YESAYA 49 - BIVHILI KHETHWA Mafhungo Madifha

U tshidzwa ha dzitshakha na u vhofhololwa ha Israele (49 – 55) Luimbo lwa vhuvhili lwa Muḓinḓa wa Muṋe washu: Muḓinḓa wa Muṋe washu a no vhonetshela dzitshakha

¹ Thetshelesani, inwi mashango a seli ha lwanzhe! Inwi tshakha dza kule, ipfani! Muṋe washu o nnanga ndi sa athu bebwa, a mmbidzela mushumo wawe ndi tshee muvhilini wa mme anga.

² O ntsireledza nga tshanḓa tshawe, mulomoni wanga a longa maipfi a no runga unga pfumo, a nnyita unga musevhe wo ṱuṱulwaho, a nnzumba mukutuni wawe,

³ a mmbudza a ri, “U muḓinḓa wanga; ndi ḓo sumbedza vhugala hanga nga iwe Israele.”

⁴ Hone nṋe nda ri, “Ndo sokou ḓinetisela zwi si na mushumo, nungo dzanga dza fhedzwa nga zwithu zwa mahandana, zwi si tshithu. Hone ndi fulufhela uri Muṋe washu u ḓo nndwela; ndi ḓo pfufhiwa nga Mudzimu wanga.”

⁵ Hone Muṋe washu o mmbumba ndi tshee muvhilini wa mme anga uri ndi vhe muḓinḓa wawe, ndi humisele Jakopo khae, ndi mu kuvhanganyele vhathu vha Israele. Muṋe washu o nkhulisa; Mudzimu wanga o ḓi vha Ene nungo dzanga.

⁶ Ene o mmbudza a ri, “Mushumo wa u vhuisa matsinde a Jakopo, Vhaisraele vho ponyokaho pfumo wa vha vhuedzedza hayani, ndi muṱuku kha iwe mulanda wanga, ndi kha ḓi ḓo u hwesa muṅwe mushumo muhulu – ndi ḓo u ita tshedza tsha u vhonetshela dzitshakha, uri vhathu vhoṱhe u swika migumoni ya ḽifhasi ndi vha tshidze nga iwe.”

Muṋe washu a tshi dovha u fulufhedzisa u vhofholola Vhaisraele

⁷ Muṋe washu, Ene Mutshidzi, Mukhethwa wa Israele, u amba na vho nyadziwaho, vhane tshakha dza vha nengwa, phuli dza vhavhusi, u ri, “Mahosi a ḓo vhona no vhofhololwa a ni hulisa, vhavhusi vha ni luvha.” Hezwo zwi ḓo itea ngauri Muṋe washu o ni nanga; Ene Mukhethwa wa Israele u a fulufhedzea.

⁸ Muṋe washu u ri, “Ndi ḓo ni fhindula nga tshifhinga tsho teaho; hu tshi swika ḓuvha ḽa u ni tshidza nda ni phalala; ndi ḓo ni londola, nda vhofha mulanga na vhathu vhoṱhe nga inwi, nda ni vhuedzedza shangoni ḽaṋu ḽi si tshee na muthu.

⁹ Ndi ḓo amba na mathubwa nda ri, ‘Ḓiṱutsheleni!’ nda amba na vha re swiswini nda ri, ‘Bvelani tshedzani!’ Vha ḓo nga nngu dzi fulaho zwikwarani tsini ha nḓila;

¹⁰ a vha tsha ḓo farwa nga nḓala kana vha pfa ḓora; a vha tsha ḓo swa nga ḓuvha na biso ḽa phangani; vha ḓo endedzwa nga ane a vha pfela vhuṱungu, a vha isa zwisimani zwa maḓi.

¹¹ Ndi ḓo phula gondo ḽa buḓekanya dzithavha, nda phulela vhathu vhanga nḓila ine vha ḓo tshimbila ngayo.

¹² Vhathu vhanga vha ḓo ḓa vha tshi bva kule, vha tshi bva devhula na vhukovhela, na ngei Aswani thungo ya tshipembe.”

