YESAYA 41 - BIVHILI KHETHWA Mafhungo Madifha

Mudzimu wa Israele a tshi sengisa dzitshakha

¹ Mudzimu u ri, “Inwi mashango a kule-kule, ni tshete ni nthetshelese; inwi dzitshakha, ḓilugiseni, sendelani ni ḓisengele; nga ri ṱangane tsengoni!

² Uḽa a no bva vhubvaḓuvha, ane hune a kanda a kunda, o rithwa nga nnyi uri a ḓe? Ndi nnyi we a mu kumedza dzitshakha, a mu tekulela mahosi, a vha runga nga pfumo vha vha buse, musevhe wawe wa vha balanganya unga mathukhwi a tshi hwalwa nga muya.

³ O vha pandamedza a fhira a sa thivhelwi nga tshithu, e na luvhilo, ṋayo dzawe dzi sa kwami fhasi.

⁴ We a ita uri izwo zwi vhe hone ndi nnyi? A si Ene we a dzula o dzudzanya zwine zwa itea naa? Nṋe Yahavee ndo vha ndi hone mathomoni, zwi tshi guma ndi ḓo ḓi vha e Nṋe Muṋe wazwo.”

Dzitshakha dzi tshi ṱoḓa vhushavhelo

⁵ “Mashango a kule-kule o vhona zwe nda ita, a ofha, migumo ya ḽifhasi ya tetemela. Vhathu vho kuvhangana

⁶ vha farisana, vha vhudzana vha ri, ‘Ni songo kulea nungo.’

⁷ Muvhaḓi u ṱuṱuwedza mufuli wa musuku, ane a kanḓa nga nundo u ṱuṱuwedza a no vhanda baphathi; vha amba tshe vha tshi fula vha ri, ‘Ndi tshavhuḓi!’ Vha tshi paṱekanya nga zwibigiri uri tshi si tseke.”

Muṋe washu u ima na lushaka lwe a lu nanga

⁸ “Hone iwe Israele mulanda wanga, vhana vha Jakopo vhe nda vha nanga, inwi vhaḓuhulu vha Abrahamu khonani yanga,

⁹ ndo ni endedza ni tshi bva migumoni ya ḽifhasi; ndo ni vhidza ni tshi bva khuḓani dzaḽo dza kule-kule, nda ri, ‘U mulanda wanga,’ a tho ngo ni landula, ndo ni nanga.

¹⁰ Ni songo ofha, ndi na inwi; ndi Mudzimu waṋu, ni songo ḽa mbilu; ndi ḓo ni ṋea nungo nda ni farisa, ndi ḓo ni tika nga tshanḓa tshanga tsha maanḓa.

¹¹ Vho ni sinyutshelaho vha ḓo shona vha tou niwa nga ṱhoni; vhane vha lwa na inwi vha ḓo lovha vha sala vha si tshithu;

¹² vhane vha ni vhenga ni ḓo vha ṱoḓa na si tsha vha wana; vhane vha ni vutshela vha ḓo nga a vhaho.

¹³ Nṋe ndi Yahavee Mudzimu waṋu, ndo ni fara nga tshanḓa; ndi ri, ‘Ni songo ofha, ndi a ni farisa!’ ”

¹⁴ Muṋe washu u ri, “Iwe Jakopo, naho u tshi shaya nungo sa tshivhungu, inwi Vhaisraele, naho ni vhaṱuku, ni songo ofha tshithu, Nṋe muṋe ndi ḓo ni farisa; Mulamuleli waṋu ndi Mukhethwa wa Israele.

¹⁵ Ndi ni ita tshifhulo tshiswa tsha maṋo a vhuhali; ni ḓo fhula dzithavha na dzi fhefhera, mivhundu na i kuyekanya ya vha mathukhwi;

¹⁶ ni ḓo i posa muyani, muya wa i hwala, ya balanganywa nga maḓumbu. Ndi hone ni tshi do pembela ni tshi humbula Nṋe Yahavee, na zuwa Mukhethwa wa Israele.”

Muṋe washu u endedza lushaka lwawe lu tshi fhira phangani

¹⁷ “Musi vhashai na vhaheḓana vha tshi lila maḓi a si vhe hone, mikulo yavho ya tou oma nga ḓora, ndi hone Nṋe Yahavee ndi tshi ḓo fhindula thabelo yavho, Nṋe Mudzimu wa Israele ndi nga si vha laṱedze.

¹⁸ Ndi ḓo elisa milambo makwarani, nda phula zwisima magovhani; phanga ndi ḓo i shandula madzivha a maḓi, shango ḽo omaho ḽa ḓala zwisima.

¹⁹ Phangani ndi ḓo medza miṱulume na miunga na miṱangule na miṱwari, sogani ndi ḓo sima miṱaululo na miṱu na mipaini.

²⁰ Ndi hone vhathu vha tshi ḓo zwi vhona vha zwi ḓivha, vha elekanya vha ṱalukanya uri zwo itwa nga tshanḓa tsha Yahavee, zwo sikwa nga Mukhethwa wa Israele.”

Muṋe washu a tshi ita khaedu na midzimu ya dzitshakha

²¹ Muṋe washu Khosi ya Jakopo u ri, “Inwi midzimu ya dzitshakha, ḓisengeleni, bvisani vhuṱanzi.

²² Edzonu ri vhudza zwe na vhuya na ita kale ri kone u vha na nzhele nazwo; zwa kunda, ri vhudzeni zwine na kha ḓi ḓo ita, uri zwi tshi bvelela ri kone u tenda.

²³ Edzonu ri bvumbela tshithihi zwatsho tsha zwi ḓaho, tshivhi kana tshivhuya, ndi hone ri tshi ḓo ḓivha uri ni midzimu, zwa ri somela ra ni ofha.

²⁴ Hone inwi a ni tshithu, a ni na tshine na kona, na vhane vha ni luvha vha a nengisa.

²⁵ “Ndo ritha munna a bvaho devhula uri a ḓe, ndo mu vhidzela mushumo wanga a tshi bva vhubvaḓuvha; u ḓo kandekanya vhavhusi unga matope, unga muvhumbi a tshi suka vumba.

²⁶ Ndi nnyi waṋu o bvumbaho uri zwo raliho zwi ḓo bvelela? Ro vha ri tshi ḓo kona u amba ra ri, ‘No vha ni tshi khou ita zwone.’ Hone a hu na na muthihi waṋu we a vhuya a amba tshithu, a hu na we a zwi bvumba, a hu na we a pfa ni tshi amba tshithu.

²⁷ Ndi Nṋe ndo thomaho u vhudza Tsioni haya mafhungo; ndi ruma muḓinḓa a isa mafhungo maḓifha Jerusalema.

²⁸ Ndi tshi sedza midzimu a hu na we a vha e na tshine a amba; ho vha hu si na na ane a fhindula zwine nda vha vhudzisa.

²⁹ Midzimu yoṱhe heyo a i na mushumo, a i koni u ita tshithu, zwifanyiso zwayo a si tshithu, ndi mahandana.”