YESAYA 54 - BIVHILI KHETHWA Mafhungo Madifha

Muṋe washu u ḓo hulisa Vhaisraele vho nyadziwaho

¹ Jerusalema, wo vha u tshi nga musadzi wa muumba a sa bebi, zwino fhululedza u pembele u tou ṱavha mukosi nga dakalo, iwe u sa athu vhuya wa pfa vhuṱungu ha musadzi a tshi ṱoḓou vhofholowa! Wo vha u musadzi o ṱaliwaho, hone zwino u vho ḓo vha na vhana vhanzhi vha no fhira vha musadzi a re na munna.

² Engedzedza dennde ine wa dzula khayo! Ṱharamudza masila ayo, u songo ita thotho! Lapfisa thambo dzayo, u khwaṱhise khokho!

³ U ḓo engedza mikano yau masia oṱhe; vhathu vhau vha ḓo wana mashango ane zwino a dzula dziṅwe tshakha; miḓi yo phusukanywaho i vho ḓo vha na vhathu.

⁴ U songo ofha, a u tsha ḓo dovha wa shona; u songo vha na ṱhoni, a u tsha ḓo dovha wa nyadziswa; u ḓo hangwa vhuaḓa he wa ita u tshee muṱuku, wa si tsha elelwa u nyadziwa hau zwiḽa u tshee tshilikadzi.

⁵ Musiki wau u vho ḓo nga munna wau; Ene u pfi Muṋe washu Mulangazwoṱhe; Mukhethwa wa Israele ndi Mutshidzi wau; u pfi Mudzimu wa ḽifhasi ḽoṱhe.

⁶ Iwe Jerusalema, u nga musadzi o ṱaliwaho nga munna, a no dzula a tshi ḽa mbilu nga u vhona a si tsha funwa unga zwiḽa a tshee muṱuku. Hone Muṋe washu u ri u humele khae; Mudzimu wau u ri,

⁷ “Ndo vha ndo u ṱala tshifhinga tshiṱukuṱuku, hone zwino ndi ḓo u khathutshela zwihulu, nda u vhidza wa vhuya.

⁸ Ndo vha ndo u sinyutshela zwihulu nda u furalela tshifhinganyana, hone zwino ndi ḓo u khathutshela nga lufuno lwa lini na lini.” Muṋe washu Mutshidzi wau u ralo.

⁹ U ri, “Misi ya Nua ndo ana nda ri a thi tsha ḓo fhedza shango nga muḓalo wa maḓi, zwino ndi khou dovha u ana sa zwenezwiḽa uri a thi tsha ḓo dovha nda u sinyutshela kana nda u ofhisa.

¹⁰ Naho dzithavha dza dzinginyea, mivhundu ya sudzuluwa, hone lufuno lwanga a lu nga dzinginyei, mulanga wanga wa mulalo we nda vhofha na iwe a u nga sudzuluwi.” Muṋe washu ane a u khathutshela u ralo.

Jerusalema muswa

¹¹ Muṋe washu u ri, “Iwe Jerusalema, muḓi wo tambudzwaho, wo phusukanywaho, hu si na ane a u khuthadza, ndi ḓo vusa miteo yau nga matombo a mutengo muhulu, nda u fhaṱa nṱha ha matombo a safire;

¹² ndi ḓo fhaṱa mitsheṱo yau nga matombo a no penya unga mulilo, khoro dzau nda dzi ṱama nga matombo a muroxwe, luvhondo lwo u tangaho nda lu vusa nga matombo a mutengo muhulu.

¹³ Nṋe nga ndoṱhe ndi ḓo funza vhathu vhau, ḽa tou lala tshoṱhe.

¹⁴ U fulufhedzea hu ḓo vha yone thikho yau; a hu na ane a ḓo u kandeledza, a u nga ofhi tshithu, zwi ofhisaho zwi ḓo vha kule na iwe.

¹⁵ Ane a u kovhola u ḓo vha a songo tendelwa nga Nṋe; ane a vhuya a lwa na iwe u ḓo kundiwa.

¹⁶ “Ndi Nṋe ndo sikaho mufuli wa tsimbi ane a vhasa mulilo wa masimbe a fula zwihali, na muhali muphusukanyi o vhumbwa nga Nṋe;

¹⁷ a hu na tshihali tshine tsha ḓo u huvhadza; vhoṱhe vhane vha u pomoka vha ḓo wanala vhe na mulandu. Hoyo ndi wone mukovhe wa vhalanda vhanga, ndi vha sengela nga u ralo.” Ho amba Muṋe washu.