YESAYA 57 - BIVHILI KHETHWA Mafhungo Madifha

Vhuvhi ha Vhaisraele ha u luvha midzimu ya khole-khole

¹ Vhavhuya vha a lovha ha si vhe na ane a zwi londa; vha fulufhedzeaho vha a hwalwa; a hu na ane a zwi ṱalukanya uri vha tshi hwalwa ndi u tinyiswa khombo.

² Vhane vha fara i re yone vha na mulalo, vha tshi fa vha a awela.

³ “Inwi vhana vha vhaloi, vha zwiṱonḓolo, vha dziphombwe, sendelani ni haṱulwe!

⁴ Ni khou kolela nnyi? Ni khou nzhonzhowedza nnyi? Lulimi lu khou ṱoṱomodzelwa nnyi? Vhana vha mashandukwa, vha vhadzia-u-zwifha ndinwi!

⁵ Ni luvha midzimu yaṋu ya zwa mbebo nga u ita vhupombwe fhasi ha miri yoṱhe ya zwimvingimvingi, ni dzhia vhana vhaṋu na vha ita zwiṱhavhelo magovhani na pharani.

⁶ Henefho ni dzhia matombo a suvhelelaho, eneo na a ita midzimu na a luvha! Ni a itela thevhula nga waini na mpambo. Ni vhona unga zwine na ita zwi a ntakadza? Ni ḓo swiṱwa fhasi ha matombo eneo!

⁷ “Ni ya thavhani ndapfu na ita vhupombwe, na ṋekedza zwiṱhavhelo henefho.

⁸ Ni nambatedza phamba dzaṋu murahu ha mahothi na kha zwiaramo; ni a ntshandukela na bvula zwiambaro na sala fhedzi, na gonya mimbete yaṋu na vhafunwa vhaṋu, na anḓana navho na takalela u dzhena navho nḓuni, na ita na u vha ṋea malamba.

⁹ Ni ḓishasha nga zwiḓolo zwi nukhelelaho na dubisa zwioro na yo luvha uḽa mudzimu Molekhe. Ni ruma vhaḓinḓa kule, vha vhuya vha swika na vhudzulavhafu vha tshi ṱoḓa midzimu ine na nga i luvha.

¹⁰ Ni a ḓinetisa nga nyendo dzaṋu dzi sa fheli, na si vhuye na ri, ‘A zwi farisi tshithu!’ na pfa ni na nungo, na si ṋoke.”

¹¹ Muṋe washu u ri, “Ndi vhonnyi heyo midzimu ine ya ni dzhenisa nyofho, na vho nnzwifhela na nkhangwa tshoṱhe? Ndo fhedza tshifhinga tshilapfu ndo ḓifhumulela; kani ndi zwone zwine na si tsha nndonda?

¹² Ni vhona unga zwine na ita ndi zwone, hone zwino a thi tsha ḓo fhumula, ndi ḓo ni dzumbulula, midzimu ye na ita ya si kone u ni tshidza.

¹³ Edzonu ṱavha mukosi ni vhone arali izwo zwithu zwaṋu zwe na kuvhanganya zwi tshi ḓo ni phalala! Zwi ḓo hwalwa nga muya, na mufemo zwawo u ḓo zwi vhudzulela kule. “Huno vhane vha shavhela ha Nṋe vha ḓo dzula shangoni, thavha yanga khethwa ya vha yavho.”

Hu tshi khuthadzwa vho tsikeledzwaho

¹⁴ Muṋe washu u ri, “Khurani, khurani, phulani gondo ḽi tshimbilee! Zwikhukhuli zwoṱhe nga zwi bviswe nḓilani ya vhathu vhanga!

¹⁵ Hu amba Nṋe Waṱaḓuluṱaḓulu; haya hanga ndi ha lini na lini; ndi pfi Mukhethwa. Ndi dzula fhethu hukhethwa ngei ṱaḓulu, nda dovha nda dzula na vho tsikeledzwaho, vha ḓiṱukufhadzaho, uri vha ḓiṱukufhadzaho ndi dovhe ndi vha ṋee vhutshilo, mbilu dzo tsikeledzwaho nga vhutshinyi ndi dzi vuse.

¹⁶ Ndi nga si dzule ndi tshi vha pomoka kana nda vha sinyutshela lu sa gumi, mimuya ya vhathu ye nda i sika Nṋe muṋe i sa ḓo lovha phanḓa hanga.

¹⁷ Ndo vha ndo sinyutshela vhuvhi havho ha u funa u pfuma nga tseḓa, nda vha rwa nda vha furalela. Naho zwo ralo vha ḓi ntshandukela vha fara yavho nḓila.

¹⁸ “Zwe zwa vha wela ndo zwi vhona; ndi ḓo vha fhodza. Ndi ḓo vha endedza nda vha khuthadza, vho ṱungufhalaho nda vha fhumudza.

¹⁹ Ndi ḓo longa thendo milomoni yavho; vhoṱhe ndi vha ṋea mulalo, vha re kule na vha re tsini! Ndi ḓo vha fhodza.” Ho amba Muṋe washu.

²⁰ Vhavhi vhone vha nga lwanzhe lu sa aweli; magabelo alwo ha dziki, a hwala makukwe na matope.

²¹ Mudzimu wanga u ri, “Vhavhi a vha na mulalo.”