YESAYA 5 - BIVHILI KHETHWA Mafhungo Madifha

Lushaka lwa Mudzimu – tsimu ya minḓirivhe i sa aṋwi mitshelo

¹ Thetshelesani ndi tshi ni imbela luimbo lwa Mufunwa wanga! Ndi luimbo lwa tsimu yawe ya minḓirivhe; Mufunwa wanga o vha e na tsimu ya minḓirivhe muvhunduni wo vhibvelaho.

² O i bwa a bvisa matombo, a sima minḓirivhe yone-yone, a fhaṱa ḓingo ḽa u i linda, a bwa bonḓelo ḽa u fhonḓela nḓirivhe, a lindela nḓirivhe dzi tshi vhibva, a wana dzoṱhe dzi tshi vhavha.

³ Zwino Mufunwa wanga u ri, “Inwi ni no dzula Jerusalema, vhanna vha Juda, haṱulani ni sumbedze o khakhaho kha Nṋe na tsimu yanga.

⁴ Kani hu na tshe nda kundwa u i itela? Zwino ndi mini yo aṋwa nḓirivhe dzi vhavhaho, ya si aṋwe dzi ḓifhaho dze nda vha ndo dzi lavhelela?

⁵ “Zwino-ha ndi ḓo ni vhudza zwine nda ḓo ita tsimu yanga: Ndi ḓo fuḓa mupfunda woṱhe wo i tangedzaho, nda litsha phukha dza ḓaka dzi tshi i ḽa, nda thutha mutsheṱo wayo dza i kandekanya,

⁶ nda i litsha ya mela ḓaka. A thi nga khwatheli minḓirivhe, na u ṱahula a thi nga ṱahuli; ndi ḓo litsha i tshi mela luanakha na mitshutshungu, na makole a thi nga a tendeli a tshi i nisela mvula.”

⁷ Tsimu ya minḓirivhe ya Muṋe washu Mulangazwoṱhe ndi nnḓu ya Israele; vhanna vha Juda ndi ngade ine ya mu takadza. O vha o lavhelela hu tshi itwa zwi tshidzaho, a vhona hu tshi fhaladzwa malofha; a lavhelela mulalo, ha pfala mukosi wa zwililo.

Ṱhamu ya vhavhi (5:8-24) Vha no emula zwoṱhe

⁸ Ni ḓo zwi vhona inwi vhane na renga nnḓu dzi sa fheli, na dubekanya masimu ha vhuya ha sala hu si tshee na tshikhala, na dzula shangoni ni noṱhe.

⁹ Ndo pfa Muṋe washu Mulangazwoṱhe a tshi ana a ri, “Nnḓu dzoṱhe hedzo khulwane dzo nakaho dzi ḓo sala dzi matumba a si na muthu ngomu.

¹⁰ Tsimu ye na lima maḓuvha a fumi i ḓo bveledza litha ṱhanu na tharu fhedzi dza waini; saga dza fumi dza mbeu dzi ḓo bveledza saga nthihi fhedzi ya goroi.”

Zwidakwa na phangwa

¹¹ Ni ḓo zwi vhona inwi ni no fhindutshela u nwa, na dzedza ni tshi kambiwa.

¹² Minyanyani yaṋu ni lidza mbila na haripa na tshele na zwiṱiringo, na nwa waini, hone a ni londi zwine Muṋe washu a khou ita, a ni vhoni zwine a shuma.

¹³ Ndi zwine na ḓo thubiwa na vha dziphuli, ngauri a ni funi u nnḓivha; vhaḓivhalea vhaṋu vha ḓo ṋoka nga nḓala, vhathu zwavho vha fa nga ḓora.

¹⁴ Vhudzulavhafu ho vha lindela, ho dzula ho aṱama mulomo, a vhu furi; lupfumo na vhugala ha Jerusalema zwi ḓo godimela ngomu, khathihi na gogo ḽa vha no ṱavha mukosi vha tshi pembela.

¹⁵ Vhoṱhe, vhahulwane na vhaṱuku, vha ḓo ṱukufhadzwa, vha u ḓihudza vha ḓo nyadziswa.

