ZWILILO 2 - BIVHILI KHETHWA Mafhungo Madifha

Mudzimu o ri ita unga swina

¹ Muṋe washu o tiba Tsioni, ṅwananyana wa lunako, nga gole ḽa mbiti dzawe! Vhugala ha Israele o vhu posa fhasi, ha bva ṱaḓulu ha wela mavuni; musi wa mbiti dzawe ho ngo tsha elelwa thembele yawe, vhukando ha milenzhe yawe.

² Muṋe wa zwoṱhe o mila vhudzulo ha Jakopo hoṱhe a sa khathutsheli; o phusula vhushavhelo ha ṅwananyana wawe Juda ó sinyuwa. O wisa muvhuso na vhavhusi vhawo a vha shonisa.

³ O kula nungo dzoṱhe dza Israele e mbitini dzi ofhisaho! Swina ḽo ri ḽi tshi swika a humisa tshanḓa tshawe tsha maanḓa, mbiti dzawe dza dugela Jakopo unga khavhu ya mulilo ine ya fhisa zwoṱhe zwo i tangaho.

⁴ O akha vhura hawe unga swina; tshanḓa tshawe tshauḽa tsho angalala. Vhoṱhe vhane muthu a vhona vha tshi takadza, o vha vhulaha unga swina; o shulula mbiti dzawe unga mulilo, dza shulutshela kha vhudzulo ha ṅwananyana wawe Tsioni.

⁵ Muṋe wa zwoṱhe u nga swina; o mila Israele. O mila pfamo dzaḽo dzoṱhe, a thutha vhushavhelo haḽo. Ṅwananyana wawe Juda o mu andisela maṱungu na zwililo.

⁶ O thutha fhethu hawe hune ha kuvhanganiwa. Muṋe washu o ita uri vha Tsioni vha hangwe zwa minyanya mikhethwa na Dzisabatha; o ṱamba vhoṱhe khosi na tshifhe, e mbitini dzi ofhisaho.

⁷ Muṋe washu o landula aḽiṱari yawe, a ṅaledza thembele yawe khethwa ya kandekanywa. Mitsheṱo ya pfamo dzayo o dzi kumedza maswina; vho ṱavha mukosi nḓuni ya Muṋe washu, zwa nga ḓuvha ḽa minyanya mikhethwa.

⁸ Muṋe washu o vha o ḓiimisela u thutha mutsheṱo wo tangeledzaho ṅwananyana wawe Tsioni. O ṱharamudza thambo ya u ela uri hu si sale tombo, a si humise tshanḓa tshawe uri tshi si lozwe. O ita uri dzithawara na mitsheṱo zwi lile; zwino zwo sala zwi matumba.

⁹ Khoro dzawe dzo wa, dzo no tou fukedzwa nga mavu; tswinga dzadzo o dzi vunḓekanya a dzi posa kule. Khosi yawe na vhavhusi vhawe vho thubwa nga dzitshakha, a hu tsha funzwa mulayo, vhaporofita vhawe a vha tsha wana mabono a bvaho kha Muṋe washu.

¹⁰ Vhahulwane vha Tsioni vha dzula mavuni vho sokou tshete; vho ḓishela mavu ṱhohoni vha ambara madzanganda. Vhasidzana vha kotamisa dziṱhoho.

¹¹ Maṱo anga o neta nga u lila, ngomu hanga hu tou duga. Mbilu yanga yo tevhutshela fhasi nge vhathu vhanga vha lozwiwa. Vhana na dzitshetshe vha ṋokela mikotoni ya muḓi,

¹² vha vhudzisa vhomme avho vha ri, “Vhurotho na waini zwi ngafhi?” vha tshi ṋoka mikotoni ya muḓi unga vhanna vho rungwaho nga pfumo; vha fela ngozwini.

¹³ Iwe Jerusalema, ndi nga u vhudzani? Ndi nga u vhambedza na mini? Iwe Tsioni, ṅwananyana wa lunako, ndi nga u fanyisa na mini uri ndi u fhumudze? Mbonzhe yau yo tsesa unga lwanzhe, u nga fhodzwa nga nnyi?

¹⁴ Vhaporofita vhau vho u hanelela mabono a mahandana, a sa tshidzi; a vho ngo u dzumbululela vhuvhi hau uri u laṱe u si thubiwe nga dzitshakha. Milomo ya midzimu yau yo u vhudza mazwifhi fhedzi, ndi yone ye ya u lozwa.

¹⁵ Vhoṱhe vhafhiri vha nḓila vha vhanda zwanḓa vha ri, “Koṱo!” vha u nzhonzhowedza, vha u dzungudzela dziṱhoho iwe Jerusalema. Vha ri, “Nṋa uyu ndi uḽa muḓi we wa vha u tshi pfi u khunyelela ha lunako, dakalo ḽa ḽifhasi ḽoṱhe?”

¹⁶ Maswina au oṱhe a a u kolela, vha a u nzhonzhowedza vha tshi shenganya maṋo vha ri, “Ro mu mila. Heḽi ndi ḓuvha ḽe ra ḽi lindela; ḽo swika, ro ḽi vhona.”

¹⁷ Muṋe washu o ita zwe a dzudzanya; o khunyeledza ipfi ḽawe, ḽe a ḓivhadza kale-kale. O u lozwa a sa khathutsheli, o takadza swina nga u wa hau, a ombela maswina au shambo.

¹⁸ Mbilu dza vhathu dzi ṱavhela Muṋe wa zwoṱhe mukosi. Iwe mutsheṱo wa Tsioni, miṱodzi yau nga i ele unga mulambo vhusiku na masiari; u songo vhuya wa ḓirula, maṱo au a songo awela.

¹⁹ Vuwa vhukati ha vhusiku, u ṱavhe mukosi sa vhalindi u tshi dovha ḽi vhuye ḽi tshe. Shulula zwa mbiluni yau unga maḓi u tshi pfiwa nga Muṋe wa zwoṱhe. Takusa zwanḓa zwau u mu rabele uri vhana vhau vha no khou ṋoka nga nḓala mafhandeni a mikoto vha tshile.

Mukosi wa Tsioni

²⁰ “Yawee Muṋe washu, edzou sedza u elekanye uri: We wa vhuya wa mu ita nga u rali ndi nnyi? Vhasadzi vha vho ḽa zwibebwa zwavho, vhana vhavho vhe vha tou vha mamisa vha vha alusa. Tshifhe na muporofita vha vhulawa thembeleni ya Muṋe washu.

²¹ Muhulwane na muṱuku vha fa vhoṱhe mavuni a mikoto; vhaṱhannga vhanga na vhasidzana vho ḽiwa nga pfumo. Wo vha vhulaha musi wa mbiti dzau; wo vha shidzha u sa vhuyi wa vha khathutshela.

²² Wo nthambela zwi ofhisaho zwi tshi bva masia oṱhe, unga u tshi vhidza vhathu musi wa munyanya. Musi wa mbiti dza Muṋe washu a hu na we a ponyoka kana a sala a tshi tshila; vhe nda vha londola nda vha alusa vho lozwiwa nga maswina anga.”