ZAKARIA 6 - BIVHILI KHETHWA Mafhungo Madifha

Bono ḽa vhuṱanu-na-vhuraru: Gariki nṋa dza nndwa

¹ Nda dovha u lavhelesa, nda vhona gariki nṋa dza nndwa dzi tshi bva vhukati ha thavha mbili, thavha dza musinaseṱha!

² Gariki ya u thoma yo vha i tshi khou kokodzwa nga bere khunweu, ya vhuvhili nga bere ntswu,

³ ya vhuraru nga tshweu, ya vhuṋa nga phaswa, bere dzoṱhe dzí na maanḓa.

⁴ Nda vhudzisa muruṅwa we a vha a tshi khou amba na nṋe nda ri, “Muṋe wanga, izwi zwi amba mini?”

⁵ Muruṅwa a fhindula a ri, “Hei ndi mimuya miṋa ya ṱaḓulu, i bva he ya vha yo ima phanḓa ha Muṋe wa ḽifhasi ḽoṱhe.

⁶ Gariki i no khou kokodzwa nga bere ntswu i khou ya shangoni ḽa devhula, i no khou kokodzwa nga tshweu i khou ya vhukovhela, i no khou kokodzwa nga phaswa i khou ya tshipembe, i no khou kokodzwa nga khunweu i khou ya shangoni ḽa vhubvaḓuvha.”

⁷ Bere dza nungo dza bva dzi tshi yo buḓekanya ḽifhasi ḽoṱhe. Muruṅwa a ri, “Iyani u buḓekanya ḽifhasi!” Dza mbo ḓi yo buḓekanya ḽifhasi.

⁸ Ndi hone a tshi mmbidzelela a ri, “Vhona, dziḽa dzi no ya shangoni ḽa devhula dzi yo bveledza u tshidza hanga dza dzikisa muya wanga shangoni ḽa devhula.”

Hu tshi pfi Joshua a ambadzwe khare ya vhuhosi

⁹ Ipfi ḽa Muṋe washu ḽa amba na nṋe ḽa ri,

¹⁰ “U mbo ḓi ya hayani ha Josia ṅwana wa Tsefania. Henefho u ḓo wana Heledai na Tobia na Jedaya, vha tshi kha ḓi bva u swika vha tshi bva Babele. Vho ḓa na nduvho

¹¹ ya siliva na musuku. I dzhie, u ite khare ya vhuhosi, u i ṋee tshifhe muhulu, Joshua ṅwana wa Jehotsadaka.

¹² U mu vhudze uri Yahavee Mulangazwoṱhe u ri, ‘Hu na munna ane a pfi Ḓadzwane ḽa Dafita; u ḓo bvela phanḓa nga u ṱavhanya, a vusa thembele ya Yahavee.

¹³ Ndi ene a no ḓo vusa thembele ya Yahavee. U ḓo ambadzwa maanḓa a vhuhosi, a dzula kha khuluṋoni a vhusa. U ḓo vhusa na tshifhe, avho vhavhili vha anḓana ha vha na mulalo.

¹⁴ Iyo khare i ḓo vhewa thembeleni yanga ya vha tshihumbudzo tsha Heledai na Tobia na Jedaya na tsha vhuthu ha ṅwana wa Tsefania.

¹⁵ “ ‘Vhathu vha ḓo ḓa vha tshi bva kule, vha farisa u vusa thembele ya Yahavee. Ndi hone ni tshi ḓo ḓivha uri Yahavee Mulangazwoṱhe o nthuma ha inwi. Hezwo zwi ḓo itea arali ni tshi thetshelesa Yahavee Mudzimu waṋu nga mbilu yoṱhe.’ ”