YESAYA 3 - BIVHILI KHETHWA Mafhungo Madifha

Vilinga kha ḽa Juda

¹ Vhonani, Ene Muṋe wazwo, Muṋe washu Mulangazwoṱhe, u ḓo ṱuwa a tshi dzhiela Jerusalema na Juda vhatiki na thikho, zwoṱhe zwine zwa tika vhathu, zwiḽiwa na maḓi, vhahali na maswole,

² vhahaṱuli na vhaporofita, mingome na vhahulwane,

³ vharangaphanḓa vha mmbi na vhaswikeli, vhanna vha khoro na vhatsila vhomakone na vhadzivheli vha maswina.

⁴ U ḓo ita uri vha vhuswe nga vhatukana vha no sokou ita zwine vha funa.

⁵ Vhathu vha ḓo kandeledzana nga tshavho; vhatukana vha ḓo hambekanya vhahulwane, vhanyadziwa vha kaidzekanya vhaḓivhalea.

⁶ Musi wonoyo muthu u ḓo sokou farelela muṅwe wa muṱa wa hawe, a ri, “Inwi ivhani murangaphanḓa washu, hufha ni tshi kha ḓi vha na gabulelo; fhedzani vilinga heḽi hu vhe na mulalo!”

⁷ Uyo a fhindula a ri, “Nṋe ndi ṅanga naa? Hufha nḓuni yanga hu tshi nḓala he tsiku; ni nga nnyita murangaphanḓa waṋu hani?”

⁸ Jerusalema wo phusukana, Juda ḽo wa. Zwine vha amba na zwine vha ita zwi nyadzisa Muṋe washu, zwi lwa na vhugala hawe.

⁹ Zwifhaṱuwo zwavho zwi vha vhea mulandu, a vha tsha shona, vha tou anḓadza vhuvhi havho unga vha Sodoma. Vha ḓo zwi vhona, vha khou ḓiṱulela!

¹⁰ Ḓivhani uri vha no thetshelesa Mudzimu zwi ḓo vha nakela, vha ḓo ḓiphiṋa nga zwe vha shuma.

¹¹ Vhavhi vhone vha ḓo zwi vhona! Zwe vha ita vhaṅwe zwi ḓo itwa vhone.

¹² Vhathu vhanga vha kandeledzwa nga vhatukana, vha vhuswa nga vhasadzi. Inwi vhathu vhanga, vharangaphanḓa vhaṋu vha a ni xedza, vha ni pambusa nḓilani.

Khaṱhulo ya Muṋe washu

¹³ Muṋe washu o ḓiimisela u sengisa vhathu, o ḓilugisela u haṱula dzitshakha.

¹⁴ Muṋe washu u khou isa vhahulwane na vharangaphanḓa vha vhathu vhawe tsengoni. A tshi vha pomoka u ri, “No kandekanya tsimu yanga ya minḓirivhe; nnḓu dzaṋu dzo ḓala thundu ye na dzhiela vhashai.

¹⁵ Ni itelani ni tshi kandeledza vhathu vhanga na tambudza vhashai?” Hu amba Muṋe wa zwoṱhe, Muṋe washu Mulangazwoṱhe.

Vhasadzi vha Jerusalema vha tshi kaidzelwa u ṱonga havho

¹⁶ Muṋe washu u ri, “Edzonu vhona uri vhasadzi vha Tsioni vha ḓihudza hani! Vha tshimbila vho ṱoṱomosa mitsinga, vha tshi sinyedza vhanna nga maṱo; vha tshi tshimbila vha tou kandela tsini, vha tshi tswikinya vhukunda.

¹⁷ Hone Nṋe Yahavee Muṋe wa zwoṱhe ndi ḓo vha laṱisa – ndi ḓo vha palula vha sala vha si na mavhudzi, nda vha ṱangula zwiambaro vhathu vha vhonela.”

¹⁸ Musi wonoyo Muṋe wa zwoṱhe u ḓo dzhiela vhasadzi vha Jerusalema zwoṱhe zwine vha ḓiṱama ngazwo – vhukunda ha milenzheni na nungu dza ṱhohoni na vhulungu ha mukuloni,

¹⁹ na zwiṅina zwa nḓevheni, na vhukunda ha zwanḓani. U ḓo vha dzhiela miṅwenda ya u khurumela

²⁰ na miṅadzi yavho, na geḓane dza milenzheni, na mabannda a khanani, na khambana dza zwiḓolo zwi nukhelelaho, na zwikungi,

²¹ na dzirinngi dza minwe, na zwiṅina zwa ningoni,

²² na zwiambaro zwa minyanya, na dzikhanzu, na dzitshali, na zwipatshi,

²³ na zwivhoni, na zwiambaro zwa muḓali, na dugu dza ṱhohoni, na dza mukuloni.

²⁴ A vha tsha ḓo vha na zwiḓolo zwi nukhelelaho, vha vho ḓo tou nukha, a vha tsha ḓo ambara mabannda, vha vho ḓo vhoxwa nga dzithambo; a vha tsha ḓo luka mavhudzi, vha ḓo palulwa; a vha tsha ḓo ambara dza maṱeleṱele, vha ḓo ambara madzanganda; a vha tsha ḓo vha na lunako, phanḓa dzavho dzi ḓo fhiswa ha sala luswayo lu shonisaho!

²⁵ Iwe Jerusalema, vhanna vhau vha ḓo fhela nga pfumo, vhahali vhau vha ḓo fela nndwani;

²⁶ khoroni dzau hu ḓo pfala mukosi na tshililo; u ḓo nga musadzi ó sokou khotha, ó ṱangulwa.