YESAYA 27 - BIVHILI KHETHWA Mafhungo Madifha

¹ Musi wonoyo Muṋe washu u ḓo dzhia banga ḽawe ḽi ofhisaho, ḽihulu, ḽa maanḓa a rema Liviathani, heḽiḽa ḽiṋowa ḽa luvhilo, ḽiṋowa ḽi sombekanaho; u ḓo vhulaha buka ḽi dzulaho lwanzheni.

Luimbo luswa lwa tsimu ya Mudzimu ya minḓirivhe

² Musi wonoyo Muṋe washu u ḓo ni vhudza a ri, “Ndi na tsimu i takadzaho ya minḓirivhe, i imbeni!

³ Nṋe Yahavee ndi a i londola, a thi fhidzi u i sheledza. Ndi i linda vhusiku na masiari hu sa ḓo ḓa muṅwe a tshinya.

⁴ A i tsha mmbilaedza, hone nda wana ho mela luanakha na mitshutshungu, ndi ḓo lwa nazwo nda zwi fhisa zwe tshote.

⁵ Ndi khwiṋe vha tshi shavhela ha Nṋe nda vha tsireledza, vha pfumelwa. Ee, nga vha pfumelwe!”

U thubiwa na u hangwelwa ha vhaḓuhulu vha Jakopo

⁶ Misi i ḓaho vhaḓuhulu vha Jakopo vha ḓo ṱoka midzi, Vhaisraele vha ḓo kulukusha vha fhufhumisa, vha ḓadza shango nga mitshelo.

⁷ Muṋe washu o tambudza Vhaisraele unga a tshi tambudza vhatambudzi vhavho kani? Vho vhulawa unga hu tshi vhulawa vhavhulahi vhavho naa?

⁸ Aiwa, ho ngo vha tambudza lwa u tou kalula hezwi a tshi vha sukumedzela vhuthubwani, o tou vha hwala nga muya u vayaho wa vhubvaḓuvha.

⁹ Nga vha kuye matombo a aḽiṱari dza vhannḓa, dzi sale dzi tshi nga vhukhopfu, hu si tsha vha na thanda dza mudzimutshisadzi Ashera, na aḽiṱari dza u fhisela zwioro; ndi hone milandu ya vhaḓuhulu vha Jakopo i tshi ḓo pfumelwa, ndi yone tsumbo ya uri vho hangwelwa vhutshinyi.

¹⁰ Muḓi uyu wo dzivhelwaho a u tshee na muthu, wo no tou vha matumba, wo sala u tshi nga soga, wo no vha pfulo ya ṋamana, ngedziḽaa dzo awela dzi tshi khou swarula matavhi.

¹¹ Matavhi a miri o puta a vunḓekana, vhasadzi vha reḓa dza khuni dza u vhasa. Musiki wavho a nga si vha khathutshele, Muvhumbi wavho a nga si vha pfele vhuṱungu; ndi vhathu vha si na ṱhalukanyo.

¹² Hu khou ḓa ḓuvha ḽine Muṋe washu a ḓo kuvhanganya vhathu vha Israele nga muthihi nga muthihi u bva Yufuratha u swika nga mukano wa Egipita, zwa nga mulimi a tshi fhula goroi a nanguludza thoro a si sie na nthihi.

¹³ Musi wonoyo hu ḓo lidzwa phalaphala khulu i tshi vhidza Vhaisraele vho fhalalelaho Ashuru na vho thathelwaho Egipita uri vha vhuye hayani, vha luvhe Muṋe washu Jerusalema, thavhani yawe khethwa.