YESAYA 20 - BIVHILI KHETHWA Mafhungo Madifha

Tshiga tsha muporofita a tshi tshimbila e fhedzi

¹ Saragoni khosi ya Ashuru o ruma mulangammbi wawe muhulwane u yo dia Ashidodo. Nangoho a ḓa a u thuba.

² Izwo zwo vha hone ho no fhela miṅwaha miraru tshee Muṋe washu a amba na Yesaya ṅwana wa Amutsi, a mu vhudza a ri, “Bvula madzanganda au na navhula dze wa ambara.” Izwo a zwi tenda, a tshimbila e fhedzi, na navhula a songo ambara.

³ Musi ho no fhela miṅwaha miraru a tshi tshimbila e fhedzi, Muṋe washu a ri, “Muḓinḓa wanga Yesaya o vha a tshi khou tshimbila e fhedzi, na navhula a songo ambara, a vhuya a fhedza miṅwaha miraru ó ralo e tshiga, a tshi ṱulela Egipita na Kushu.

⁴ Zwivhotshwa zwine khosi ya Ashuru ya ḓo zwi thuba Egipita na Kushu i ḓo zwi khada nga u ralo zwi fhedzi. Hu ḓe vhaṱuku, he vhahulwane, vha tshimbila vhe fhedzi, na navhula vha songo ambara, maraho e nnḓa, Vhaegipita vha tou shona!

⁵ Vhe vha vha vha tshi fulufhela Kushu, vha zuwa Egipita, zwi ḓo vha ofhisa vha shona.

⁶ Musi wonoyo vhathu vhane vha dzula khunzikhunzini ya Filista vha ḓo ri, ‘Vhonani zwo itwaho vhathu vhe ra vha ro vha fulufhela ra shavhela khavho uri vha ri tsireledze kha khosi ya Ashuru! Zwino riṋe ri ḓo ponyoka hani?’ ”