ZWILILO 5 - BIVHILI KHETHWA Mafhungo Madifha

Ri rembuluse!

¹ Muṋe washu, elelwa zwo ri welaho, edzou sedza u vhone ṱhoni dzashu.

² Shango ḽashu ḽo dzhiwa nga vhatsinda, mahaya ashu o ṋewa vhasili.

³ Ro no vha tsiwana dzi si na vhokhotsi, vhomme ashu ndi dzitshilikadzi.

⁴ Maḓi a u nwa ri tou renga; khuni ri tou rengiselwa.

⁵ Vha ri poṋodza zwirethe, a vha ri humeli; ro neta, a ri vhuyi ra awela.

⁶ Ro humbela Egipita na Ashuru uri ri wane zwiḽiwa.

⁷ Vhokhotsi ashu vho tshinya, a vha tsheeho, zwino riṋe ro hwala milandu yavho.

⁸ Ri vho vhuswa na nga dziphuli, a hu na ane a nga ri lamukisa zwanḓani zwavho.

⁹ Ri wana zwiḽiwa nga u tou ḓifunga nga ṅwambo wa pfumo ḽo ri lalelaho sogani.

¹⁰ Lukanda lwashu lu fhisa unga ṋanḓo, ri vho songololwa nga nḓala.

¹¹ Vhasadzi vho tshipiwa Tsioni, vhasidzana vho batiwa miḓanani ya Juda.

¹² Vhavhusi vhashu vho fhahewa vhó vhoxwa zwanḓa; na vhakalaha maswina ha vha hulisi.

¹³ Vhaṱhannga vha shuma vha bva biko guyoni; vhatukana vha pepeleka na madzanda a khuni.

¹⁴ Vhahulwane a vha tsha dzula khoroni ya muḓi; vhaṱhannga a vha tsha lidza nyimbo dzavho.

¹⁵ Dakalo ḽo pfuluwa mbiluni dzashu; a ri tsha tshina, ri vho lila.

¹⁶ Ṱhohoni a ri tshee na tshiala, tsho wa. Ro tshinya, ro zwi vhona!

¹⁷ Ndi zwe mbilu dzashu dza ṋoka. Ndi nga mulandu wa hezwi zwithu maṱo ashu a tshi vho vha na luswiswi,

¹⁸ ndi nge thavha ya Tsioni ya sala i soga, phunguhwe dzi tshi sokou tendeleka nayo.

¹⁹ Iwe Muṋe washu u vhusa lini na lini, khuluṋoni yau i ḓi dzula i hone ha vhuya ha fhira mirafho na mirafho.

²⁰ Ndi mini u si tsha vhuya wa ri elelwa? Ndi mini u tshi ri furalela tshifhinga tshingafha?

²¹ Yawee Muṋe washu, ri humisele ha Iwe muṋe, uri ri kone u vhuelela, zwi dovhe zwi nge zwa kale!

²² Kani-ha wo ri laṱa tshoṱhe? Wo ri sinyutshela lwa u kalula naa?