YESAYA 8 - BIVHILI KHETHWA Mafhungo Madifha

Ṱhavhanyedzauthuba Ṱhangulakathihi

¹ Muṋe washu a mmbudza a ri, “Dzhia ḓaba ḽihulu u ṅwale nga maḽeḓere mahulu u ri: ṱhavhanyedzauthuba ṱhangulakathihi.

² Ndi ḓo vhidza ṱhanzi mbili dzi fulufhedzeaho; ndi tshifhe Uria na Zakaria ṅwana wa Berekia.”

³ Ngavhuya mufumakadzi wanga a vha muthu wa thovhela a beba ṅwana wa mutuka. Ndi hone Muṋe washu a tshi amba na nṋe a ri, “Mu rine dzina ḽi no pfi Ṱhavhanyedzauthuba Ṱhangulakathihi.

⁴ Huno hu ḓo ri mutukana uyo a sa athu aluwa lune a kona u ri, ‘Mma’ kana, ‘Baba’, lupfumo lwoṱhe lwa Damasko na zwo thubiwaho zwoṱhe zwa Samaria zwa vha zwo no hwalwa nga khosi ya Ashuru.”

⁵ Muṋe washu a dovha a amba na nṋe,

⁶ a ri, “Zwino avha vhathu vho lamba maḓi o dzikaho a no bva kudamboni kwa Silomu, vha takalela khosi Retsini na ṅwana wa Remalia,

⁷ Nṋe Muṋe wa zwoṱhe ndi ḓo ḓisa muvhusi wa Ashuru na mmbi yawe yoṱhe uri a die ḽa Juda. Vha ḓo tou kumba shango unga muḓalo wa maḓi a mulambo wa Yufuratha u tshi fhufha mabama.

⁸ Vha ḓo swiela ḽa Juda unga muḓalo wa maḓi ane a guma nga mukulo wa muthu a tiba zwoṱhe.” Imanuele! Mudzimu u na riṋe! Phapha dzawe dzo ṱharamuwaho dzi tsireledza shango.

Maano a tshakha dza vhannḓa a si na mushumo

⁹ Inwi dzitshakha, itani nga u kona! Ni ḓo pwashekanywa! Inwi mashango a kule, thetshelesani! Kungelani zwihali! Ni ḓo pwashekanywa! Ee, kungelani zwihali! Ni ḓo pwashekanywa!

¹⁰ Lukani maano! Ha nga shumi tshithu! Ambani nga hune na funa! A ḓi vha mahandana! Mudzimu u na riṋe!

Muṋe washu a tshi sevha muporofita

¹¹ Muṋe washu o vhea tshanḓa tshawe tsha maanḓa kha nṋe, a ntsevha uri ndi songo fara nḓila ye ya farwa nga havha vhathu, a ri,

¹² “Zwoṱhe zwine avha vhathu vha ri ndi tshimbevha, inwi ni songo ri ndi tshimbevha; zwine vha zwi ofha inwi ni songo zwi ofha na zwi tetemela.

¹³ Nṋe Yahavee Mulangazwoṱhe kha ndi vhe Mukhethwa waṋu! Ofhani Nṋe! Tetemelani Nṋe!

¹⁴ Ndi Nṋe vhushavhelo haṋu vhukhethwa, nda dovha nda vha Nṋe tombo ḽi no khukhula vhathu, ndi dombo ḽine vha wela khaḽo. Ndi nga tshikwekwe, ndi nga tshilibana tshi no fasha vhathu vha muvhuso wa Juda na wa Israele, na vhathu vha Jerusalema.

¹⁵ Hu ḓo khukhulwa vhanzhi; vha ḓo wa vha zhakiwa; vha ḓo fashwa nga tshilibana.”

U ḓifhumulela na u lindela

¹⁶ Vhuṱanzi ha Mudzimu na pfunzo yawe ndi ḓo zwi kumedza vhafunziwa vhanga vha zwi vhulunga, unga lupfumo lwo shatelwa nkhoni.

¹⁷ Muṋe washu o dzumbama muṱa wa Jakopo, hone nṋe ndi ḓi mu fulufhela, ndo lavhelela Ene.

¹⁸ Nṋe ndi fhano, ndi na vhana vhe nda ṋewa nga Muṋe washu. Muṋe washu Ramaanḓaoṱhe ane khuluṋoni yawe ya vha thavhani ya Tsioni o ri ruma ha Vhaisraele uri ri vhe zwiga na vhuṱanzi ha ndaedzo yawe.

¹⁹ Vhathu vha ḓo ni vhudza uri ni wane vhuṱanzi vhu bvaho ha madzomo a midzimu na vhabvumbi, vhane vha ambela maningoni vha ṅuṅuna. Matsina vhathu a vha vhudzisi Mudzimu wavho naa? Vhafu vha vhudziselwani zwa vha tshilaho?

²⁰ Inwi tshaṋu kha hu vhe u humela kha pfunzo ya Mudzimu na vhuṱanzi hawe. Vha sa tevhedzi zwenezwo a vha tsha ḓo vhona mapfuvhi a tshi tswuka.

Fulufhelo ḽa vho no kuleaho nungo

²¹ Vhathu vha ḓo tendeleka na shango vhó kulea miraḓo vhe na nḓala. Vha ḓo ri vha tshi pfa nḓala vha sinyuwa, vha sema khosi yavho na Mudzimu wavho. Vha nga ḓi sedza lutomboni

²² kana vha donolela fhasi, vha si vhone tshi vha farisaho, tshine vha ḓo tshi vhona ndi zwi konḓaho na swiswi – swiswi ḽi ofhisaho ḽine vha khou susumedzwa khaḽo.