YESAYA 46 - BIVHILI KHETHWA Mafhungo Madifha

Vhuporofita vhu no amba dziṅwe tshakha (46 – 48) Midzimu i sa koni u ḓitshidza na Mudzimu a no tshidza vhathu vhawe

¹ Bele na Nebo, inwi midzimu ya Babele! No vha no fanela u hwala lushaka lwaṋu, hone zwino inwi vhaṋe no kulea nungo na khothea! Midzimu ye ya vha i tshi hwalwa nga vhathu zwino yo no hweswa donngi na kholomo; ndi muhwalo u lemelaho zwifuwo.

² Yoṱhe yo kulea nungo ya khothea; na zwifanyiso zwayo a i koni u zwi hwala; na yone iṋe i hwalwa ya iswa vhuthubwani!

³ Muṋe washu u ri, “Nthetsheleseni inwi vha muṱa wa Jakopo, noṱhe inwi no salaho muṱani wa Israele! Ndo ni tika ni tshee muvhilini wa mme aṋu, nda ni hwala tshee na bebwa.

⁴ Mudzimu waṋu ndi Nṋe, ndi ḓo ni hwala na vhuya na vha vha maḓuvha na tshena mmvi. No vhumbwa nga Nṋe, ni ḓo takulwa nga Nṋe; ndi ḓo ni tika nda ni lamukisa.

⁵ “Ni ḓo mpfanyisa na nnyi? Ni nnyeḓanyisa na nnyi? Ndi nnyi a no fana na Nṋe ane nda nga vhambedzwa nae?

⁶ Vhathu vha vula zwipatshi zwavho vha shulula musuku, vha kala siliva nga zwikalo, vha rendela mufuli wa musuku a vha fulela mudzimu, vha konou gwadama vha u luvha.

⁷ Vha u takulela mahaḓani avho vha u hwala, vha u vhea vhudzuloni hawo, wa ima henefho; a u koni u sudzuluwa hune wa vha hone! Naho muthu a u ṱavhela mukosi, a u fhinduli; a u koni u mu tshidza khomboni.

⁸ Edzonu zwi elekanya ni dzivhuluwe! Zwi dzheniseni mbiluni, mashandukwa ndinwi!

⁹ Elelwani zwe nda ita kale: tendani uri ndi Nṋe Mudzimu ndi ndoṱhe, a hu na muṅwe a no nga Nṋe.

¹⁰ U bva mathomoni ndo dzula ndo amba zwine zwa ḓo vha hone; kale-kale zwi sa athu itea ndo dzula ndo zwi bula. Nzudzanyo dzanga dzi nga si kundwe, ndi ḓo ita zwoṱhe zwine nda tama u zwi ita.

¹¹ Ndi khou vhidza munna a no bva vhubvaḓuvha; u ḓo fhufha unga lurwanzhivha a tshi bva shangoni ḽa kule, a khunyeledza zwe nda dzudzanya. Zwe nda amba ndi ḓo zwi ita, zwe nda dzudzanya ndi ḓo zwi bveledza.

¹² “Thetshelesani inwi vhadzia-u-sa-pfa vhane na vhona unga gundo ḽi kule!

¹³ Ḓuvha ḽa gundo ndi khou ḽi sendedza tsini, a ḽiho kule; gundo ḽanga a ḽi nga dzindelwi nga tshithu; ndi ḓo tshidza Tsioni, vhugala hanga nda vhu ṋea Israele.”