YESAYA 21 - BIVHILI KHETHWA Mafhungo Madifha

Bono ḽa u wa ha Babele

¹ Ndaedzo i no amba phanga ya tsini ha lwanzhe ngeino: Hu khou ḓa mutshoṱheli a tshi bva phangani, shangoni ḽi ofhisaho; u ḓa a tshi nga zwiḓumbumukwe zwi tshi swiela zwi tshi buḓekanya Negeve.

² Ndo sumbedzwa bono ḽi ofhisaho: Mmbi ya Elamu nga i gonye! Mmbi ya Media nga i govhele miḓi! Mufheṱi nga' fheṱwe! Muṱanguli nga' ṱangulwe! U tambudzwa ha vhathu nga Babele ndi ḓo hu fhelisa!

³ Nda ri u zwi vhona, miraḓo yanga ya tou rema, nda pfa vhuṱungu vhu no nga ha musadzi e tsini na u vhofholowa, nda ri u zwi pfa zwa nkamba, nda ri u zwi vhona nda ofha.

⁴ Ndi a dzunguluwa, ndi khou tetemela nga nyofho. Ndo vha ndi tshi tou ri ḽi kovhela lini, hone ḽa ḓi nnḓisela nyofho fhedzi.

⁵ Nda vhona bono ḽa vhuṱambo ho lugiswa, maṱafula a adzelwa, ha dzulwa fhasi, ha ḽiwa, ha nwiwa; kathihi fhedzi ha pfala mukosi u tshi ri, “Inwi vhalangi, takuwani! Ḓodzani zwiṱangu zwaṋu mapfura!”

⁶ Muṋe wa zwoṱhe o amba na nṋe a ri, “Iyo vhea ṱholi, i ambe zwine ya vhona.

⁷ A vhona gariki dza bere, vhathu vha tshi ḓa vho namela bere nga vhavhili nga vhavhili, na gariki dza donngi, na dza gamela, a sedze a tou sedzesa.”

⁸ Ṱholi ya vhidzelela ya ri, “Muṋe wa zwoṱhe, ndo ima ndi kha tshiingamo ḓuvha ḽoṱhe, na vhusiku nda si sudzuluwe he nda vhewa.

⁹ Ngouḽaa u khou ḓa nga gariki ya nndwa, i khou kokodzwa nga bere!” A ḓi huwelela a ri, “Wo wa Babele, wo wa! Zwifanyiso zwoṱhe zwa midzimu yawo zwo pwashea zwa balangana fhasi!”

¹⁰ Inwi vhathu vhanga, no tou fhulwa luvhatani, hone zwino ndo ni ḓivhadza mafhungo maḓifha e nda pfa nga Muṋe washu Mulangazwoṱhe, Mudzimu wa Israele.

Mafhungo a no amba Edomo

¹¹ Mafhungo a no amba Duma ngeano: Muṅwe u khou nkhuwelela e Seiri, u ri, “Iwe ṱholi, ḽi ḓo tsha lini? Ḽi ḓo tsha lini nandi?”

¹² Ṱholi ya fhindula ya ri, “Ḽi khou tsha, hone ḽi ḓo dovha ḽa kovhela. Ni tshi ṱoḓa u vhudzisa, vhudzisani. Rembuluwani ni vhuye!”

Mafhungo a no amba Arabia

¹³ Mafhungo a no amba Arabia ngeano: Inwi vhavhambadzi vha Dedani ni ḓo lala maṱakani a soga.

¹⁴ Inwi vhathu vha Thema, vha na ḓora vha ṋeeni maḓi a u nwa, vhafhalali ni vha fhe zwiḽiwa.

¹⁵ Vhathu havha vha khou shavha pfumo, pfumo ḽo angaladzwaho, vhura ho akhiwaho, vha khou shavha tshiṱuhu tsha nndwa.

¹⁶ Muṋe wa zwoṱhe o mmbudza a ri, “Hu ḓo ri hu tshi tou fhela ṅwaha, nga kuvhalele kwa mushumi a tshi vhala maḓuvha awo nga ḽithihi nga ḽithihi, maanḓa a Kedara a vha o no fhela.

¹⁷ Vhahali vha Kedara vho faraho vhura hu ḓo tou sala vha si gathi.” Ho amba Muṋe washu Mudzimu wa Israele.