YESAYA 36 - BIVHILI KHETHWA Mafhungo Madifha

Mafhungo a histori (2 Mah. 18:13 – 19:37; 2 Koron. 32:1-19 ) Sanakheribi a tshi govhela Jerusalema

¹ Nga ṅwaha wa 14 wa muvhuso wa khosi Hiskia, Sanakheribi khosi ya Ashuru o ḓa a dia miḓi yoṱhe ya Juda yo tangwaho nga mitsheṱo, a i thuba.

² Ndi hone a tshi ruma mulangammbi wawe muhulu, a takuwa Lakhishi e na mmbi khulu, a livha Jerusalema u yo dia khosi Hiskia. Uyo mulangammbi a tshi swika, a ima tsini ha mugero une wa bva ishani ḽa nṱha, henefho hu no shuma vhaluki vha masila.

³ Ha bva Majuda mararu vha ḓa vha mu ṱanganedza: ndi mukoma wa pfamo ya musanda, Eliakimu ṅwana wa Hilikia, na Shebina muṅwaleli wa khosi, na tshanḓa tsha khosi, Jua ṅwana wa Asafu.

⁴ Mulangammbi wa Ashuru a vha vhudza a ri, “Vhudzani Hiskia ni ri, ‘Khosi khulu, khosi ya Ashuru i ri: Tshe wa ḓitika ngatsho ndi mini?

⁵ U vhona unga u sokou amba nga mulomo ndi maano a nndwa na vhuhali naa? U ḓitika nga nnyi u tshi ntshandukela?

⁶ Wo lavhelela u fariswa nga Egipita, hone hezwo zwi nga muthu a tshi gogoḓela nga luṱanga; lu ḓo vunḓea lwa mu runga tshanḓa. Ndi zwine Farao khosi ya Egipita a vha zwone arali muthu a tshi ḓitika ngae.

⁷ “ ‘Arali wa ri ni ḓitika nga Yahavee Mudzimu waṋu, ndi ri hufha wo thutha aḽiṱari dzawe na hoṱhe he na vha ni tshi mu ṱhavhela zwiṱhavhelo, wa vhudza vha Juda na vha Jerusalema uri vha luvhe aḽiṱarini ya Jerusalema fhedzi.’

⁸ Iḓa-ha u pikisane na muṋe wanga khosi ya Ashuru: ndi ḓo ni fha zwigidi zwivhili zwa dzibere arali ni na vhanameli vhadzo.

⁹ Izwo-ha u vhona unga u nga imedzana na muvhusi muthihi zwawe, ndi amba nṋe ndi re muṅwe wa magota maṱuku a muṋe wanga naa? U sokou ḓitika nga Vhaegipita uri vha ḓo ni fha gariki dza nndwa na dzibere.

¹⁰ Kani-ha u vhona unga ndo ḓa u dia shango ḽaṋu nda ḽi lozwa ndi sa fariswi nga Yahavee? Ndi Ene Yahavee we a nthuma uri ndi ḓe ndi ḽi die ndi ḽi lozwe.”

¹¹ Ndi hone Eliakimu na Shebina na Jua vha tshi fhindula uyo mulangammbi vha ri, “Kha vha ambe na riṋe nga Tshiaramu, ri a tshi pfa; vha songo amba Tshiheberu; vhathu vha re nṱha ha luvhondo vha khou thetshelesa!”

¹² Ene a fhindula a ri, “Ni vhona unga inwi na khosi yaṋu ndi inwi ni noṱhe vhe muṋe wanga a nthuma khavho u amba aya mafhungo? Ho ngo nthumela uri na vho dzulaho nṱha ha luvhondo ndi ambe navho naa? Na vhone vha ḓo ḽa vhutoko havho vha nwa muṱambuluwo wavho unga inwi.”

¹³ Ndi hone uḽa mulangammbi a tshi sendela, a huwelela nga Tshiheberu a ri, “Thetshelesani zwine khosi khulu khosi ya Ashuru ya ni vhudza!

¹⁴ U ri ni songo fhurwa nga Hiskia; Hiskia a nga si ni lamukise.

¹⁵ Ni songo tenda Hiskia a tshi ri ni ḓitike nga Yahavee, a tshi ri Yahavee u ḓo ni tshidza a humisa khosi ya Ashuru uri i si thube muḓi waṋu.

¹⁶ Hiskia ni songo mu thetshelesa. Khosi ya Ashuru i ri, ‘Ibvani muḓini ri pfumedzane, ndi hone noṱhe ni tshi ḓo tendelwa u ḽa nḓirivhe dza minḓirivhe yaṋu na fula mahuyu a mihuyu yaṋu, na nwa maḓi a zwisima zwaṋu,

¹⁷ nda vhuya nda ḓa nda ni dzhia nda ni isa shangoni ḽi no fana na ḽaṋu, ḽa goroi na waini, na zwiḽiwa na masimu a minḓirivhe.

¹⁸ Ni songo tenda Hiskia a tshi ni fhura na humbula uri Yahavee u ḓo ni lamukisa. Ndi lufhio lushaka lwe midzimu yalwo ya vhuya ya lu lamukisa tshanḓani tsha khosi ya Ashuru?

¹⁹ Midzimu ya Hamathi na ya Ariphada i ngafhi zwino? Midzimu ya Sefaravaimi i ngafhi? Ho vhuya ha vha na we a lamukisa Samaria?

²⁰ Ndi ufhio wa midzimu ya mashango ayo oṱhe we wa lamukisa shango ḽawo zwanḓani zwa khosi ya Ashuru? Zwino Yahavee a nga ponyokisa hani Jerusalema zwanḓani zwanga?’ ”

²¹ Vhathu vha sokou tshete vha si fhindule tshithu, ngauri Hiskia o vha o vha laya uri vha songo fhindula.

²² Zwenezwo mukoma wa pfamo ya musanda, Eliakimu ṅwana wa Hilikia, na Shebina muṅwaleli wa khosi, na tshanḓa tsha khosi, Jua ṅwana wa Asafu, vha kherukanya zwiambaro zwavho nga u ṱungufhala, vha yo vhudza Hiskia zwe mulangammbi wa Ashuru a amba.