ZAKARIA 4 - BIVHILI KHETHWA Mafhungo Madifha

Bono ḽa vhuṱanu: Tshivheambone na miolivi mivhili

¹ Muruṅwa we a vha a tshi khou amba na nṋe a dovha a mmvusa unga muthu a tshi vusa muṅwe khofheni.

² A mmbudzisa a ri, “U khou vhona mini?” Nṋe nda fhindula nda ri, “Ndi khou vhona tshivheambone tsha musuku tshoṱhe, nṱha hatsho hu na mudzio wa mapfura, tshi na mbone ṱhanu na mbili, luvhone luṅwe na luṅwe lu na thambo ṱhanu na mbili.

³ Tsini hatsho hu na miri mivhili ya miolivi, muṅwe u thungo ya tshauḽa tsha mudzio wa mapfura, muṅwe thungo ya tshamonde.”

⁴ Nṋe nda vhudzisa muruṅwa we a vha a tshi khou amba na nṋe nda ri, “Muṋe wanga, izwi ndi mini?”

⁵ Ene a fhindula a ri, “A u ḓivhi uri izwi ndi mini?” Nṋe nda fhindula nda ri, “A thi zwi ḓivhi, muṋe wanga.”

⁶ Ndi hone muruṅwa a tshi amba na nṋe a ri, “Heḽi ndi ipfi ḽa Muṋe washu ḽi no amba na Zerubabele ḽi ri, “ ‘A ni nga zwi koni nga maanḓa a mmbi kana nga nungo dzaṋu, zwi ḓo itwa nga Muya wanga,’ hu amba Yahavee Mulangazwoṱhe.

⁷ Iwe thavha khulu, nangwe wo hula hani, Zerubabele u ḓo vhona u mavu o linganelaho. Ú ḓo inga tombo ḽa tshiuludza ha ṱavhiwa mukosi ha pfi, ‘Ḽo naka hani! Ḽo naka hani!’ ”

⁸ Ndi hone ipfi ḽa Muṋe washu ḽi tshi amba na nṋe ḽa ri,

⁹ “Zwanḓa zwa Zerubabele zwo tea muteo wa thembele hei, zwenezwo zwanḓa zwawe zwi ḓo i ṱhaphudza. Ndi hone u tshi ḓo zwi ḓivha uri Yahavee Mulangazwoṱhe o nthuma ha inwi.

¹⁰ Ndi nnyi ane a nyadza musi wa mishumo miṱuku? Vhathu vha ḓo pembela vha tshi vhona Zerubabele o fara tombo ḽa tshiuludza. “Mbone hedzi ṱhanu na mbili ndi maṱo a Yahavee, a vhona zwoṱhe zwi re kha ḽifhasi.”

¹¹ Nṋe nda vhudzisa muruṅwa nda ri, “Miri iyi mivhili ya miolivi, muṅwe u re thungo ya tshauḽa tsha tshivheambone, muṅwe u re thungo ya tshamonde, i amba mini?”

¹² Nda dovha nda mu vhudzisa nda ri, “Matavhi aya mavhili a muolivi ane a khou shulula mapfura nga phaiphi mbili dza musuku a amba mini?”

¹³ Ene a mmbudzisa a ri, “A u ḓivhi uri izwi zwi amba mini?” Nṋe nda ri, “Muṋe wanga, a thi zwi ḓivhi.”

¹⁴ Ndi hone a tshi ri, “Havha ndi vhavhili vhe vha tiwa vha ḓodzwa uri vha shumele Muṋe wa ḽifhasi ḽoṱhe.”