ZWILILO 3 - BIVHILI KHETHWA Mafhungo Madifha

Fulufhelo khomboni

¹ Nṋe ndi munna we a pfiswa vhuṱungu Muṋe washu a tshi nthwa nga mbiti.

² O nthathela kule a ita uri nṋe ndi tshimbile swiswini hu si na tshedza;

³ ngangoho o khetha nṋe uri a ntsukumedzele kule, a dovha, ḓuvha ḽoṱhe.

⁴ O kalahisa lukanda lwanga a nnyondisa, a mpwasha marambo.

⁵ O nngovhela a ntangela ngomu nga vhutulu na zwi konḓaho.

⁶ O ita uri ndi dzule swiswini unga vho faho kale.

⁷ O ntangela ngomu nga mutsheṱo, a thi koni u ponyoka; o mmbofha nga geḓane dzi lemelaho.

⁸ Naho ndi tshi ṱavha mukosi nda ri, “Mphalale!” ha thetshelesi thabelo yanga.

⁹ O thivha nḓila yanga nga murango, o kombamisa nḓila dzanga.

¹⁰ O vha a tshi nga biara yo lalelaho, a tshi nga ndau yo dzumbamaho,

¹¹ a nkhwikhwidza a mmvisa nḓilani a ntumukanya a ntsia ndi khuvhabvu.

¹² O akha vhura hawe a nnyita tshipfulwa tsha misevhe yawe.

¹³ O ṱomola misevhe yawe mukutuni a tou rumbula mbilu yanga ngayo.

¹⁴ Vhathu vhoṱhe vha hashu vha a ntsea, vha nngoḓa nga zwiimbo zwavho ḓuvha ḽoṱhe.

¹⁵ O nndyisa miri i kalakataho, a nthamisa nga ndulu.

¹⁶ O mpwasha maṋo nga thombwana nga u nkhurudzha mavuni.

¹⁷ Ndo vha ndi tshi khou kundiswa mulalo; ndo no hangwa na uri mashudu ndi mini.

¹⁸ Ndi zwine nda ri, “Ndi hone ndo lovha na zwoṱhe zwe nda vha ndo lavhelela uri Muṋe washu u ḓo nnyitela.”

¹⁹ Ndi tshi elelwa u tambula hanga na u tendeleka hanga, zwi kalakata unga ndulu na vhutulu.

²⁰ Nda zwi elekanya nda dovha, nda kulea nungo.

²¹ Naho zwo ralo ndi dovha nda fulufhela ndi tshi elelwa uri

²² lufuno lwa Muṋe washu a lu fheli. Ndi zwe ra si nyenge; khathutshelo yawe a i gumi.

²³ Matsheloni maṅwe na maṅwe i a vusuluswa; u fulufhedzea hau ndi huhulu.

²⁴ Ndi ḓivhudza nda ri, “Muṋe washu ndi Ene mukovhe wanga, zwenezwo ndi ḓo fulufhela Ene.”

²⁵ Vhane vha mu fulufhela vha mu ṱoḓa, Muṋe washu u a vha tonda.

²⁶ Ndi zwavhuḓi u lindela u tshidzwa nga Muṋe washu wo dzika.

²⁷ Ndi zwavhuḓi muthu a tshi hwala dzhogo a tshee nga hawe.

²⁸ Nga a dzule e eṱhe e tshete; o i hweswa nga Muṋe washu.

²⁹ Nga a ḓiṱukufhadze, zwe a lavhelela zwi nga kha ḓi ḓa.

³⁰ Luṱaha lwawe nga a lu ṋekedze ane a mu rwa, nga' niwe zwawe nga ṱhoni.

³¹ Muṋe washu ha laṱi vhathu lini na lini.

³² Naho a tshi vha ḓisela zwi vhavhaho, u ḓo vha khathutshela; lufuno lwawe ndi luhulu, a lu fheli.

³³ A tshi tambudza vhana vha vhathu ha itwi nga u takalela u vha vhaisa.