¹⁶ Huno Muṋe washu Mulangazwoṱhe u sumbedza vhuhulu hawe nga u ita zwi re zwone, u dzumbulula vhukhethwa hawe nga u haṱula vhathu nga khaṱhulo mbuya.

¹⁷ Matumba avho a ḓo vha pfulo ya ngwana; zwo siwaho nga vhafuwi zwi ḓo ḽiwa nga vhalisa vha no tendeleka na shango.

Vha no nyadza Mudzimu

¹⁸ Ni ḓo zwi vhona inwi ni no enda ni tshi kokodza vhuvhi haṋu nó vhu pfuṋela nga vhufhura, vhutshinyi ha nga goloi i no kokodzwa nga thambo,

¹⁹ vhane vha ri, “Tshi ḓaho kha tshi ḓe ri tshi vhone, Mudzimu a songo lenga; ngavhe Mukhethwa wa Israele a tshi ita zwe a dzudzanya, ra zwi ḓivha!”

²⁰ Ni ḓo zwi vhona inwi ni no shandula zwivhi na ri ndi zwivhuya, zwivhuya na ri ndi zwivhi, swiswi na ḽi ita tshedza, tshedza na tshi ita swiswi, zwi kalakataho na zwi ita zwi ḓifhaho, zwi ḓifhaho na zwi ita zwi kalakataho.

²¹ Ni ḓo zwi vhona, inwi ni no vhona unga no ṱalifha, na ri no thanya.

²² Inwi vhahali – kha u nwa waini, inwi vhomakone – vha u inga halwa vhu kambaho, ni ḓo zwi vhona!

²³ Ni ṱanganedza tshanḓanguvhoni na vhofholola a re na mulandu; na kundisa a si na mulandu u wana pfanelo dzawe.

²⁴ Ni ḓo nga muri wo sinaho midzi, maluvha awo a fhufha nga muya unga mungu, zwa nga maṱanga na hatsi ho omaho zwi tshi fhiswa nga khavhu ya mulilo, nge na landula pfunzo ya Muṋe washu Mulangazwoṱhe, na nyadza ipfi ḽa Mukhethwa wa Israele.

Muṋe washu a tshi vhidza mmbi ya Ashuru

²⁵ Nga vhuvhi honoho Muṋe washu o sinyutshela vhathu vhawe, a angaladza tshanḓa tshawe a vha rwa. Thavha dzi khou dzinginyea, zwitumbu zwa vho faho a zwi tsha swiṱwa, zwi laṱwa magondoni zwa nga mathukhwi. Nangwe zwo ralo mbiti dza Muṋe washu a dzi athu fhela, u tshee o angaladza tshanḓa tshawe uri a rwe.

²⁶ Muṋe washu o imisa tshiga tsha u vhidza tshakha dzi re kule; u vha lidzela muludzi uri vha ḓe vha tshi bva migumoni ya ḽifhasi; ngevha vha tshi khou ḓa nga luvhilo, vha tshi tou ṱavhanya!

²⁷ A hu na o netaho, a hu na a khukhulwaho, a vha kumedzi, a vha eḓeli, a hu na wa bannda ḽi rembeḓaho, a hu na luzwa lwa navhula lwo ṱhukhuwaho.

²⁸ Misevhe yavho yo ṱuṱulwa, vhura havho ho dzula ho akhiwa, khwanḓa dza bere dzavho dzo khwaṱha unga ḽihangahwe, milinga ya gariki dzavho i mona unga tshiḓumbumukwe.

²⁹ Vha tshi ṱavha mukosi wa nndwa zwi nga ndau i tshi vhomba yó ponda phukha i tshi i khwikhwidza, hu si na na muthihi ane a nga i dzhiela.

³⁰ Musi wonoyo vha ḓo vhombela Israele, vha unga sa lwanzhe. Muthu á lavhelesa shango u ḓo vhona swiswi ḽo tou nzwii, tshedza tshó milwa nga swiswi.