YESAYA 45 - BIVHILI KHETHWA Mafhungo Madifha

Khoreshe we Muṋe washu a mu vhumba khosi

¹ Muṋe washu a tshi amba na Khoreshe u ri, “Ndo u vhumba khosi; ndo u fara nga tshanḓa. Ndi ḓo ita uri tshakha dzi u luvhe; u ḓo bvula mahosi maanḓa; hune wa swika u ḓo wana ndo u vulela mahothi; vha nga si u valele khoro dza miḓi.

² Ndi ḓo u ranga phanḓa nda thutha mivhundu, ha tshimbilea, nda pwasha khoro dza musinaseṱhe, nda vunḓekanya mabaphathi adzo a tsimbi.

³ Ndi ḓo u ṋea lupfumo lwo dzumbiwaho swiswini, lwo khokhiwaho tshiphirini. Ndi hone u tshi ḓo ḓivha uri ndi Nṋe Yahavee Mudzimu wa Israele a no u vhidza nga dzina.

⁴ Ndi u vhidza nga dzina, nda u ṋea dzina ḽihulu, naho u sa nnḓivhi, ndi tshi itela Jakopo mulanda wanga, Israele we nda mu nanga.

⁵ Ndi Nṋe Yahavee, a hu na muṅwe, a hu na muṅwe mudzimu arali e si Nṋe; ndi ḓo u ṋea nungo nangwe u sa nnḓivhi.

⁶ Hezwo zwi ḓo itea uri u bva vhubvaḓuvha u swika hune ḽa kovhela muṅwe na muṅwe a zwi ḓivhe uri a hu na muṅwe e si Nṋe; ndi Nṋe Yahavee, a hu na muṅwe.

⁷ Ndi vhumba tshedza nda sika swiswi; ndi ḓisa mulalo, nda ḓisa khombo – Nṋe Yahavee ndi ita zwoṱhe hezwo zwithu.

⁸ Iwe lutombo, nisa gundo ḽi tshi bva makoleni, ḽi tou na unga mvula; ḽifhasi nga ḽi vulee hu mele u tshidzwa, zwi aluwe zwoṱhe na u fulufhedzea; ndi Nṋe Yahavee o zwi sikaho.”

Muṋe wa tsiko ha sengiswi nga muthu

⁹ A no sengisa Muvhumbi wawe u ḓo zwi vhona! Hufha a tshi tou vha khali i no nga dziṅwe khali. Kani vumba ḽi nga vhudzisa Muvhumbi waḽo ḽa ri, “U khou itani?” khali yau ya gungula ya ri, “A u koni u vhumba!”?

¹⁰ U ḓo zwi vhona ane a vhudzisa khotsi awe a ri, “Wo mmbebelani?” kana a vhudzisa mme awe a ri, “Wo beba mini?”

¹¹ Muṋe washu Mukhethwa wa Israele we a vha vhumba, u ri, “Kani ni khou ntsengisela zwine nda ḓo ita vhana vhanga? Ni khou mpfunza zwine nda fanela u ita nga vhe nda vha vhumba nga zwanḓa zwanga?

¹² Ndi Nṋe ndo vhumbaho ḽifhasi, nda sika vhathu vha dzula khaḽo, nda ṱharamudza lutombo nga zwanḓa zwanga, nda dzudzanya ṋaledzi.

¹³ Ndi Nṋe ndo rithaho Khoreshe uri a shume zwine nda funa; ndi ḓo onyolosa nḓila dzawe dzoṱhe. U ḓo vusa muḓi wanga Jerusalema, a vhofholola vhathu vhanga vho thubiwaho a sa ṱoḓi tshipfumelo kana tshanḓanguvhoni.” Ho amba Muṋe washu Mulangazwoṱhe.

Muṋe washu u farisa vhathu vhawe

¹⁴ Muṋe washu u ri, “Zwe Vhaegipita vha zwi bvela biko, na lupfumo lwa Kushu, zwi ḓo vha zwaṋu; vhanna vhalapfu vha Seba vha ḓo vha phuli dzaṋu; vha ḓo ni tevhela vho vhoxwa nga dzigeḓane; vha ḓo gwadama vha ni luvhelela vha ri, ‘Vhukuma Mudzimu u na inwi, ndi Ene Mudzimu e eṱhe, a hu na muṅwe!

¹⁵ Ngoho u Mudzimu ane a ḓidzumba; Iwe Mudzimu wa Israele, ndi Iwe Mutshidzi!

¹⁶ Vhoṱhe vha no vhumba midzimu ya zwifanyiso vha ḓo shona vha tou niwa nga ṱhoni; vha ḓo nyadziwa.

¹⁷ Hone Vhaisraele vho tshidzwa nga Yahavee; gundo ḽavho ndi ḽa lini na lini; vhathu vhawe vha nga si vhuye vha shona kana vha nyadziwa, lini na lini.’ ”

Muṋe washu a tshi vhidza tshakha dzoṱhe

¹⁸ Muṋe washu o sika ḽiṱaḓulu, ndi Ene a re Mudzimu! O ita ḽifhasi a ḽi vhumba a ḽi khwaṱhisa. Ho ngo sikela uri ḽi dzule ḽi soga ḽi si na vhathu, o ḽi vhumbela uri vhathu vha dzule khaḽo. Ndi Ene ane a ri, “Ndi Nṋe Yahavee, a hu na muṅwe mudzimu.

¹⁹ Ndi tshi amba a tho ngo ita tshidzumbe, ndo amba khagala; a tho ngo amba swiswini, ndo amba tshedzani. A tho ngo vhudza vhaḓuhulu vha Jakopo uri vha nṱoḓe lwa mahandana. Ndi Nṋe Yahavee, ndi amba ngoho, ndi ḓivhadza zwi re zwone.

²⁰ “Kuvhanganani inwi tshakha dzoṱhe, noṱhe no salaho u fa mivhuso i tshi wa, iḓani tsengoni! Vhathu vha ṱana midzimu yavho ya zwifanyiso zwa thanda; vha rabela midzimu i sa koni u vha tshidza – havho vhathu a vha vhui vha ḓivha tshithu!

²¹ Iḓani ni senge mulandu waṋu khoroni; vhapomokwa nga vha langane! Ndi nnyi we a dzula o amba zwe zwa itea, a dzula o zwi ḓivhadza kale-kale? A si Nṋe Yahavee naa? A hu na muṅwe mudzimu arali a si Nṋe; Mudzimu a fulufhedzeaho a no tshidza vhathu vhawe ndi Nṋe fhedzi.

²² “Vhuyani ha Nṋe zwino ni tshidzwe, inwi tshakha dzoṱhe dza shango nga he ḽa guma! Ndi Nṋe Mudzimu a re hone ndi ndoṱhe.

²³ Zwine nda fulufhedzisa ndi ngoho, a zwi nga shanduki, ndi ana nga Nṋe muṋe ndi ri: Magona oṱhe a ḓo gwadamela Nṋe. Ndimi dzoṱhe dza ana dza ri,

²⁴ ‘Gundo na nungo zwi bva kha Yahavee e eṱhe!’ ” Vhoṱhe vhane vha vhenga Muṋe washu vha ḓo shona vha ḓa khae;

²⁵ hone Muṋe washu a tshi haṱula u ḓo ima na vhaḓuhulu vhoṱhe vha Israele, vhone vha mu khoḓa.