YESAYA 47 - BIVHILI KHETHWA Mafhungo Madifha

U wa ha Babele

¹ Muṋe washu u ri, “Iwe Babele, musidzana wa ndeṅwa, itsa kha khuluṋoni yau u dzule buseni ḽa mavu; iwe musidzana wa Mukhaladia, a u tsha ḓo pfi u mutete, u a tata.

² Dzhia lwala u kuye vhukhopfu, bvula ṅwenda we wa khurumela, ganya musisi wau, ṱangula milenzhe u wele milambo.

³ Ḓiṱangule vhathu vha u vhone wo sala fhedzi; ndi ḓo lifhedza, a thi nga sii na muthihi.”

⁴ Mutshidzi washu ndi Mukhethwa wa Israele; u pfi Muṋe washu Mulangazwoṱhe!

⁵ “Dzula ho tou tshete, u kokovhe u dzhene swiswini, iwe musidzana wa Mukhaladia; a u tsha ḓo pfi mufumakadzi wa mivhuso!

⁶ Ndo vha ndo sinyutshela vhathu vhanga, nda vha fara unga a vha tshee vhanga, nda vha kumedza zwanḓani zwau, iwe wa si vha khathutshele, na vho no vhaho vha maḓuvha wa vha hwesa dzhogo i gogonaho.

⁷ Wo vha u tshi vhona unga u ḓo ḓi dzula u mufumakadzi, hezwi zwithu wa si vhuye wa zwi dzhenisa mbiluni, kana wa elekanya uri zwi ḓo fhela hani.

⁸ “Edzou thetshelesa, iwe mudzia-u-funa-miḓifho, u vhona unga wo tshila, wo tsireledzea, wa ri, ‘Muthu ndi nṋe, a hu tshee na muṅwe a no nga nṋe! A thi nga vhuyi nda vha tshilikadzi kana nda felwa nga vhana!’

⁹ Ndi zwone, kathihi fhedzi, nga ḓuvha ḽithihi, zwoṱhe hezwo vhuvhili hazwo zwi ḓo itea – naho u na manditi mangafhani, wo kungela phamba dzi sa fheli, u ḓo felwa nga munna na vhana, ha si sale na muthihi.

¹⁰ Wo vha u sa ofhi tshithu naho u vhuvhini hau, u tshi ri a u vhonwi nga muthu, mathina vhuṱali hau na nḓivho yau zwo u xedza, wa ri, ‘Muthu ndi nṋe, a hu na muṅwe a no nga nṋe!’

¹¹ U ḓo welwa nga khombo, manditi au a nga si i thivhele; u ḓo welwa nga phanzi i sa pfumelwi; u ḓo tshenuwa wo phusukanywa ú songo humbula!

¹² Fulufhela manditi au-ha na phamba dzau dzoṱhe dze wa ḓinetisa ngadzo u bva hanani hau; khamusi dzi ḓo u farisa; khamusi dzi ḓo shushedza maswina au.

¹³ Wo ḓinetisa nga nyeletshedzo dzoṱhe dze wa dzi wana – ndi zwone, vhabvumbi vhau nga vha bvele khagala, havho vhaḓivhi vha zwa dziṋaledzi vhane vha u bvumbela ṅwedzi nga ṅwedzi, vha u tshidze kha zwine zwa u wela.

¹⁴ “Vha ḓo tou nga mathukhwi; vha ḓo fhiswa nga mulilo; a vha nga koni u ḓitshidza khavhuni dza mulilo; hayo a si masimbe a vhududo, a si mulilo wa u ora.

¹⁵ Zwine zwa ḓo itea ngezwi: havho vhe wa ḓinetisa u tshi shumisana navho, ni tshi vhambadzelana u bva hanani hau, vha ḓo u ṱutshela vhoṱhe, muṅwe na muṅwe a fara yawe nḓila; a hu na ane a ḓo sala a tshi u tshidza!”