ZAKARIA 11 - BIVHILI KHETHWA Mafhungo Madifha

¹ Iwe Libanoni vula mahothi au, mulilo u kone u fhisa mikedara yau!

² Inwi mipaini honḓani ngauri mukedara wo wa, ya vhugala yo wiselwa fhasi! Inwi mivhula ya Bashani vusani tshililo, ngauri maṱaka o pinzanaho o reṅwa!

³ Ipfani mukosi wa vhalisa vha nngu; pfulo yavho i titimaho yo swa! Ipfani ndau dzi tshi vhomba; maṱaka a Jorodani o haḓiwa!

Vhalisa vhavhili vha nngu

⁴ Muṋe washu Mudzimu wanga o amba na nṋe a ri, “Iyo fulisa sambi ḽa nngu dze dza pfi ndi dza u ṱhavha.

⁵ Vharengi vhadzo vha a dzi ṱhavha vha si lifhedzwe. Vharengisi vhadzo vha ri, ‘Yahavee nga a rendiwe, ndo pfuma!’ Vhalisa vhadzo a vha dzi pfeli vhuṱungu.”

⁶ Muṋe washu u ri, “Vhadzulapo vha shango a thi tsha ḓo dovha nda vha itela vhuthu. Tshine nda ḓo ita ndi u dzhia muthu nda mu kumedza muṅwe kana nda mu kumedza khosi yawe. Vhavhusi vhavho vha ḓo kandeledza vhathu vha shango, hone Nṋe a thi nga vha lamuleli khavho.”

⁷ Ndi hone ndi tshi fulisa idzo nngu dze dza pfi ndi dza u ṱhavha; nngu ndi amba Vhakanana. Nda dzhia mbaḓa mbili: luṅwe nda ri lu pfi Tshitakadzi luṅwe nda ri lu pfi Mbumbano. Zwenezwo nda thoma u fulisa nngu.

⁸ Nda thatha vhalisa vhararu nga ṅwedzi muthihi. Huno nda thoma u nyala nngu idzo, na dzone dza nnengwa.

⁹ Ndi hone ndi tshi ri, “A thi tsha ḓo vha mulisa waṋu. Dzine dza ṱoḓou fa nga dzi fe zwadzo; dzine dza ṱoḓou lovha nga dzi lovhe zwadzo; dzo salaho nga dzi ḽane ṋama!”

¹⁰ Ndi hone ndi tshi dzhia lubaḓa lu no pfi Tshitakadzi nda lu vunḓa nga vhukati, u ralo ha vha u vunḓa mulanga we Muṋe washu a ita na tshakha dzoṱhe.

¹¹ Musi wo vunḓea, musi wonoyo, nngu dzi re Vhakanana dze dza vha dzo ntsedza dza zwi vhona uri heḽo ḽo vha ḽi ipfi ḽa Muṋe washu.

¹² Zwenezwo nda vha vhudza nda ri, “Arali ni tshi vhona zwi zwone, mpheni malamba anga; arali zwi songo ralo ni songo zwi londa.” Ni hone vha tshi nkholela malamba a no nyadzea: mangwende a 30 a siliva.

¹³ Hone Muṋe washu a mmbudza a ri, “A pose mufuli wao, ndi mutengo ufhio wonoyu une vha vhona unga Nṋe ndi rengwa ngawo?” Nṋe nda dzhia mangwende a 30 a siliva nda a posa mufuli thembeleni ya Muṋe washu.

¹⁴ Ndi hone ndi tshi vunḓa lubaḓa lwanga lwa vhuvhili nga vhukati, luḽa lune lwa pfi Mbumbano, u ralo ha vha u vunḓa vhuthihi ha Juda na Israele.

¹⁵ Ndi hone Muṋe washu a tshi mmbudza a ri, “Zwino ḓiite mulisa a sa ḓivhalei.

¹⁶ Ndi uri zwino ndi vho ḓo vhea mulisa a sa ḓivhalei shangoni heḽino. Ene ha nga londi dzo xelaho, dzo netaho ha nga dzi ṱoḓi, dzi re na mbonzhe ha nga dzi lafhi, dzo takalaho ha nga dzi vhavhaleli, tshawe hu ḓo vha u ṱhavha dzo nonaho, a dzi kwatula na khwanḓa.

¹⁷ “Mulisa onoyo a sa ḓivhalei ane a ṱutshela sambi ḽa nngu, u ḓo zwi vhona! Ngavhe pfumo ḽi tshi mu runga tshishasha, ḽa nongola ḽiṱo ḽawe ḽa tshauḽa! Ngavhe tshishasha tshawe tshi tshi oma tshoṱhe, ḽiṱo ḽawe ḽa swinga tshoṱhe!”