YESAYA 59 - BIVHILI KHETHWA Mafhungo Madifha

Muporofita a tshi sanda vhuvhi ha vhathu

¹ Ni songo vhona unga tshanḓa tsha Muṋe washu ndi tshipfufhi, a tshi koni u ni tshidza, kana na vhona unga o dzinga nḓevhe, ha ni pfi!

² Ndi vhuvhi haṋu ho ni fhandekanyaho na Mudzimu waṋu, ndi vhutshinyi haṋu he ha ita uri a ni furalele, a si ni pfe.

³ Zwanḓa zwaṋu zwo tswuka malofha, minwe yaṋu yo ḓala vhuvemu, milomo yaṋu i amba mazwifhi, ndimi dzaṋu dzi amba zwa vhufhura.

⁴ Ni sokou pomokana nga zwi siho; a hu na a no haṱula a sa ṱaluli; ni ḓitika nga mazwifhi ni tshi ṱoḓa u lamulelwa tsengoni; ni vhifha muvhilini nga u levha, na beba vhuvhi.

⁵ Ni luka vhunwa, zwa nga u alamela makumba a tshitemahe; ane a ḽa makumba aṋu u a fa; a tshi thothonya hu bva mavuluvulu. Vhutande haṋu vhu nga u luka lubuvhi;

⁶ a lu luki nguvho, a ni tandi ḽi no fukwa; mishumo yaṋu ndi mivhi, tshine zwanḓa zwaṋu zwa tshi kona ndi u huvhadzana,

⁷ milenzhe yaṋu i gidimela vhuvhini, i ṱuwa nga luvhilo i tshi yo fhaladza malofha a a si na mulandu; mihumbulo yaṋu ndi mivhi; hune na kanda ni sia mutshinyalo na ndozwo;

⁸ nḓila ya mulalo a ni i ḓivhi, hune na ya ndi u piringanya khaṱhulo; ni fara ya magombikwa, hone vha faraho yeneyo a vha nga vhi na mulalo.

Vhathu vha tshi bula vhuvhi havho

⁹ Zwino ri vho ḓivha uri ndi mini Muṋe washu a sa ri lamuleli, ri sa vhoni u fulufhedzea hawe; ri lavhelela tshedza, ra sokou vhona swiswi fhedzi; ri lindela mapfuvhi, ra sokou tshimbila ho tou nzwii;

¹⁰ ri phuphuledza nḓila luvhondoni unga mabofu, ra timatima unga vhathu vha si na maṱo, ra khukhulwa masiari tshivhangalala, ha nga ḽo kovhela; ri nga vhafu ri tshee vhaṱuku.

¹¹ Roṱhe ri gomela unga biara i tshi lila, ri lila unga maivha. Ro lindela u lamulelwa, zwa kunda, ra lavhelela u tshidzwa, ra si hu vhone.

¹² Mune washu, ro u khakhela lu sa fheli, vhutshinyi hashu vhu a ri pomoka; vhukuma, vhukhakhi hashu a vhu ṱuwi mbiluni dzashu, milandu yashu ri a i ḓivha;

¹³ ro u shandukela ra ita vhufhura, ra furalela Mudzimu washu, ra hana u u tevhela ra kandeledza vhaṅwe; mbilu dzashu dzo amara mazwifhi ra a ṱanza nga u zwifha.

¹⁴ A hu tshee na khaṱhulo mbuya; u fulufhedzea ho ima kule; mikotoni ngoho a i tsha pfala, yo khukhulwa ya wela fhasi; a si na vhufhura ha tsha vulelwa muṋango;

¹⁵ ngoho a i tsheeho; a sa funi u tshinya u a ṱangulwa. Hezwo Muṋe washu o zwi vhona; zwi a mu dina hu si na khaṱhulo mbuya;

Muṋe washu a tshi lugisela u lamukisa vhathu vhawe

¹⁶ zwi a mu kanukisa a tshi vhona hu si na ane a lamulela vha kandeledzwaho, ndi zwe a tshidza vhathu nga maanḓa awe, u fulufhedzea hawe ha vha yone thikho yawe.

¹⁷ Tshipilakhana tshe a ambara ndi u fulufhedzea; u tshidza vhathu ndi wone muṅadzi wawe; zwiambaro zwawe ndi u lifhedza; khanzu yawe ndi u fungelela u tupula vhuvhi.

¹⁸ U ḓo pfufha muṅwe na muṅwe a tshi tevhedza mishumo yawe – pfufho ya maswina awe dzi ḓo vha mbiti dzawe; vha mashango a kule u ḓo vha lifhedza nga zwo vha teaho.

¹⁹ Vha Vhukovhela vha ḓo ofha dzina ḽa Muṋe washu, vha Vhubvaḓuvha vha hulisa vhugala hawe. Ndi uri maswina a tshi ḓa unga mulambo u kumbaho, Muya wa Muṋe washu u ḓo vha shakulisa.

²⁰ Hone Tsioni u ḓo ḓa e Mutshidzi, a dalela vhana vha Jakopo vho laṱaho vhutshinyi havho. Ho amba Muṋe washu.

²¹ Muṋe washu u ri, “A vha Nṋe, mulanga une nda vhofha na iwe ngoyu: Muya wanga a re kha inwi na maipfi anga e nda longa mulomoni wau, ha nga bvi mulomoni wau, na milomoni ya vhana vhau ha nga bvi, na milomoni ya vhana vha vhana vhau, lini na lini. Ho amba Nṋe Yahavee.”