ZWILILO 1 - BIVHILI KHETHWA Mafhungo Madifha

U tambula ha Jerusalema

¹ Yowee! Uḽa muḓi we wa vha wo ḓala vhathu, a u tsha dzula muthu! Wo vha u muhulwane vhukati ha dzitshakha, zwino u vho tou nga tshilikadzi! O vha e mufumakadzi vhukati ha mashango, zwino o no vha phuli!

² Vhusiku u lila lu ṱungufhadzaho, marama awe o ḓala miṱodzi. Kha vhafunwa vhawe vhoṱhe a hu na ane a mu fhumudza. Khonani dzawe dzoṱhe dzo mu fheṱa; vho no vha maswina awe.

³ Vhathu vha Juda vho thubiwa vha tambudzwa vha shumiswa nga tshiṱuhu, vha vho dzula vhukati ha dzitshakha; a hu na hune vha awela hone. Vhoṱhe vhane vha vha pandamedza vho vha fara vha vha thathedza.

⁴ Nḓila dzi yaho Tsioni dzo ṱungufhala, a hu na ane a ḓa minyanyani yawe. Khoro dzawe ndi soga, vhotshifhe vhawe vha a gomela, vhasidzana vhawe vha pfa vhuṱungu, ene muṋe u vhuṱunguni vhuhulu.

⁵ Maswina awe a vho mu vhusa; ḽa maswina awe ḽo lala. Muṋe washu o mu ḓisela vhuṱungu nge a mu shandukela lunzhi. Vhana vhawe vho iswa vhuthubwani, vho thubwa nga swina.

⁶ Tsioni, musidzana wa lunako o dzhielwa vhugala hawe hoṱhe. Vhavhusi vhawe vha nga tholo dzi si na pfulo; vho shavha mupandamedzi wavho nga u shaya nungo.

⁷ Misi ya u ṱungufhadzwa na u tambudzwa Jerusalema u elelwa lupfumo lwoṱhe lwe lwa vha lu lwawe misi iḽa ya kale. Zwiḽa vhana vhawe vha tshi wela zwanḓani zwa maswina, ho vha hu si na ane a nga mu tikedze. Maswina awe o mu sedza, a sea zwe zwa mu wela.

⁸ Jerusalema o tshinya zwihulu. Zwenezwo zwa mu kumadza unga musadzi a no khou vhona ṅwedzi. Vhoṱhe vhe vha vha vha tshi mu hulisa vha vho mu nyadza nge vha mu vhonela; ene muṋe u a gomela a sedza thungo nga ṱhoni.

⁹ O vha a songo elekanya zwa matshelo, zwino tshika yawe yo nambatela zwiambaro zwawe. O wa lu ofhisaho; a hu na ane a nga mu khuthadza. “Yawee Muṋe washu, edzou sedza u ṱungufhadzwa hanga, vhona, swina ḽo kunda.”

¹⁰ Swina ḽo dzhia lupfumo lwawe lwoṱhe; o vhona tshakha dza vhannḓa dzi tshi dzhena hukhethwa hawe, vhe Muṋe washu a vha o vha ilisa uri vha songo dzhena tshivhidzoni tshawe.

¹¹ Vhana vhawe vhoṱhe vha a gomela vha tshi ṱoḓa zwiḽiwa, vha renga zwiḽiwa nga nungu dzavho uri vha si fe tshoṱhe. “Yawee Muṋe washu, edzou sedza u vhone uri ndi nyadziwa hani.”

¹² “Inwi noṱhe ni no fhira henefha, a ni zwi londi? Edzonu livha-livha ni vhone. Hu na u tambula hu no nga uhu hanga he nda ṱungufhadzwa ngaho, he a nnḓisela uḽa musi wa mbiti dzawe dzi ofhisaho naa?

¹³ O wisa mulilo u tshi bva ṱaḓulu, a u tsisela fhasi wa dzhena maramboni anga. O ṱharamudza mambule a mpfasha milenzhe a nṱanamisa. O ita uri ndi sale ndi ndoṱhe, nda ṱwa ndi tshi lwala.

¹⁴ Zwivhi zwanga o zwi luka nga zwanḓa zwawe, zwa vhofhekana zwa vha dzhogo; zwa dzula nṱha ha mutsinga wanga. Muṋe washu o nkhamula nungo o nkumedza vhane nda si vha kone.

¹⁵ Muṋe wa zwoṱhe o landula vhahali vhanga vhoṱhe; o vhidza mmbi ya ḓa ya lwa na nṋe ya kuya vhaṱhanngana vhanga, ya ḽa munyanya. Muṋe wa zwoṱhe o sukekanya Juda musidzana wa lunako bonḓeloni ḽawe.

¹⁶ Ndi zwine nda lila, maṱo anga a bva miṱodzi. A hu na a re tsini ane a nkhuthadza, a hu na ane a rudza mbilu yanga. Vhana vhanga vho ṱovhowa, swina ḽo kunda.”

¹⁷ Tsioni a ṱharamudza zwanḓa zwawe a tshi vhidza khonani dzawe, hone a hu na ane a mu khuthadza. Muṋe washu o rambela Jakopo maswina a no bva masia oṱhe. Vha vhona Jerusalema a tshi nga musadzi e maḓuvhani awe.

¹⁸ “Muṋe washu u a fulufhedzea, ngauri nṋe ndo nyadza zwe a amba. Thetshelesani inwi tshakha dzoṱhe! Edzonu vhona u tambula hanga. Vhana vhanga, vhaṱhannga na vhasidzana, vho hwalwa vha iswa vhuthubwani.

¹⁹ Ndo vhidzelela khonani dzanga, hone vho nndaṱedza. Vhotshifhe vhanga na magota anga vha lovhela henefha muḓini vha tshi khou ṱoḓa zwiḽiwa uri vha tshile.

²⁰ “Muṋe washu, edzou vhona uri zwi khou mmbavha hani! Ngomu hanga hu tou duga, mbilu yanga i a vhavha; ndo vha ḽishandukwa vhukuma. Nnḓa pfumo ḽi a vhulaha, ngomu nḓuni ndi lufu fhedzi.

²¹ Vhathu vho pfa tshigomelo tshanga, hone a hu na ane a nkhuthadza. Maswina anga oṱhe o pfa uri zwo mmbifhela, a pembelela zwe wa nnyita. Ngavhe u tshi ḓisa ḓuvha ḽe wa ḽi ḓivhadza, uri na vhone vha itwe zwe nṋe nda itwa.

²² Ngavhe vhuvhi havho hoṱhe vhu tshi swika maṱoni au! Vha lifhedze unga wo lifhedze nṋe nga vhuvhi hanga hoṱhe. Zwigomelo zwanga ndi zwinzhi, ndo kulea nungo.”