YESAYA 52 - BIVHILI KHETHWA Mafhungo Madifha

¹ Iwe Tsioni, vuwa! Takuwa, ambara maanḓa au! Iwe Jerusalema, muḓi mukhethwa, ambara dza maṱeleṱele! Vha songo fumbaho na vha dzitshika a vha tsha ḓo dzhena ngomu hau.

² Iwe Jerusalema, fhufhura buse ḽau! Takuwa! Dzula kha khuluṋoni! Iwe Tsioni musidzana wa ḽithubwa, vhofholola geḓane dzo u hungaho mukulo.

³ Muṋe washu u ri, “A wo ngo rengiswa nga tshithu; u ḓo vhofhololwa hú songo bviswa tshelede.”

Mudzimu u ḓo vhofholola vhathu vhawe Babele

⁴ Muṋe wa zwoṱhe Muṋe washu u ri, “Vhathu vhanga vho ranga u tsela Egipita vha dzula hone, ngavhuya vha kandeledzwa nga Vhaashuru hu si na tshe vha tshinya.

⁵ Zwino fhano ndi khou vhonani? Hufha vhathu vhanga vho sokou hwalwa nga fhedzi. Na vhavhusi vho vha thubaho vha a kola; ḓuvha ḽoṱhe dzina ḽanga ḽi ṱwa ḽi tshi nyefulwa.

⁶ Huno-ha vhathu vhanga ndi tshi vha vhofholola vha ḓo ḓivha dzina ḽanga; musi wonoyo vha ḓo ḓivha uri ndi Nṋe we nda dzula ndo zwi amba. Ee, ndi Nṋe!”

Muṋe washu a tshi vhuya na lushaka lwawe

⁷ Ṋayo dza a no ḓisa mafhungo mavhuya dzi tshi gidima nṱha ha dzithavha, zwo naka hani! Zwi takadza hani a tshi ḓivhadza a mulalo, a tshi ḓisa mafhungo a takadzaho, a tshi ḓivhadza a u tshidzwa ha vhathu, a tshi vhudza Tsioni a ri, “Mudzimu wau u a vhusa!”

⁸ Edzou pfa vhalindi vhau vha tshi takusa maipfi; vhoṱhe vha ṱavha mukosi nga dakalo. Musi Muṋe washu a tshi vhuelela Tsioni, vha ḓo zwi vhona nga avho maṱo.

⁹ Matumba oṱhe a Jerusalema nga a lidze mifhululu; Muṋe washu o fhumudza vhathu vhawe; o vhofholola Jerusalema!

¹⁰ Muṋe washu u ḓo angaladza tshanḓa tshawe tshikhethwa, tshakha dzoṱhe dza tshi vhona, migumo yoṱhe ya ḽifhasi ya vhona Mudzimu washu a tshi tshidza vhathu vhawe.

¹¹ Ṱuwani, ṱuwani! Ibvani hafho fhethu! Ni songo kwama tshithu tsha mashika! Ibvani Babele, ni songo kumala; no hwala midzio ya thembele ya Muṋe washu!

¹² Hone a ni nga ṱuwi nga shishi; a ni nga tou shavha; Muṋe washu u ḓo vha o ni ranga phanḓa; Mudzimu wa Israele u ḓo ni linda nga murahu.

Luimbo lwa vhuṋa lwa Muḓinḓa wa Muṋe washu: O fela vhutshinyi hashu

¹³ Muṋe washu u ri, “Muḓinḓa wanga zwi ḓo mu nakela mushumoni we nda mu ṋea; u ḓo vha muhulwane a tou gagamiswa, a huliswa zwihulu.

¹⁴ Vhanzhi vho ri u mu vhona zwa vha ofhisa; muthu a tshi mu sedza o vha a si tsha nga muthu; o vha a si tsha vhonala e muthu.

¹⁵ Huno zwino tshakha nnzhi dzi tshi mu vhona dzi ḓo kanuka; mahosi a ḓo ri u mu vhona a akhamala; vha ḓo vhona zwi sa athu ambiwa, vha ṱalukanya zwi sa athu pfiwa.”