvuwiha, avuwiheke mwa Apwiya.”