YESAYA 51 - BIVHILI KHETHWA Mafhungo Madifha

Maipfi a u fhumudza vhathu vha Mudzimu

¹ Nthetsheleseni inwi ni tamaho u ita zwi re zwone, vhane na ṱoḓa Muṋe washu nga mbilu yoṱhe: elelwani tombo ḽine na bva khaḽo, mugodi we na bwiwa khawo –

² ndi amba makhulukuku waṋu Abrahamu na Sara we a ni beba: ndi tshi vhidza Abrahamu o vha a si na ṅwana, nda mu shudufhadza, a vha na vhana vha anda.

³ Muṋe washu u ḓo fhumudza Tsioni, matumba awo a a pfela vhuṱungu, phanga dzawo a dzi ita unga Edeni, masoga awo a nga ngade ya Muṋe washu; ngomu hawo hu ḓo takalwa ha pembelwa, ha pfala nyimbo dza thendo na ndivhuho.

⁴ Muṋe washu u ri, “Inwi vhathu vhanga, thetshelesani! Kolongonyani nḓevhe, inwi lushaka lwanga! Ndi ḓo funza dzitshakha; milayo yanga i ḓo vha vhonetshela.

⁵ A thi nga lengi u ḓa nda vha tshidza; tshifhinga tshanga tsha u kunda tsho sendela; ndi ḓo vhusa dzitshakha nga ndoṱhe. Mashango a kule o nndavhelela; o lindela uri ndi a tshidze nga maanḓa anga.

⁶ Sedzani lutombo! Lu ḓo nyamalala unga vhutsi! Vhonani ḽifhasi! Ḽi ḓo ṱahala unga nguvho, vhathu vhoṱhe vha dzulaho khaḽo vha fa unga thunzi, hone inwi ndi ḓo ni tshidza zwa vha zwo fhela; gundo ḽanga a ḽi nga gumi.

⁷ “Nthetsheleseni, inwi vhane na ḓivha zwi re zwone, inwi vhane pfunzo yanga ya dzula mbiluni dzaṋu! Vhathu vha tshi ni kolela, vha tshi hi sema, ni songo tshenuwa, ni songo ofha;

⁸ vha ḓo ṱahala unga nguvho yo ḽiwa nga tsole; mbundudzi dzi ḓo vha ḽa unga vhukuse ha nngu; hone gundo ḽanga ḽi ḓo ḓi dzula ḽi hone; u ni tshidza hanga hu ḓo dzula ho ralo zwi tshi ya na mirafho na mirafho.”

Muṋe washu a tshi phalala vhathu vhawe

⁹ Muṋe washu, vuwa! Vuwa u ambare maanḓa au, u ri tshidze! Vuwa u ite zwiḽa zwe wa ita kale, zwi nge zwa mirafho ya kale! Hufha e Iwe we wa tumukanya Rahaba, buka ḽa lwanzheni, wa runga ḓiragoni wa phuletshedza.

¹⁰ Ndi Iwe we wa ita uri lwanzhe lu xe, mativha mahulu a sala o oma, wa phula nḓila maḓini, uri vhe wa vha tshidza vha kone u fhira.

¹¹ Muṋe washu, vhe wa vha vhofholola vha ḓo vhuya, vha dzhena Tsioni nga mifhululu, tshiala tshavho ḽa vha dakalo ḽa lini na lini; a ḽi nga vhi ḽone dakalo na u pembela; u ṱungufhala na u gomela zwi ḓo fhela.

¹² Muṋe washu u ri, “Nṋe muṋe ndi Nṋe ane nda ni fhumudza; muthu ane a fa ni mu ofhani? Hufha a tshi lovha unga hatsi.

¹³ Kani no hangwa Yahavee we a ni vhumba, we a ṱharamudza lutombo a tea ḽifhasi? Khefha ni tshi dzula nga u ofha vhuhali ha vhakandeledzi vhaṋu vhane vha ṱoḓa u ni lozwa? Vhuhali havho a vhu tsha ḓo ni kwama.

¹⁴ Vho vhoxwaho nga geḓane a vha nga lengi u vhofhololwa, a vha nga feli dzhele, a vha nga shayi zwiḽiwa.

¹⁵ Ndi Nṋe Yahavee Mudzimu waṋu; ndi ritha lwanzhe, magabelo alwo a vhomba! Ndi pfi Yahavee Mulangazwoṱhe.

¹⁶ Ndo ṱharamudza lutombo nda tea ḽifhasi; ndi vhudza Tsioni ndi ri, ‘Ni vhathu vhanga! Ndo longa maipfi anga mulomoni waṋu; ndi ni tsireledza nga tshanḓa tshanga.’ ”

¹⁷ Jerusalema, vuwa! Takuwa u ime! Wo nwa tshinwelo tsha mbiti dza Muṋe washu tshe a u ṋekedza; wo nwa na tshidziki, wa pepeleka.

¹⁸ Kha vhana vhoṱhe vhe wa beba a hu na ane a u endedza; kha vhoṱhe vhe wa vha alusa a hu na ane a u fara nga tshanḓa.

¹⁹ Wo welwa nga khombo mbili kathihi: shango ḽau ḽo phusukanywa nga nndwa, vhathu vhau vha ṋoka nga nḓala; a hu na ane a u lilela, a hu na ane a u fhumudza.

²⁰ Mafhandeni a magondo au oṱhe vhana vhau vha sokou huru nga u shaya nungo; vha nga ntsa yo fashwa nga khunḓa; vho rwiwa nga mbiti dza Muṋe washu; vho kaidzwa nga Mudzimu wau.

^21-22 Zwino iwe Jerusalema wo tambulaho, iwe wo kambiwaho ú songo nwa waini, wó tou nwiswa tshinwelo tsha mbiti dza Mudzimu, edzou pfa zwine Muṋe wau Yahavee Mudzimu wau ane a u lwela a amba! U ri, “Ndi khou dzhia tshiḽa tshinwelo tsha mbiti dzanga tshe nda u ṋekedza; a u tsha ḓo nwa tshinwelo tshine tsha u kamba wa pepeleka.

²³ Zwino ndi ḓo tshi nwisa vhane vha u kandeledza, vhe vha u vhudza vha ri, ‘Shuvhama ri tshimbile nṱha hau!’ Muṱana wau wa nga mavu, wa nga gondo ḽine ḽa kandwa.”