YESAYA 32 - BIVHILI KHETHWA Mafhungo Madifha

U vusuluswa ha Israele (32 – 33) Khosi-khosi i ḓaho

¹ Ḽi ḓo ḓa ḓuvha ḽine ha ḓo vha na Khosi i no ḓo vhusa nga u fulufhedzea, magota awe one a ḓo haṱula nga khaṱhulo mbuya.

² Muṅwe na muṅwe wavho u ḓo nga tshipilamuya na vhudzumbamo musi wa mvula khulu; vha ḓo nga milambwana i elaho phangani, vha nga murunzi wa dombo ḽihulu shangoni ḽo bvaho.

³ Maṱo a vhane vha fanela u vhona ha tsha ḓo pofula, nḓevhe dza vhane vha fanela u pfa dzi vho ḓo thetshelesa.

⁴ Mbilu dza vha mashithe dzi vho ḓo ṱalukanya, vha no kakamela vha vho ḓo amba zwavhuḓi;

⁵ tsilu a ḽi tsha ḓo hulisiwa, ḽivemu a ḽi tsha ḓo pfi ḽi a fulufhedzea.

⁶ Tsilu tshaḽo ndi u amba zwa vhutsilu, ḽi dzula ḽi tshi luka vhunwa; zwine ḽa ita zwi nyadzisa Mudzimu, ḽi isa phungo ya u nyefula Muṋe washu; vha re na nḓala ḽi vha dzima zwiḽiwa, vho farwaho nga ḓora a ḽi vha fhi maḓi.

⁷ Zwine ḽivemu ḽa ita ḽi itiswa nga vhuvhi; ḽi luka vhunwa ha u vhaisa vhashai nga mazwifhi, ḽa kundisa vhaheḓana u wana zwo vha fanelaho.

⁸ Muḓivhalea ene u vhamba maano a u ḓivhalea, a imelela zwi no ḓivhalea.

U kaidza vhasadzi vha Jerusalema

⁹ Inwi vhasadzi ni no vhona unga no khuda, iḓani ni thetshelese zwine nda amba! Inwi vhasidzana ni sa ofhi tshithu, ipfani zwine nda amba!

¹⁰ Ṅwaha u ḓo ri u fhela inwi ni sa ofhi tshithu na vha ni tshi vho tetemela; a ni tsha ḓo kaṋa nḓirivhe, mitshelo a i tsha ḓo vha hone.

¹¹ Inwi vhasadzi ni no ḓiphiṋa, tetemelani! Ofhani inwi vhasidzana ni sa ofhi tshithu! Bvulani zwiambaro zwaṋu ni vhofhe madzanganda khunduni.

¹² Ṱungufhalani ni tou ḓirwa dzikhana, ni lilele mafulo e a vha a tshi titima, na minḓirivhe yavhuḓi,

¹³ ni lilele masimu a vhathu vhanga o no melaho luanakha na mutshutshungu. Lilelani nnḓu dzoṱhe he vhathu vha vha vho takala, na muḓi wa vhathu vha no tshila nga u ḓiphiṋa;

¹⁴ pfamo yo ṱutshelwa, muḓi mulilangoma wo sala we swoto; vhushavhelo na tshiingamo zwi ḓo sala zwi matumba tshoṱhe; hu ḓo fula mbiḓi henefho dza tou ḓiphiṋa, hu ḓo vha pfulo dza maṱambi a nngu.

Muya wa Mudzimu, Ene Musiki

¹⁵ Zwi ḓo ralo, Muṋe washu a vhuya a ri shululela Muya wawe a tshi bva ṱaḓulu, ndi hone phanga i tshi vho ḓo vha tsimu yo vhibvelaho, masimu o vhibvelaho a miri ya mitshelo a tou pinzana.

¹⁶ Khaṱhulo mbuya ya fhaṱela phangani, shangoni ḽo vhibvelaho ha fhaṱela zwi re zwone,

¹⁷ mutshelo wazwo ha vha u ḓisa mulalo, mushumo wazwo ha vha u ladza shango, vhathu vha pfa vho tsireledzea lini na lini.

¹⁸ Vhathu vhanga vha ḓo dzula miṱani ya mulalo, mahayani o tsireledzeaho, vha dzula vha awela hu si na zwi vha dinaho.

¹⁹ Naho tshifhango tsha wa tsha vunḓekanya maṱaka, muḓi wa maswina wa phusukanywa tshoṱhe,

²⁰ inwi ni ḓo ḓi vha na mashudu, ni ḓo zwala mbeu hoṱhe-hoṱhe, maḓi a ḓo vha a si na vhukono, phulu na donngi dzi ḓo tshimbila hoṱhe hu si na tshi ofhisaho.