YESAYA 23 - BIVHILI KHETHWA Mafhungo Madifha

Mafhungo a no amba Tiro

¹ Haya ndi mafhungo a no amba Tiro. Honḓani inwi vhatshimbidzi vha zwikepe zwihulu, Tiro wo phusukanywa, a ni tshee na vhuyo. Hu ḓo ri ni tshi vhuya tshiṱangadzimeni tsha Kipirosi na konou pfa ayo mafhungo.

² Akhamalani inwi ni dzulaho tshiṱangadzimeni, inwi vhavhambadzi vha Sidoni. No pfumiswa nga vhaendi vha lwanzheni

³ vhe vha wela maḓi mahulu. Lupfumo lwaṋu ndi mavhele a Mulambo Mutswu, ndi khaṋo ya Nile, lwe na vho tou vha makete wa dzitshakha.

⁴ Shonee Sidoni! Hu amba lwanzhe, hu landula vhushavhelo vhu re ngomu halwo, vhu ri, “A thi athu vhuya nda vhifha muvhilini nda beba ṅwana, a thi athu vhuya nda alusa vhaṱhannga kana nda lela vhananyana.”

⁵ Na Vhaegipita vha tshi pfa uri Tiro wo phusukanywa vha ḓo tetemela nga nyofho.

⁶ Inwi vhathu vha tshiṱangadzime, honḓani nga u pfa vhuṱungu! Shavhelani Tharashishi!

⁷ Nṋa uyu muḓi wa u ḓiphiṋa we wa fhaṱwa kale-kale wo welwa ngani? A si wone muḓi we wa ruma vhathu vha yo ḓiwanela mashango a kule vha dzula hone?

⁸ Ndi nnyi we a dzudzanya uri zwo raliho zwi wele Tiro, wone muambadzi wa zwiala zwa vhuhosi? Vhavhambadzi vhawo vho vha vhe si vhavhusi vhoṱhe naa? Vhashavhi vhawo vho vha vha si na bvumo shangoni ḽoṱhe naa?

⁹ Zwo dzudzanywa nga Muṋe washu Mulangazwoṱhe, o zwi itela u fhedza u ḓihudza havho na vhugala havho hoṱhe, na u nyadzisa vha re na bvumo shangoni.

¹⁰ Inwi vhathu vha Tharashishi, ḓilimeleni unga vha Nile a ni tshee na ha u fhaṱa zwikepe.

¹¹ Muṋe washu o angaladza tshanḓa tshawe nṱha ha lwanzhe, a thutha mivhuso ya mahosi; Muṋe washu o amba, ha phusukanywa hone tshivhindini tsha Kanana,

¹² a ri, “Iwe muḓi wa Sidoni, dakalo ḽau ḽo fhela, u vho nga musidzana o tshipiwaho. Naho wa shavhela tshiṱangadzimeni tsha Kipirosi, na henengei a hu na vhudzumbamo.

¹³ Edzonu vhona shango ḽa Vhakhaladia vhane zwino vha si tsha vha hone; Vhaashuru vho ḽi ita vhudzulo ha phukha dza sogani. Vho u govhela nga mitsheṱo yavho, vha ṱangula pfamo dzawo a sala e matumba.”

¹⁴ Honḓani inwi vhatshimbidzi vha zwikepe zwihulu; Tiro wo phusukanywa, a ni tshee na vhushavhelo!

¹⁵ Hu khou ḓa ḓuvha ḽine Tiro wa ḓo hangwiwa, ha fhela miṅwala ya 70, ine ya eḓana na vhutshilo ha khosi. Musi miṅwaha iyo i tshi fhela, Tiro u ḓo nga phombwe ine ya imbiwa kha luimbo luḽa lu no ri,

¹⁶ “Iwe phombwe yo no hangwiwaho, dzhia haripa yau u mone na muḓi, u lidze zwavhuḓi, u imbe nyimbo nnzhi, u dovhe u kunge vhanna!”

¹⁷ Musi ho no fhela iyo miṅwaha ya 70, Muṋe washu u ḓo dovha a khathutshela vha Tiro, vha humela kha zwa mabindu avho vha ita unga phombwe vha ḓikumedza mivhuso yoṱhe ya ḽifhasi.

¹⁸ Zwine vha bindula na zwine vha vhuelwa ngazwo zwi vho ḓo sumelwa Muṋe washu. A vha nga zwi khokhi zwa sokou dzula, zwi ḓo ṋewa vhane vha luvha Muṋe washu, vha renga zwiḽiwa, vha ḽa vha fura, vha renga na zwiambaro zwa maṱeleṱele.