YESAYA 42 - BIVHILI KHETHWA Mafhungo Madifha

Luimbo lwa u thoma lwa Muḓinḓa wa Muṋe washu: Muḓinḓa wa Muṋe washu a no vhofholola vhathu a ladza shango

¹ Muṋe washu u ri, “Muḓinḓa wanga ngoyu; ndi a mu tika, ndo mu nanga, ndi a mu takalela. Ndo mu ḓadza Muya wanga; u ḓo funza dzitshakha mulayo wanga.

² Ha nga ṱavhi mukosi, ha nga takusi ipfi, ipfi ḽawe a ḽi nga pfali magondoni;

³ luṱanga lwo piḓeaho ha nga lu vunḓi, luvhone lu no khou taidza ha nga lu dzimi; u ḓo ḓivhadza zwone-zwone zwine nda zwi funa.

⁴ Ha nga fulufhuwi, ha nga kulei nungo; u ḓo tea mulayo wanga fhano fhasi; mashango a kule o lindela pfunzo yawe.”

⁵ Mudzimu Muṋe washu we a sika lutombo a lu ṱharamudza, a adza shango na zwoṱhe zwi re khaḽo, vhathu vhaḽo a vha ṋea mufemo, vha tshimbilaho khaḽo a vha ṋea vhutshilo,

⁶ u ri, “Ndi Nṋe Yahavee, a thi pfuki mulanga wanga, ndi zwe nda u vhidza; ndi ḓo u fara nga tshanḓa, nda u londola, nda vhofha mulanga na vhathu vhanga nga iwe, nda u ita tshedza tsha dzitshakha,

⁷ wa swingulusa maṱo o swingaho, wa vhofholola vho farwaho, vho dzulaho swiswini wa vha bvisa dzhele.

⁸ “Ndi pfi Yahavee, ndi ḽone dzina ḽanga! A thi kovhekani vhugala hanga na muṅwe mudzimu, thendo yanga a thi i kovhekani na zwifanyiso.

⁹ Zwe nda dzula ndo amba zwo itea, zwino ndi ḓo ni vhudza zwithu zwiswa na musi zwi sa athu bvelela.”

Shango ḽoṱhe ḽi tshi fhululedza gundo ḽa Mudzimu

¹⁰ Imbelani Muṋe washu luimbo luswa, shango nga he ḽa guma nga ḽi mu rende nga nyimbo; inwi ni talaho lwanzheni, na zwoṱhe zwi re khalwo, na mashango a kule-kule, na vha dzulaho khao, mu rendeni!

¹¹ Nga a rendwe nga phanga na miḓi yayo, na nga vhathu vha Kedara! Vha dzulaho muḓini wa Sela nga vha fhululedze, nga vha ṱavhe mukosi vhe miṱumbani ya dzithavha!

¹² Nga vha rende vhugala ha Muṋe washu, vha ḓivhadze thendo yawe mashangoni a kule!

¹³ Muṋe washu u khou bva pfumo unga munna wa maanḓa; mbiti dzawe dzo vuwa unga dza muhali; u ṱavha mukosi wa nndwa, maswina u a sumbedza maanḓa awe!

Muṋe washu u ḓo lamulela vhathu vhawe

¹⁴ Mudzimu u ri, “Ndi kale ndo fhumula ndó tsika mbiti dzanga, nda si fhindule vhathu vhanga, hone zwino a thi tsha ḓo konḓelela, ndi ḓo nga musadzi a tshi ṱoḓou vhofholowa – ndi ḓo ṱavha mukosi, nda gomela, nda fhihamelwa.

¹⁵ Ndi ḓo omisa dzithavha na mivhundu, hatsi na miri zwa puta; ndi ḓo xisa milambo, maisha a oma;

¹⁶ ndi ḓo endedza vhathu vhanga vha mabofu nḓilani ine vha sa i ḓivhe nda vha tshimbidza gondoni ḽe vha si ḽi ḓowele, nda vha shandukisela swiswi ḽa vha tshedza, hu sa tshimbilei nda ita uri hu tshimbilee. Hezwo ndi ḓo zwi ita, a thi nga litshi u zwi ita.

¹⁷ Hone vhoṱhe vhane vha fulufhela zwitungulo, vhane vha tshi amba zwifanyiso vha ri, ‘Ni midzimu yashu,’ vha ḓo huma vho shona.”

Vhaisraele vho pofula, vho dzinga!

¹⁸ Muṋe washu u ri, “Thetshelesani, inwi madzinganḓevhe! Inwi mabofu, sedzani ni vhone!

¹⁹ Ndi nnyi o pofulaho unga mulanda wanga Israele? Ndi nnyi o dzingaho unga muḓinḓa wanga we nda mu ruma? Ndi nnyi o pofulaho unga onoyo we a rwelwa vhutshinyi hawe? Ndi nnyi o pofulaho unga mulanda wa Yahavee?

²⁰ No vhona zwithu zwinzhi na si zwi londe; no pfa mafhungo na si a dzhiele nzhele.”

²¹ Naho zwo ralo Muṋe washu u funa u tshidza, ndi zwe a ṋea vhathu vhawe pfunzo khulu i huliseaho.

²² Hone zwino vhathu vhawe vho ṱangulwa vha sala fhedzi; vho khakhedzwa mapakoni vhoṱhe, vho pangiwa dzhele, vho ṱangulwa ha si vhe na a vha lamukisaho, vho dzhielwa ha si vhe na a no ri, “Humisani!”

²³ Hone ndi nnyi waṋu a no ḓo zwi thetshelesa hezwi, a zwi dzhiela nzhele a zwi elelwa misi i ḓaho?

²⁴ We a kumedza Jakopo vhaṱanguli ndi nnyi? Ndi nnyi we a ita uri Israele a sale a si na tshithu? A si Muṋe washu Ene muṋe we ra mu khakhela naa? A ro ngo tshimbila nḓilani yawe, a ro ngo thetshelesa pfunzo.

²⁵ Ndi zwe a ita uri ri pfe u fuḓa ha mbiti dzawe na u vhavha ha nndwa. Mbiti dzawe dzo ri fhisa thungo dzoṱhe unga mulilo, hone ra si zwi ṱalukanye; dzo ri fhisa re lore, hone ra si zwi londe.