YESAYA 29 - BIVHILI KHETHWA Mafhungo Madifha

Khombo ya Jerusalema na u lamulelwa hawo

¹ Iwe aḽiṱari, aḽiṱari ya Mudzimu, muḓi we Dafita a vhuya a u govhela, u ḓo zwi vhona! Sokonu dzula ni tshi ita vhuṱambo ṅwaha nga ṅwaha,

² hone ndi ḓo govhela aḽiṱari yeneyo; ni ḓo lila na honḓa; muḓi woṱhe u ḓo nga aḽiṱari nga malofha.

³ Ndi ḓo u dia nda u govhela, nda u tanga nga mitsheṱo.

⁴ Iwe ndi ḓo u nyadzisa, wa nga murunzi une wa khou linga u amba wó swiṱwa mavuni, ipfi ḽi tshi bva ḽi sa pfalesi.

⁵ Hone maswina oṱhe ane a u dia a ḓo vhudzulelwa kule unga buse, mmbi dzavho dzi ofhisaho dzi ḓo tou fhufha unga mathukhwi. Hu ḓo ri kathihi fhedzi, zwí songo vhuya zwa lavhelelwa,

⁶ Muṋe washu Mulangazwoṱhe a ni lamukisa nga mibvumo ya dzinḓadzi na mudzinginyo wa shango na mukosi muhulu na ḓumbumazwikule na mulilo u lozwaho.

⁷ Mmbi dzoṱhe dza dzitshakha dzine dza khou dia aḽiṱari yanga, dza lwa nayo na mutsheṱo wayo dza i govhela, ndi hone dzi tshi ḓo nyamalala unga muloro, zwa nga bono ḽa vhusiku.

⁸ Tshakha dzoṱhe dzine dza kuvhanganela u dia Jerusalema, dza lwa na thavha ya Tsioni, dzi ḓo nga munna a no khou ṋoka nga nḓala, a lora a tshi khou ḽa, a tshi vuwa a pfa o ḓi farwa nga nḓala, kana dza nga munna a no khou fa nga ḓora, a lora a tshi khou nwa maḓi, a tshi vuwa a wana mikulo yo ḓi oma.

U pofudzwa nga mulandu wa muhoyo

⁹ Ḓiakhamadzeni zwaṋu ḽi mbo ḓi vha dzema! Ḓipofudzeni zwaṋu ni mbo ḓi pofula tshoṱhe! Ḓikambiseni tshivhisi ní songo nwa waini! Pepelekani ní songo thetshela halwa!

¹⁰ Muṋe washu o ni farisa khofhe, ni ḓo ṱuwa ni tshi eḓela khofhe khulu; vhaporofita vho fanela u vha vhone maṱo a vhathu, hone Mudzimu o vha pofudza; vhavhoni vha mabono vho fanela u vha vhone ṱhoho dzaṋu, hone Mudzimu o vha khurumedza.

¹¹ Nzumbululo iṅwe na iṅwe ni ḓo vhona unga ndi maipfi a bugu yo shatelwaho, na i dzhia na isa ha muṅwe ane a kona u vhala, na ri a ni vhalele. U ḓo ri, “A thi koni, yo shatelwa.”

¹² Na i ṋea a sa koni u vhala na ri a ni vhalele, u ḓo fhindula a ri, “Hufha ndi sa koni u vhala.”

¹³ Muṋe wa zwoṱhe o ri, “Havha vhathu vha nnduvha nga milomo, vha nkhulisa nga maipfi, hone mbilu dzavho dzi kule na Nṋe. U nnduvha havho ndi ha zwidayo fhedzi zwe vha funzedzwa nga vhathu.

¹⁴ Ndi zwine nda ḓo ḓi vha akhamadza nda dovha, vha si ṱalukanye zwine nda ita. Vhuṱali ha vhaṱali vhavho vhu ḓo lovha, nḓivho ya vhaḓivhi vhavho i ḓo nyamalala.”

¹⁵ Vhane vha luka vhunwa vha dzumbela Muṋe washu, vha ḓo zwi vhona. Vha itela zwithu zwavho swiswini vha ri, “Ri ḓo vhonwa nga nnyi? Ri ḓihwa nga nnyi?”

¹⁶ A ni koni zwone u shanda zwithu! Muvhumbi wa khali ni vho mu ita vumba. Matsina tshe tsha itwa nga muthu tshi nga amba nae tsha ri, “A wo ngo nnyita!”? kana tshivhumbwa tsha vhudza muvhumbi tsha ri, “A u ḓivhi tshine wa khou ita!”?

Vhe vha vha vho xela vha ḓo guda u ṱalukanya

¹⁷ Hu si kale Libanoni hu ḓo vha tsimu yo vhibvelaho, tsimu yo vhibvelaho ya vho nga ḓaka.

¹⁸ Musi wonoyo madzinganḓevhe a vho ḓo pfa bugu i tshi vhalwa, mabofu e a vha a tshi tshila swiswini ḽo tou nzwii, vha vho ḓo vhona.

¹⁹ Vhaheḓana vha ḓo ḓi fhululedza Muṋe washu vha tshi ya, vhashai vha pembelela Mukhethwa wa Israele.

²⁰ Vha no kandeledza vhathu vha ḓo nyamalala, vhanyefuli a vha tsha ḓo vha hone, vhaluki vha vhunwa vha ḓo tumulwa,

²¹ khathihi na vhane vha pomoka a si na mulandu, na vha no piringanya khaṱhulo mbuya nga vhukwila havho, a si na mulandu vha mu kundisa u wana pfanelo dzawe nga u ṱanziela mazwifhi.

²² Zwino Muṋe washu we a tshidza Abrahamu u amba na vha muṱa wa Jakopo, u ri, “Jakopo ha tsha ḓo shona; a vha tsha ḓo niwa nga ṱhoni.

²³ Musi vha tshi vhona vhana vhavho, wone mushumo wa zwanḓa zwanga, dzina ḽanga vha ḓo ḽi ita ḽikhethwa, vha tetemela Mudzimu wa Israele.

²⁴ Ndi hone vha mbilu dzo xelaho vha tshi ḓo guda u ṱalukanya, vhadzia-u-gungula vha tenda u laiwa.”