³⁴ Zwivhotshwa zwoṱhe zwi tshi kandeledzwa shangoni,

³⁵ muthu a tshi kundiswa u wana pfanelo dzawe dzine Waṱaḓuluṱaḓulu a vhona zwo mu fanela,

³⁶ muthu a sa wani zwo mu fanelaho tsengoni, zwo raloho Muṋe washu ha zwi vhoni naa?

³⁷ Ndi nnyi ane a nga ri u amba tshithu tsha vha hone arali Muṋe washu a songo ri zwi ralo?

³⁸ Hu tshi ḓa khombo na zwivhuya, a si nge Waṱaḓuluṱaḓulu a ri zwi vhe hone naa?

³⁹ Muthu a nga gungulelani? Hufha a tshi kha ḓi tshila naho e mutshinyi!

⁴⁰ Nga ri dzou sedza nḓila dzashu nga nthihi nga nthihi, ri humele ha Muṋe washu.

⁴¹ Nga ri livhise mbilu dzashu na zwanḓa zwashu ha Mudzimu a re ṱaḓulu ri ri,

⁴² “Ro tshinya ra u shandukela, Iwe wa si ri hangwele.”

⁴³ Wo ḓiputela nga mbiti dzau wa ri pandamedza, wa ri vhulaha u sa khathutsheli.

⁴⁴ Wo ḓiputela nga gole, uri hu si vhe na thabelo ine ya phuletshedza ya swika ha Iwe.

⁴⁵ Wo ri ita mathukhwi na malambelo vhukati ha dzitshakha.

⁴⁶ Maswina ashu oṱhe o ri nyadza a ri holedza.

⁴⁷ Ri ofha ra tou tetemela, ro lovha, ro pwashekana.

⁴⁸ Maṱo anga a shuluwa milambo ya miṱodzi nge vhathu vhanga vha lozwiwa.

⁴⁹ Maṱo anga a ḓo ḓi shuluwa miṱodzi i sa fheli, a sa litshi,

⁵⁰ Muṋe washu a vhuye a lavhelese fhasi e ṱaḓulu a zwi vhona.

⁵¹ Mbilu yanga i a vhavha ndi tshi vhona zwi itwaho vhasadzi vhoṱhe vha muḓi wa hashu.

⁵² Vhe vha vha vha tshi sokou mmbenga vho vha vha tshi nnzwima unga tshiṋoni.

⁵³ Vho mposa dindini vha khokhela matombo;

⁵⁴ maḓi a ntibedza ṱhoho, nda vhona unga ndi hone ndo fa.

⁵⁵ Ndo vhidzelela dzina ḽau, Iwe Muṋe wanga, ndi fhasi-fhasi dindini.

⁵⁶ Iwe wa pfa khumbelo yanga ndi tshi ri, “U songo litsha u thetshelesa ndi tshi u ṱavhela mukosi uri u nthule.”

⁵⁷ Ndi tshi u vhidza, wo ḓa tsini hanga wa ri, “U songo ofha tshithu.”

⁵⁸ Iwe Muṋe wa zwoṱhe, wo ntsengela wa ntshidza.

⁵⁹ Iwe Muṋe washu wo vhona u khakhelwa hanga. Ima na nṋe!

⁶⁰ Wo vhona he ndifhedzo yavho ya guma hone, na zwoṱhe zwine vha nndangana.

⁶¹ Iwe Muṋe washu, wo pfa maṱamba avho, na zwoṱhe zwine vha nndangana,

⁶² zwine maswina anga a hevhedza, a ntsatsaladza ḓuvha ḽoṱhe.

⁶³ Edzou vha vhona! Arali vho dzula kana vho ima, vha nkolela nga nyimbo dzavho.

⁶⁴ Iwe Muṋe washu, u lifhedza muthu nga zwo mu teaho; ndi zwone, vha lifhedze zwe vha zwi ita vhone vhaṋe.

⁶⁵ Vha na mbilu dza u ḓihudza – ngavhe vha tshi teketelwa nga yone swili yavho.

⁶⁶ Vha pandamedze wo sinyuwa u vha lozwe, u vha tupule vha si tsha vha hone fhasi ha lutombo lwa Muṋe washu.