YESAYA 26 - BIVHILI KHETHWA Mafhungo Madifha

Muḓi wo dzivhelwaho

¹ Musi wonoyo hu ḓo imbiwa luimbo shangoni ḽa Juda, ha pfi, “Ri na muḓi wo dzivhelwaho, Mudzimu u ri tsireledza nga mitsheṱo yo khwaṱhaho.

² Vulani dzikhoro dza muḓi, hu dzhene lushaka lu fulufhedzeaho lu no thetshelesa Mudzimu,

³ lu sa khakhiswi nga tshithu. Iwe Muṋe washu u vha ṋea mulalolalo, vha fulufhela Iwe.

⁴ Fulufhelani Muṋe washu lini na lini; Yahavee Muṋe washu ndi bako ḽashu ḽa lini na lini.

⁵ U ṱukufhadza vha no ṱongisa vhuhulwane, u phusukanya muḓi wavho wo dzivhelwaho, a u thutha we fhasi huru, a u posa fhasi buseni.

⁶ Vhe vha vha vha tshi kandeledzwa vha vho tshimbila nṱha hawo zwino, vhaheḓana vha u kandekanya nga milenzhe.”

Thabelo ya misi ya vhufhelo

⁷ Muṋe washu, vha fulufhedzeaho u vha swielela nḓila, nḓila ine vha tshimbila ngayo yo linganela.

⁸ Nangwe u tshi khou ri laṱisa ri ḓi fulufhela Iwe nga tshiṱuvho; zwine ra zwi tama u fhira zwoṱhe ndi u vhidzelela Iwe na u humbula Iwe.

⁹ Na vhusiku ndi u ṱuvha nga mbilu yanga yoṱhe, ndi bubela u u rabela nga tshiṱuvho tshihulu. Musi u tshi haṱula shango na vhathu vhaḽo, ndi hone vha tshi ḓo guda u ita zwi re zwone.

¹⁰ Vhavhi naho u tshi vha itela vhuthu a vha gudi u ita zwi re zwone; na shangoni ḽino hu no tevhedzwa khaṱhulo yau, Iwe Muṋe washu, a vha vhoni vhuhulu hau, vha ḓi shanda khaṱhulo.

¹¹ Muṋe washu, tshanḓa tshau tsho no ḓi angaladzwa, hone maswina au ha tshi vhoni. Nga vha vhone uri u lwela vhathu vhau nga lufuno lungafhani, vha shone. Nga vha fhiswe nga mulilo we vha dzula vho vhaselwa, vhe lore!

¹² Muṋe washu, u ri ladzela shango; zwoṱhe zwe ra shuma ro koniswa nga Iwe.

¹³ Mudzimu Muṋe washu, ro vha ri tshi vhuswa nga vhaṅwe, hone ri zuwa Iwe u woṱhe.

¹⁴ Maswina o fa, ha tsha ḓo dovha a tshila, mirunzi yavho a i tsha ḓo dovha ya vuwa; wo vha pfisa vhuṱungu wa vha lozwa, vho hangwiwa tshoṱhe.

¹⁵ Muṋe washu, wo alusa lushaka lwa hashu, wa ri engedzela shango masia oṱhe, zwa ita uri u huliswe.

¹⁶ Muṋe washu, vhathu vhau vho shavhela ha Iwe musi wa khombo, wa ri u vha laṱisa vha ḓa ha Iwe vha tshi tswimila.

¹⁷ Muṋe washu, wo ita uri ri gomele unga musadzi a no khou vhofholowa a tshi tshema nga u pfa vhuṱungu.

¹⁸ Ro vha ro vhifha muvhilini ri tshi gomela, ra fhedza ra si bebe tshithu; a ro ngo vhuya ra lwela shango ḽashu ra kunda, shango a ro ngo ḽi bebela vhathu.

¹⁹ Muṋe washu, vhafu vhau vha ḓo dovha vha tshila, zwitumbu zwavho zwi ḓo vuwa! Inwi no lalaho buseni, vuwani ni fhululedze! Iwe Muṋe washu u nga ṅwando u ṋeaho vhutshilo, shango ḽa konou ṱanza vhafu.

Khaṱhulo ya shango na lwanzhe

²⁰ Inwi vhathu vhanga, shavhelani dzinḓuni ni ḓihoṋele ngomu, ni dzumbame tshifhinganyana ṱhamu ya Mudzimu i vhuye i fhire!

²¹ Muṋe washu u khou ḓa a tshi bva hune a dzula hone, u ḓa u laṱisa vhathu vha shango nga mulandu wa vhutshinyi havho; ḽifhasi ḽi ḓo dzumbulula malofha o fhaladzelwaho khaḽo, mavu ha tsha ḓo swiṱa vho vhulahelwaho khao.