ZWILILO 4 - BIVHILI KHETHWA Mafhungo Madifha

U ofhisa ha u govhelwa

¹ Yowee, musuku a u tsha penya, musuku u songo vangwaho wo rivha! Nungu khethwa dzo balangana na mikoto!

² Vhathu vha Tsioni vhe vha vha vha tshi ṱoḓiwa nga vhoṱhe, vhe vha vha vha sa rengwi na nga musuku, zwino vha vho itwa unga khali dza vumba dzo vhumbwaho nga zwanḓa zwa muvhumbi!

³ Phunguhwe na dzone dzi mamisa vhana vhadzo, hone vhathu vhanga vho no vha na tshiṱuhu unga dzimphwe dza phangani.

⁴ Lushie lu pfa ḓora, lulimi lwalwo lwa tou nambatela marinini; vhana vha humbela vhuswa, hone a hu na ane a vha ṅwatela.

⁵ Vhe vha vhuya vha ḽa zwiṋu, vha fa nga nḓala mikotoni ya muḓi. Vhe vha vha vha tshi siamedza ṱhoho kha dza muridili zwino vho lala ḓaleḓaleni.

⁶ Vhutshinyi ha vhathu vhanga vhu fhira vhuḽa ha Sodoma, we wa sokou phusukana kathihi fhedzi hu si na we a isa tshanḓa.

⁷ Vhavhusi vhavho vho vha vha tshi penya u fhira mahaḓa, vhó tshena u fhira mafhi, mivhili yavho yó tswuka u fhira rubi, zwifhaṱuwo zwavho zwo tsha zwi tshi nga safire.

⁸ Hone zwino zwifhaṱuwo zwo swifhala u fhira tshinyai, dzinḓilani a vha ḓihwi. Lukanda lwavho lwo onyana nṱha ha marambo avho; lwo oma unga thanda.

⁹ Vhe vha vhulawa nga pfumo vha khwiṋe u fhira vhe vha fa nga nḓala. Vhe vha ṱahadzwa nga nḓala vha fhelela nga u shaya zwiḽiwa zwi bvaho masimuni.

¹⁰ Vhasadzi vha lufuno vho bika vhana vhavho nga zwavho zwanḓa, ndi zwone zwiḽiwa zwavho zwiḽa vhathu vhanga vha tshi lozwiwa.

¹¹ Muṋe washu o vusa mbiti dzawe dzoṱhe; o shulula mbiti dzawe dzi ofhisaho. O funga mulilo Tsioni wa fhisa miteo yawo.

¹² Mahosi a ḽifhasi a vho ngo vhuya vha zwi fulufhela, vhathu vha shango a vho ngo vhuya vha zwi tenda, uri maswina na vhakandeledzi vha nga vhuya vha dzhena nga khoro dza Jerusalema.

¹³ Mulandu u na vhaporofita vhawo; ndi vhutshinyi ha vhotshifhe vhawo vhe vha fhaladza malofha a vha si na mulandu ngomu hawo.

¹⁴ Zwino vha tendeleka na dzinḓila unga mabofu, vho khakhaṱhela na tshikha dza malofha, nguvho dzavho a dzi tsha kwamea.

¹⁵ Vhathu vha vha ṱavhela mukosi vha ri, “Ṱuwani! No kumala! Ṱuwani! Ṱuwani! Ni songo ri kwama!” Musi vha tshi shavha vha tshi tendeleka na vha dzitshakha dza vhannḓa vha ri, “Vha songo dzula fhano!”

¹⁶ Muṋe washu Ene muṋe o vha balanganya; ha tsha vha londa. Vhotshifhe a vha tsha huliswa, na vhakalaha a vha khathutshelwi.

¹⁷ Ro lavhelela u fariswa, maṱo a vhuya a neta, mathina ndi mahandana fhedzi. Rí thawarani dzashu ro vha ro sedza lushaka, lwe lwa vha lu sa koni u ri tshidza.

¹⁸ Maswina o ri zwima hoṱhe he ra vha ri tshi kanda hone, uri ri si kone u tshimbila mikotoni ya muḓi washu, vhufhelo hashu ho vha vhu tsini, maḓuvha ashu o vha o vhaliwa, vhufhelo hashu ho vha ho swika.

¹⁹ Vhatovholi vhashu vho vha vhe na luvhilo lu no fhira lwa magoni; vho ri pandamedza dzithavhani, vha ri lalela phangani.

²⁰ Mufemo wa vhutshilo hashu, ene mutiwa wa Muṋe washu, vho mu fasha nga khunḓa dzavho. Ro vha ri tshi vhona unga ri ḓo tshila rí vhukati ha dzitshakha, rí fhasi ha murunzi wawe.

²¹ Iwe Edomo, pembela zwau, takala zwau iwe u no dzula shangoni ḽa Utsi. Na iwe tshinwelo u ḓo tshi nwa-vho, wa tou kambwa wa bvula zwiambaro wa sala fhedzi.

²² Iwe Tsioni, ṱhamu yau i ḓo guma, Muṋe washu ha nga lapfisi u thubwa hau. Hone iwe ṅwananyana wa Edomo, u ḓo u rwela vhukhakhi hau, a ṱana vhutshinyi hau.