YESAYA 53 - BIVHILI KHETHWA Mafhungo Madifha

¹ Ndi nnyi ane a nga tenda zwe ra zwi pfa? Ndi nnyi we a dzumbululelwa uri ndi maanḓa a Muṋe washu ayo?

² Muḓinḓa wa Muṋe washu o aluwa unga ḓadzwane ḽi tshi simuwa kha tshiguthe mavuni o omelelaho. O vha a si na lunako kana vhugala zwine ra nga vhuya ra mu sedza-vho; ri tshi mu sedza o vha a sa vhuyi a takadza.

³ Vhathu vho mu nyadza vha mu landula; o vha e munna a tambulaho, o ḓowelaho maṱungu; vho vha vha tshi tou tata na u mu sedza; ro mu nyadza ra si vhuye ra mu ita muthu.

⁴ Hone vhukuma ndi malwadze ashu e a ḓihwesa one, ndi vhuṱungu he ha vha ho fanela u pfiswa riṋe. Ro vha ri tshi vhona unga u tambudzwa hawe na u kandeledzwa ndi ṱhamu i bvaho kha Mudzimu,

⁵ mathina o rungelwa vhutshinyi hashu, o pwashekanyelwa milandu yashu; ro pfumelelwa nge Ene a rwiwa nga ṱhamu, ra fhodzwa nga mbonzhe dzawe.

⁶ Roṱhe ro vha ri tshi nga nngu dzo xelaho, muṅwe na muṅwe ó fara yawe nḓila, hone Muṋe washu a mu hwesa milandu yashu roṱhe.

⁷ O pfiswa vhuṱungu, a ḓiṱukufhadza a konḓelela, a si vhuye a amba tshithu. O nga ngwana i iswaho u ṱhavhiwa, a nga nngu i sa lili i tshi vheulwa; ho ngo vhuya a amba tshithu.

⁸ O farwa, a haṱulwa, a iswa u vhulawa, hu si vhe na ane a zwi londa; o tumulwa shangoni ḽa vha tshilaho, a vhulahelwa vhutshinyi ha vhathu vha Mudzimu.

⁹ O pfi a swiṱwe na vhavhi, hone a vhulungwa na mupfumi, ngauri ho ngo vhuya a ita zwa vhuvemu, ho ngo vhuya a fhura muthu.

¹⁰ Muṋe washu o tou zwi funa u mu huvhadza a mu ṱungufhadza. A tshi fa ho vha hu u kumedza vhutshilo hawe, a vha tshipfumelo tsha vhutshinyi ha vhathu, ndi zwine a ḓo vha na vhaḓuhulu, a lalama; zwine Muṋe washu a zwi funa u ḓo zwi khunyeledza ngae.

¹¹ U ḓo ri o tambudzwa zwingafhongafho a dovha a vhona tshedza, a pfufhelwa u tambula hawe. Muṋe washu a tshi mu amba u ri, “Muḓinḓa wanga u ḓivha zwine nda funa; vhunga Ene a si na tshe a tshinya u ḓo vha tshipfumelo tsha vhutshinyi ha vhanzhi, a ḓihwesa milandu yavho.

¹² Ndi zwine nda ḓo mu ṋea mukovhe na vhahulwane, a kovhekana zwo thubiwaho na vhahali nge a ḓikumedza lufu, a ḓibaḓekanya na vhatshinyi, a ḓihwesa vhutshinyi ha vhathu vhanzhi, a rabelela vhatshinyi.”