YESAYA 9 - BIVHILI KHETHWA Mafhungo Madifha

¹ Hone henefho ho swifhalaho a hu tsha ḓo vha na swiswi. Shango ḽa Zebuloni na Nafuthali ḽo vhuya ḽa shoniswa, hone misi i ḓaho ḽi ḓo huliswa, ha huliswa nḓila i tshimbilaho na Dzivha, na ḽa seli ha Jorodani – shango ḽoṱhe ḽa Galelia hu no dzula vhannḓa.

² Vhathu vha dzulaho swiswini vho vhona tshedza tshihulu; vho vha vha tshi dzula swiswini ḽo tou nzwii, hone zwino vha khou penyelwa nga tshedza.

³ Muṋe washu, wo andisa lushaka, wa vha ṋea dakalo fulu, vha pembelela zwe wa ita unga vhathu vha tshi pembela musi wa khaṋo, kana vha tshi kovhekana lupfumo lwe vha thuba.

⁴ Wo vunḓa dzhogo ye ya vha i tshi vha lemela, na mbuno ye ya vha i tshi vha rwa mahaḓa. Wo kunda lushaka lwe lwa vha lu tshi kandeledza vhathu vhau, unga zwiḽa kale u tshi kunda mmbi ya Midiani.

⁵ Zwienda zwa vhahali zwi no pfadza mutsindo vha tshi vha dia, na zwiambaro zwavho zwo khakhaṱhelaho malofha, zwi ḓo swa nga mulilo zwe lore.

⁶ Ro bebelwa Ṅwana, ro ṋewa Mutuka. Muvhuso ndi wawe. U pfi Mueletshedzi a kanukisaho, Mudzimu Ramaanḓa, Khotsi wa lini na lini, Khosi ya mulalo.

⁷ Maanḓa awe a vhuhosi a ḓo ḓi hula a tshi ya, ḽa ḓi dzula ḽo lala. U ḓo dzula kha khuluṋoni ya Dafita, a vhusa vhuimoni hawe, a khwaṱhisa muvhuso, wa ima nga khaṱhulo mbuya na u sa ṱalula zwino na lini na lini. Muṋe washu Mulangazwoṱhe o ḓiimisela u ita zwoṱhe hezwo uri a huliswe.

Tshanḓa tsha Mudzimu tsho angaladzwa, tshi ṱoḓa u rwa Israele

⁸ Muṋe wa zwoṱhe o bula khaṱhulo ya vhaḓuhulu vha Jakopo; i do wela Israele.

⁹ Vhathu vhoṱhe vha tsinde ḽa Efraimi na vhoṱhe vha dzulaho Samaria vha ḓo zwi ḓivha uri ndi khaṱhulo yawe. Vha a ḓihudza, vha a ḓiḓivha, vha ri,

¹⁰ “Ho wa nnḓu dzo fhaṱwaho nga mavu, ri ḓo dzi vusa nga matombo; ho reṅwa phuphu dza mavongori, ri ḓo dzi vusa nga mikedara!”

¹¹ Vha ḓitika nga Retsini, hone Muṋe washu o ṋea maswina a Retsini maanḓa, a a ritha uri a ḓe a vha kovhole:

¹² Vhaaramu nga vhubvaḓuvha, Vhafilista nga vhukovhela; vho aṱama milomo, vha ṱoḓa u mila Israele. Naho zwo ralo mbiti dza Muṋe washu a dzi athu guma, u tshee o angaladza tshanḓa, u ṱoḓa u vha rwa.

¹³ Vhathu vha Israele a vha athu laṱa vhuvhi; naho Muṋe washu Mulangazwoṱhe o vha pfisa vhuṱungu, a vha athu rembulutshela khae.

¹⁴ Zwenezwo Muṋe washu o tumula Israele ṱhoho na mutshila unga khovhe, a rema mutshevho a haḓa madzhesi nga ḓuvha ḽithihi fhedzi.

¹⁵ Ṱhoho hu ambiwa vhahulwane na vhaḓivhalea, mutshila ndi vhaporofita vhane vha funza mazwifhi.

¹⁶ Vharangaphanḓa vha havha vhathu vha a vha xedza, vha sala vho ṱangana ṱhoho tshoṱhe.

¹⁷ Vhathu vhoṱhe vho nyadza Mudzimu, ndi vhavhi, zwoṱhe zwine vha amba zwo vhifha. Ndi zwine Muṋe wa zwoṱhe a sa ḓo litsha na muthihi wa vhaṱhannga vhavho a tshi ponyoka, na tshilikadzi na tsiwana ha nga vha khathutsheli. Mbiti dzawe a dzi athu guma, u tshee o angaladza tshanḓa, u ṱoḓa u vha rwa.

¹⁸ Vhuvhi ha vhathu vhu duga unga mulilo; vhu fhisa muvhi unga mulilo u tshi fhisa luanakha na mitshutshungu, ha mu kumba unga mulilo wa ḓaka u tshi duba buluvhutsi.

¹⁹ Mbiti dza Muṋe washu Mulangazwoṱhe dzi fhisa shango; vhathu vha swa unga khuni dza mulilo; vha ḽana nga tshavho, a hu na a no ponyokisa wa hawe.

²⁰ Vha ḽa wa thungo ya tshauḽa, vha ḓi pfa nḓala; vha mila wa thungo ya tshamonde, vha si fure, vha vhuya vha ḽa na vhana vhavho!

²¹ Vhathu vha Manase na Efraimi vha a ḽana, vha dovha vha ṱangana vha ḽa Juda. Nangwe zwo ralo mbiti dza Muṋe washu a dzi athu guma, u tshee o angaladza tshanḓa, u ṱoḓa u vha rwa.