YESAYA 43 - BIVHILI KHETHWA Mafhungo Madifha

Muṋe washu a tshi vhofholola vhathu vhawe vhuthubwani

¹ Iwe Jakopo, Muṋe washu we a u sika u khou amba; iwe Israele, Muvhumbi wau u ri, “U songo ofha, ndi ḓo u lamukisa; ndo u vhidza nga dzina, u wanga!

² U tshi fhira vhukati ha maḓi manzhi ndi ḓo vha ndi na iwe; u tshi wela milambo i nga si u kumbe; u tshi fhira vhukati ha mulilo u nga si swe; khavhu dza mulilo dzi nga si u fhise.

³ Hufha ndi Yahavee Mudzimu wau, Mukhethwa wa Israele Mutshidzi wau. Ndi ḓo kumedza Egipita ḽa vha tshipfumelo, iwe wa vhofhololwa; vhuimoni hau hu ḓo dzhena Kushu na Seba, iwe wa bva.

⁴ Ndi ḓo kumedza dzitshakha uri iwe u tshidzwe, ngauri ndi tshi u sedza ndi vhona u wa mutengo muhulu, ndi a u hulisa, ndi a u funa.

⁵ “U songo ofha, ndi na iwe; ndi ḓo kuvhanganya vhana vhau vhubvaḓuvha na vhukovhela nda vha vhuisa hayani.

⁶ Ndi ḓo vhudza devhula nda ri, ‘Vha litshe vha ṱuwe!’ nda vhudza tshipembe nda ri, ‘Vha tshi ṱuwa u songo vha dzivhisa! Litsha vhana vhanga vha humele hayani vha tshi bva mashangoni a kule, na vhananyana vhanga vha tshi bva migumoni ya ḽifhasi –

⁷ vhoṱhe vhane vha vhidzwa nga dzina ḽanga, vhe nda vha sika, nda vha vhumba, ndi tshi itela uri vha nkhulise!’ ”

Israele, ṱhanzi i si na nzhele

⁸ Muṋe washu u ri, “Ḓisani vhathu vhanga khoroni; vha na maṱo, hone vho pofula; vha na nḓevhe, hone vho dzinga!

⁹ Tshakha dzoṱhe nga dzi kuvhangane, vhathu vhoṱhe vha ḓe tsengoni. Ndi ufhio wa midzimu yavho we a dzula o amba zwine zwa khou itea zwino, kana we a dzula o bvumba zwithu zwa bvelela? Midzimu heyo nga i ḓe na ṱhanzi dzayo u sumba uri i na ngoho, uri vhaṅwe vha zwi pfe vha tende.”

¹⁰ Muṋe washu u ri, “Dzanga ṱhanzi ndi inwi Vhaisraele, inwi vhalanda vhanga vhe nda vha nanga uri ni nnḓivhe, ni mpfulufhele, ni ṱalukanye uri Mudzimu ndi Nṋe ndi ndoṱhe; a hu na muṅwe mudzimu we a vhumbwa Nṋe ndi sa athu vha hone; a hu tsha ḓo dovha ha vha na muṅwe.

¹¹ “Ndi Nṋe Yahavee ndi ndoṱhe, a hu na muṅwe mutshidzi arali e si Nṋe.

¹² Ndi Nṋe we nda dzula ndo amba uri ndi ḓo ni tshidza, nda ḓa nda zwi ita; a hu na mudzimu usili we a vhuya a zwi ita hezwo – inwi ni ṱhanzi dzanga; Mudzimu ndi Nṋe,

¹³ ndi ḓo ḓi dzula ndi ane nda vha Ene. A hu na ane a nga ponyokisa muthu tshanḓani tshanga; a hu na ane a nga itulula zwe nda ita.”

Zwiswa zwine Muṋe washu a ḓo ita: u phusukanywa ha Babele na u vhuya ha vhathu vhawe

¹⁴ Muṋe washu ane a ni tshidza, Mukhethwa wa Israele, u ri, “Ndi ḓo rambela Babele mmbi nda ni tshidza, nda ita uri Vhakhaladia vhoṱhe vha shavhele swikepeni zwine vha zwi ṱongisa.

¹⁵ Ndi Nṋe Yahavee, Mudzimu waṋu mukhethwa, Khosi yaṋu, Musiki wa Israele.”

¹⁶ Kale-kale o phula nḓila i buḓekanyaho lwanzhe, gondo ḽa maḓini mahulu.

¹⁷ O kokodza mmbi ya maanḓa ya Vhaegipita, na gariki dza nndwa na dzibere, a vha rambaladza henefho vha si tsha vuwa, a vha vhudzula a vha dzima unga tshitaitai!

¹⁸ Hone zwino u ri, “Ni songo tsha elelwa zwa kale; zwe zwa itwa misi iḽa ni songo tsha zwi humbula.

¹⁹ Vhonani, zwino ndi khou ita zwiswa; zwo no ḓi itea, a ni zwi vhoni? Ndi khou phula nḓila sogani, phangani ha ela milambo.

²⁰ Na phukha dza ḓaka, phunguhwe na mphwe, dzi ḓo nkhulisa, ngauri ndi phula maḓi sogani, milambo ya ela phangani, uri vhathu vhanga vhe nda vha nanga vha dzimule ḓora.

²¹ Ndi lushaka lwe nda ḓivhumbela lwone; nyimbo dzavho dzi ḓo ḓivhadza zwe nda ita.”

Muṋe washu a tshi fhindula vhathu vhawe vha gungulaho

²² Muṋe washu u ri, “Iwe Jakopo, u tshi rabela wo vha u sa khou rabela Nṋe; iwe Israele, u tshi ḓinetisa wo vha u sa khou ḓinetisela Nṋe;

²³ u tshi ṋekedza zwiṱhavhelo zwa dzinngu dzo fhiswaho, ho vha hu si u hulisa Nṋe; u tshi ṋekedza nduvho, wa dubisa zwioro u tshi tou kakarika, a si Nṋe ndo u lemedzaho;

²⁴ u tshi renga zwinukheleli zwa mutengo muhulu, wa ṋekedza mapfura a zwiṱhavhelo, ho vha hu si u fusha Nṋe, tshau wo tou nndemedza nga vhutshinyi hau, wa nndina nga zwivhi zwau.

²⁵ Ndi Nṋe ane nda ṱolou u hangwela u tshi ntshandukela, nda si tsha elelwa vhutshinyi hau, ndi tshi itela zwine nda vha zwone.

²⁶ “Hwelela mulandu! Nga ri ye tsengoni! Ḓisengele u sumbedze uri a wo ngo khakha!

²⁷ Hufha na makhulukuku wau wa u thoma o tshinya; na vhaimeleli vhau vho ntshandukela;

²⁸ ndi zwe nda nyadzisa vhotshifhe vha nnḓu khethwa, Jakopo nda mu ḽisa nga pfumo, Israele nda mu nyadzisa.”