YESAYA 40 - BIVHILI KHETHWA Mafhungo Madifha

Maipfi a u khuthadza mathubwa Babele (40 – 55) Vhaisraele vha ḓo vhofhololwa vhuthubwani

¹ Mudzimu waṋu u ri, “Fhumudzani vhathu vhanga, vha fhumudzeni!

² Khuthadzani vhathu vha Jerusalema, vha vhudzeni uri vho tambulesa, zwino vho hangwelwa vhutshinyi havho; ndo vha lifhisa milandu yavho yoṱhe kavhili.”

³ Ipfi ḽi khou huwelela, ḽi ri, “Lugiselani Muṋe washu nḓila masogani! Phulelani Mudzimu washu gondo phangani!

⁴ Magovha oṱhe nga a ḓadzwe! Thuthani thavha dzoṱhe na zwivhanga, hu linganele. Shango ḽi sa tshimbilei ḽi vho ḓo tshimbilea, nngwa dzi vho ḓo vha midavhi.

⁵ Ndi hone hu tshi ḓo dzumbululwa vhugala ha Muṋe washu; ḽifhasi ḽoṱhe ḽi ḓo vhu vhona. Ho amba Muṋe washu Ene muṋe!”

⁶ Ndo pfa ipfi ḽi tshi ri, “Ḓivhadza vhathu!” Nṋe nda ri, “Ndi ḓo vha ḓivhadza afhio?” Ha pfi, “Ḓivhadza uri vhathu vhoṱhe vha nga hatsi, maanḓa avho a nga maluvha a ḓaka;

⁷ hatsi vhu a puta, maluvha a haluluwa musi muya wa Muṋe washu u tshi zwi vhudzula. Vhukuma vhathu vha nga hatsi.

⁸ Ee, hatsi vhu a puta, maluvha a haluluwa, hone ipfi ḽa Mudzimu washu ḽi ima ḽo khwaṱha lini na lini.”

Fhungo ḽi takadzaho

⁹ Iwe Tsioni u no ḓisa mafhungo a takadzaho, gonya thavha ndapfu! Iwe Jerusalema muḓivhadzi wa mafhungo maḓifha, ṱavha mukosi, u songo ofha; vhudza miḓi ya Juda u ri, “Mudzimu waṋu ngoyu!

¹⁰ Vhonani, Muṋe wa zwoṱhe Muṋe washu ndi Ene Ramaanḓa; u khou ḓa u vhusa nga tshanḓa tshawe tsha maanḓa. Zwe a zwi shumela o zwi wana, ndi vhathu vhawe vhe a vha lamukisa kha maswina.

¹¹ U khou vha londola unga mulisa a tshi lisa sambi ḽawe: u takula ngwana nga zwanḓa, a dzi kuvhatedza khanani yawe, vhomme adzo a vha endedza zwavhuḓi.”

Musiki wa shango u langa dzitshakha

¹² We a ela maḓi a lwanzhe nga tshanḓa tshawe ndi nnyi? We a ela ḽiṱaḓulu nga minwe ndi nnyi? We a ela mavu a ḽifhasi nga mvuvhelo, a kala dzithavha nga tshikalo, a dovha a kala na mivhundu, ndi nnyi?

¹³ Ndi nnyi ane a nga ṱalukanya mihumbulo ya Muṋe washu, kana a vha mueletshedzi wawe?

¹⁴ Mudzimu o eletshedzana na nnyi uri a wane ṱhalukanyo, a funzwe ngae nḓila i re yone? U hone we a ṋea Mudzimu nḓivho na ṱhalukanyo naa?

¹⁵ Mudzimu a tshi sedza dzitshakha u vhona dzi tshi tou nga shotha ḽa maḓi mvuvheloni, dzi nga kubuse mvuvheloni; zwiṱangadzime u zwi doba unga thorwana ya muṱavha.

¹⁶ Phukha dzoṱhe dzi re maṱakani a Libanoni a dzo ngo eḓana tshiṱhavhelo tsha u ṋekedza Muṋe washu, miri yao a yo ngo eḓana u honza mulilo watsho.

¹⁷ Ene u vhona tshakha dzoṱhe dzi si tshithu, dzi si na mushumo, dza nga a dziho.

¹⁸ Zwino Mudzimu ni nga mu vhambedza na nnyi? Ni ḓo ri u fana na mini?

¹⁹ Hufha zwifanyiso zwa midzimu zwi tshi fulwa nga vhatsila zwa fhomiwa nga musuku, zwa itelwa geḓane dza siliva.

²⁰ Mushai a sa koni u ṋekedza nduvho yeneyo u nanga muri u sa sini, a ṱoḓa muvhaḓi a konaho, a mu vhaḓela tshifanyiso tshine tsha ḓo ima tsho khwaṱha.

²¹ Mathina a ni zwi ḓivhi? A ni athu zwi pfa? A ni athu vhudzwa u bva henengei mathomoni? A ni athu ṱalukanya uri shango ḽo tewa hani?

²² Mudzimu u dzula kha khuluṋoni nṱha ha tshitendeledzi tsha ḽifhasi; vhathu vhaḽo vho ṱukufhala unga nzie; o ṱharamudza lutombo unga pesa ḽa ṅwenda, a lu akha unga dennde ya u dzula ngomu.

²³ U wisa vhavhusi vha sa tsha vha tshithu, vhahaṱuli vha shango vha nga a vha tsheeho.

²⁴ Vha nga mutomba une wa ri ú kha ḓi bva u runga, ú kha ḓi bva u mela, u sa athu ṱoka midzi, Muṋe washu a u vhudzula, wa puta, wa hwalwa nga tshiḓumbumukwe unga mathukhwi.

²⁵ Ndi zwine Mudzimu mukhethwa a ri, “Zwino ni ḓo mpfanyisa na nnyi? Ane a eḓana na Nṋe ndi nnyi?”

²⁶ Sedzani lutombo – ndi nnyi o vhumbaho zwoṱhe hezwi? Ndi Ene we a vhekanya ṋaledzi nga nthihi nga nthihi unga mmbi, nga maanḓa awe mahulu na nungo dzi sa konadzei, a dzi vhidza nga madzina; a hu na na nthihi i siho.

Maanḓa a u konḓelela a bva ha Mudzimu

²⁷ Inwi Vhaisraele vhana vha Jakopo, ndi mini ni tshi gungula na ri, “Muṋe washu ha ḓivhi zwine zwa ri dina, Mudzimu washu ha zwi londi musi ri tshi sokou tambudzwa.”

²⁸ Mathina a ni zwi ḓivhi? A ni athu zwi pfa naa? Muṋe washu ndi Mudzimu wa lini na lini, o sika shango u swika he ḽa guma. Ha neti, ha kulei nungo; a hu na ane a ṱalukanya mihumbulo yawe.

²⁹ U khwaṱhisa vho netaho, vha si na nungo a vha ṋea maanḓa mahulu.

³⁰ Vhaswa na vhone vha a neta vha fhelelwa nga nungo, na vhaṱhannga vha a khukhulwa vha wa,

³¹ hone vhe vha lavhelela Muṋe washu vha wana nungo ntswa, vha fhufha nga phapha dzi no nga dza goni, vha gidima vha sa neti, vha tshimbila vha sa fhelelwi nga nungo.