YESAYA 61 - BIVHILI KHETHWA Mafhungo Madifha

Zwe muporofita a ḓela zwone

¹ Muṋe wa zwoṱhe Muṋe washu o vhea Muya wawe kha nṋe; Muṋe washu o nnḓodza mapfura uri ndi vhe muporofita, a nthuma uri ndi isele vhaheḓana mafhungo maḓifha, ndi fhodze vha mbilu dzo pwashekanaho, ndi ḓivhadze mathubwa uri a ḓo vhofhololwa, vha re dzhele vha ḓo bvisiwa,

² ndi ḓivhadze ndi ri, “Tshifhinga tsha Muṋe washu tsho swika! Ndi hone Mudzimu washu a tshi ḓo lifhedza maswina awe!” O nthuma u fhodza vha lilaho,

³ uri vhoṱhe vho ṱungufhalaho Tsioni ndi vha rudze mbilu, vha si tsha dzula milorani, vha ambare tshiala tsha vhugala, vha bvule nguvho ya tshililo, vha ḓole mapfura a dakalo, vha si tsha ṱovhowa, thendo i vhe yone nguvho yavho. Vha ḓo fanyiswa na miri ya u naka, ye Muṋe washu a i ṱavha uri a ṱane vhugala hawe na vhuvhuya hawe.

⁴ Vha ḓo vusa matumba a kale, vha imisa miḓi yo thuthiwaho kale-kale; vha ḓo fhaṱa miḓi yo phusukanywaho ye ya vha i marubi miṅwaha na miṅwaha.

⁵ Maṱambi aṋu a nngu a ḓo liswa nga vhatsinda, vha ni limela masimu, vha londola minḓirivhe yaṋu.

⁶ Hone inwi ni ḓo pfi vhotshifhe vha Muṋe washu; vha ḓo ri ni pfi vhashumi vha Mudzimu washu; ni ḓo ḽa lupfumo lwa dzitshakha na lu ṱongisa.

⁷ Ṱhoni dzaṋu na u nyadzea zwo fhela, zwino ni vho ḓo fhululedza no fhululedza; ni ḓo dzula shangoni ḽaṋu, lupfumo lwaṋu lwa anda kavhili, dakalo ḽaṋu ḽa vha ḽa lini na lini.

⁸ Muṋe washu u ri, “Tshine nda tshi funa ndi khaṱhulo i sa ṱaluli, u dzhiela vhaṅwe zwithu nga vhufhura ndi a zwi vhenga; vhathu vhanga ndi ḓo vha pfufha nga zwo vha teaho, nda vhofha navho mulanga wa lini na lini.

⁹ Vhana vhavho vha ḓo vha na bvumo vhukati ha dzitshakha, vhaḓuhulu vhavho vha huliswa nga vhathu vhoṱhe; vhoṱhe vhane vha vha vhona vha ḓo ḓivha uri ndi lushaka lwe Muṋe washu a lu shudufhadza.”

Luimbo lwa ndivhuho

¹⁰ Ndi pembelela mishumo ya Muṋe washu, ndi fhululedza Mudzimu wanga! O nnyambadza u tshidzwa; khanzu ye a mpfukedza ndi gundo, nda nga mukwasha o ambara tshiala, nda nga muselwa o ṱamiwa nga nungu dzawe.

¹¹ Muṋe wa zwoṱhe Muṋe washu u ḓo ita uri ri kunde, ri mu rende nga nyimbo tshakha dzoṱhe dzi tshi zwi pfa, zwa nga mavu a tshi medza mutomba, zwa nga ngade i tshi medza mbeu.