YESAYA 34 - BIVHILI KHETHWA Mafhungo Madifha

U lozwa na u vusa (34 – 35) Ṱhamu ya tshakha dzoṱhe

¹ Inwi tshakha dzoṱhe, iḓani ni pfe! Vhathu vhoṱhe nga vha thetshelese! Ḽifhasi nga ḽi pfe, na vhoṱhe vha dzulaho khaḽo, na shango na zwoṱhe zwi bvaho khaḽo!

² Muṋe washu o sinyutshela tshakha dzoṱhe, mbiti dzawe dzo wela mmbi dzavho; u ḓo vha lozwa tshoṱhe zwa nga ndi tshiṱhavhelo.

³ Vhahali vhavho vho vhulawaho vha ḓo poswa nnḓa, zwitumbu zwavho zwa sina, zwa nukha, thavha dza tswuka nga malofha.

⁴ Ṋaledzi dzoṱhe dzi ḓo nyamalala, lutombo lu ḓo petwa unga pesa, ṋaledzi dza dzima dza wa unga maṱari a munḓirivhe na a muhuyu a tshi wela fhasi.

U lozwiwa ha Edomo

⁵ Pfumo ḽanga ḽa ngei ṱaḓulu musi ḽo fura malofha ḽi ḓo tsela kha Edomo, ḽa haṱula lushaka lwe lwa dzula lwo kumedzwa upfi lu ḓo itwa tshiṱhavhelo.

⁶ Pfumo ḽa Muṋe washu ḽo ṱamba nga malofha, ḽo ḓala mapfura a vhathu, zwa nga ndi malofha a ngwana na mbokoṱo, na mapfura a tswio dza thutha; ndi tshiṱhavhelo tshine tsha ṋekedzwa Muṋe washu muḓini wa Botsora, ḽa vha bulayo ḽihulu shangoni ḽa Edomo.

⁷ Ṋari dzi ḓo wa navho, na mbohwana na maboho, shango ḽavho ḽa tou fura malofha, mavu a ḓala mapfura.

⁸ Ndi ṅwaha une Muṋe washu a lamukisa Tsioni, ndi ḓuvha ḽine a lifhedza maswina awo.

⁹ Milambo ya Edomo i ḓo shanduka tshigonṱiri, mavu aḽo a shanduka tsevhela, shango ḽa duga unga tshigonṱiri;

¹⁰ vhusiku na masiari ḽi nga si dzime, buluvhutsi ḽaḽo ḽi ḓo duba lini na lini, ḽi ḓo dzula ḽi soga, miṅwaha ya ḓi ṱanḓulukana i tshi ya; henefho a hu nga vhuyi ha dovha ha fhira muthu.

¹¹ Hu ḓo vha haya ha gombambudzi na tshiṱoni; gwitha na funguvhu zwi ḓo fhaṱa zwiṱaha zwazwo henefho. Muṋe washu u ḓo ḽi ela a vhea mikano, a ri ḽi dzule ḽo vilingana ḽi sa dzuli muthu, ḽa nga zwiḽa shango ḽi sa athu sikwa.

¹² Vhahulwane vhaḽo a vha tsha ḓo vha na tshithu tshi no pfi muvhuso; vhavhusi vhaḽo vhoṱhe vha ḓo nyamalala.

¹³ Pfamo dzaḽo dzi ḓo tangwa nga mipfa, mitsheṱoni yaḽo ha mela tshitondovhe na mikokole. Hu ḓo vha haya ha phunguhwe, ha dzula mafhondo a mphwe.

¹⁴ Phukha dza phangani dzi ḓo ṱangana na dziphele henefho, madimoni a mbokoṱo a huwelelana; madimoni a vhusiku a ḓo ḓa henefho a tshi ṱoḓa fhethu ha u awela.

¹⁵ Dyambila ḽi ḓo kudzela henefho, ḽa thothonya ḽa londola vhana vhaḽo; hu ḓo kuvhangana maanga, mukuku na phambo.

¹⁶ Sedzani buguni ya Muṋe washu ni vhale: hu pfi a hu na na tshithihi tsha hezwo tshine tsha sa ḓo vha hone; a hu na tshiduna tshi no ḓo shaya tshisadzi; hufha zwo ambiwa nga mulomo wawe, Muya wawe o zwi kuvhanganya,

¹⁷ ndi Ene we a zwi kovhela vhudzulo hazwo, a vhu ela nga tshanḓa tshawe; ndi mukovhe wazwo wa lini na lini; zwi ḓo dzula henefho miṅwaha ya ḓi ṱanḓulukana i tshi ya.