Muṋe washu u funa lushaka lwawe unga mme a tshi funa ṅwana

¹³ Ḽiṱaḓulu nga ḽi fhululedze, ḽifhasi ḽi pembele, inwi dzithavha, imbani ni tou ṱavha mukosi! Muṋe washu u khou fhumudza lushaka lwawe; vhathu vhawe vho tambulaho u ḓo vha pfela vhuṱungu.

¹⁴ Vhathu vha Tsioni vho ri, “Muṋe washu o ri ṱutshela; Muṋe wa zwoṱhe o ri hangwa.”

¹⁵ Ene a fhindula a ri, “Nṋa musadzi a nga hangwa lushie lwawe, a si fune ṅwana we a tou mu beba? Nangwe mme a hangwa ṅwana wawe, Nṋe ndi nga si ni hangwe.

¹⁶ Iwe Jerusalema, ndo ṅwala dzina ḽau nga ngomu ha zwanḓa zwanga; mitsheṱo yau i sokou dzula i maṱoni anga.

¹⁷ Vhane vha ḓo u vusa vho no vha nḓilani; vhe vha u phusukanya vha u ṱangula vha ḓo ṱuwa.

¹⁸ Livha-livha u vhone zwi no khou itea! Vhathu vhau vha khou kuvhangana vha khou vhuya hayani vhoṱhe.” Muṋe washu u ri, “Ndi ana nga vhutshilo hanga, ndi ri: U ḓo ṱongisa vhana vhau unga muselwa o kungela nungu dzawe.

¹⁹ Shangoni ḽau ho vha ho sala matumba fhedzi, ḽo phusukanywa, ḽi si na muthu, hone zwino ḽi vho ḓo vha ḽiṱuku kha vha no khou ḓa u dzula khaḽo; vho u kumbaho vha ḓo sudzuluselwa kule hau.

²⁰ Wo vha u tshi nga musadzi o felwaho nga vhana, hone vhana vhau vha ḓo dovha vha u kolela vha ri, ‘Heḽi shango ndi ḽiṱuku, ri ṱoḓa ḽihulwane ḽine ra ḓo dzula khaḽo!’

²¹ “Ndi hone u tshi ḓo amba nga mbilu wa ri, ‘We a mmbebela vhana vhangafhangafha ndi nnyi? Ndo vha ndi si na vhana, ndí muumba, ndó thathiwa, ndó landulwa, zwino we a alusa avha ndi nnyi? Ndo vha ndo sala ndi ndoṱhe, zwino vhana avha vha bvafhi?’ ”

²² Muṋe wa zwoṱhe Muṋe washu u amba na Jerusalema u ri, “Ndi ḓo vhidza dzitshakha nga tshanḓa, vhathu vhoṱhe vha vhona tshiphuga tshe nda tshi imisa, vha vhuisa vhana vhau hayani vho vha takula, vhasidzana vhó vha hwala mahaḓani.

²³ Mahosi a ḓo u lelela vhana, vhafumakadzi vhavho vha u mamisela vhushie; vha ḓo u gwadamela, zwifhaṱuwo zwavho zwa kwama mavu, vha ṋanzwa buse ḽi re kha ṋayo dzau. Ndi hone u tshi ḓo ḓivha uri ndi Nṋe Yahavee; vha no mpfulufhela a vha nga shoni.”

²⁴ Ni ri, “Muhali a nga dzhielwa tshe a thuba naa? Mathubwa a nga lamukiswa ó lindwa nga a no ofhisa naa?”

²⁵ Muṋe washu a tshi fhindula u ri, “Hezwo zwi ḓo itea – muhali u ḓo zhuvhulelwa mathubwa awe, a ofhisaho a dzhielwa tshe a thuba. Nṋe ndi ḓo lwa na ane a lwa na iwe, nda tshidza vhana vhau.

²⁶ Vhane vha u kandeledza ndi ḓo ita uri vha ḽane, vha kambiwe nga malofha avho unga waini. Ndi hone vhathu vhoṱhe vha tshi ḓo ḓivha uri Nṋe Yahavee ndi Mutshidzi wau, Nṋe Mudzimu Ramaanḓa wa Jakopo ndi a u vhofholola.”