ZAKARIA 9 - BIVHILI KHETHWA Mafhungo Madifha

U engedzwa ha shango ḽa Israele

¹ Malaedzwa-nga-Mudzimu: Yahavee o buḓekanya shango ḽa Hadarakha, Damasko ndalama ya vhathu ndi wa Yahavee, ndi vhudzulo hawe, khathihi na tshakha dza Vhaisraele;

² na Hamathi ḽine ḽa ṋekana masakha naḽo ndi ḽanga, khathihi na miḓi ya Tiro na Sidoni na vhutsila hayo hoṱhe.

³ Vha Tiro vho ḓifhaṱela mutsheṱo, vha khokha siliva ya anda unga buse, vha kuvhanganya musuku wa anda unga mathukhwi mikotoni.

⁴ Huno Muṋe wa zwoṱhe u ḓo dzhia lupfumo lwa Tiro, a pwashekanya mitsheṱo yawo a i posa lwanzheni, wone wa fhiswa nga mulilo.

⁵ Vha Ashkeloni vha ḓo ri u zwi vhona vha farwa nga nyofho, vha Gaza vha tetemela nga nyofho, na vha Ekroni vha ḓo ralo ngauri zwe vha zwi fulufhela zwi ḓo balangana. Gaza a hu tsha ḓo vha na khosi, Ashkeloni hu ḓo sala hu si na muthu.

⁶ Ashidodo hu ḓo dzula vhathu vhe vha bebwa nga vhuṱudzi fhedzi, nda lozwa muḓi une Vhafilista vha u zuwa.

⁷ Ndi ḓo ṱanzisa vha Ashidodo ṋama dza malofha, nda vha somola zwiḽiwa zwo iledzwaho. Vha salaho u fa vha ḓo vha vha Mudzimu wa Israele, vha vha khonani dza vha Juda, vha Ekroni vha ḓo vha vhathihi na vhathu vhanga unga Vhajebusi.

⁸ Hone vhathu vhanga ndi ḓo vha lamulela uri vha si tsha diwa nga maswina. Vhakandeledzi a vha tsha ḓo fhira ngaho, ngauri vhathu vhanga ndi vho ḓo vha vhavhalela.

Mesia, Khosi i ḓaho ya Tsioni

⁹ Iwe ṅwananyana Tsioni, pembela nga mbilu yoṱhe! Iwe ṅwananyana Jerusalema, itou ṱavha mukosi nga dakalo! Khosi yau i khou ḓa ha iwe, i ḓa na gundo nga u fulufhedzea ha Mudzimu, i na vhulenda, a yo ngo namela meila, yo namela donngi mbelesa ya khosi.

¹⁰ Ndi ḓo ṱuwisa gariki dza nndwa kha ḽa Efraimi, nda thatha bere dza nndwa Jerusalema, vhura ha nndwani vhu ḓo vunḓekana. U ḓo ḓivhadza dzitshakha a mulalo. U ḓo vhusa u bva kha luṅwe lwanzhe u swika kha luṅwe, na u bva Yufuratha u swika hune ḽifhasi ḽa guma.

U vhuiswa ha vhathu vha Mudzimu

¹¹ A vha iwe Jerusalema ndo vhofha mulanga na iwe wa siṱelwa nga malofha, zwenezwo ndi ḓo vhofholola mathubwa au nda a bvisa dindini.

¹² Inwi mathubwa, tshine na nga fulufhela tsho no vha hone, humelani-ha vhushavheloni haṋu. Vhukuma ndi khou ni vhudza ṋamusi ndi ri: Ndi ḓo ni pfufha kavhili.

¹³ Ndi ḓo khotha Juda unga ndi tshi khotha vhura, Efraimi nda mu ita musevhe waho. Ndi ḓo dzungudza vhana vhau iwe Tsioni unga banga, vha lwa na vhana vhau iwe Giriki, nda u ita unga pfumo ḽa muhali.

¹⁴ Vha ḓo vhona Muṋe washu a tshi bva ṱaḓulu; musevhe wawe u ḓo pfula unga nḓadzi i tshi rwa. Muṋe wa zwoṱhe Yahavee u ḓo lidza phalaphala, a ḓa e kha maḓumbu a tshipembe.

¹⁵ Muṋe washu Mulangazwoṱhe u ḓo vha pilela! Vha ḓo lozwa maswina avho, vha kandekanya vhapfuli vha misevhe unga matope, vha ḓihandulula nga malofha a maswina avho, vha ḓala malofha unga ndilo ya u handulula ṋanga dza aḽiṱari.

¹⁶ Muṋe washu Mudzimu wavho u ḓo vha tshidza musi wonoyo; u ḓo lisa vhathu vhawe unga sambi ḽa nngu. Vha ḓo penya vhe shangoni ḽawe unga nungu dza khare ya vhuhosi.

¹⁷ Mashudu avho a ḓo vha mangafhani! Vha ḓo naka hani! Vhaṱhannga na vhasidzana vha ḓo aluwa nga mavhele na tuvhu.