YESAYA 2 - BIVHILI KHETHWA Mafhungo Madifha

Ndaedzo dza u ranga dza Yesaya (2:1 – 5:30) Mulalo wa tshifhinga tshi ḓaho

¹ Hei ndi nzumbululo ye ya sumbedzwa Yesaya ṅwana wa Amutsi. I amba nga Juda na Jerusalema.

² Misi ya vhufhelo, thavha ye nnḓu ya Muṋe washu ya fhaṱwa khayo i ḓo vha yone yo lapfaho u fhira dzoṱhe, ya vhonala yo ṱoṱomowa u fhira mivhundu yoṱhe. Tshakha dzoṱhe dzi ḓo ḓa dza kuvhangana khayo.

³ Vhathu vhanzhi vha ḓo ḓa vha ri, “Nḓarieni ri gonye thavha ya Muṋe washu, ri ye nḓuni ya Mudzimu wa Jakopo; u ḓo ri funza nḓila dzawe, ra kanda hune a funa.” Ndi uri pfunzo i ḓo wanala Tsioni, ipfi ḽa Muṋe washu ḽa wanala Jerusalema.

⁴ U ḓo vhusa dzitshakha a lamula vhathu vhanzhi; mapanga avho vha ḓo fula malembe ngao, mafumo vha fula makhavha ngao. Tshakha a dzi tsha ḓo vutshelana, a dzi tsha ḓo guda zwa nndwa.

⁵ Zwino inwi vha nnḓu ya Jakopo, iḓani ri tshimbile tshedzani tsha Muṋe washu!

Ḓuvha ḽine Muṋe washu a ḓo sumbedza maanḓa awe, u ḓihudza hu ḓo fhela

⁶ Muṋe washu, wo laṱa vhathu vhau vhana vha Jakopo; ho ḓala u tenda zwi siho zwi no bva mashangoni a Vhubvaḓuvha; vha ita zwa u bvumba unga Vhafilista; vha vho konana na vhannḓa.

⁷ Shango ḽavho ḽo ḓala siliva na musuku; lupfumo lwavho a lu fheli; shango ḽavho ḽo ḓala dzibere, gariki dza nndwa a dzi na mbalo;

⁸ shango ḽavho ḽo ḓala midzimu i si tshithu; vha luvha zwe vha zwi vhumba nga zwanḓa zwavho.

⁹ Zwenezwo vhathu vha ḓo ṱukufhadzwa vha nyadziswa. Muṋe washu, u songo vha hangwela!

¹⁰ Dzumbamani mapakoni a dzinngwa, ni shavhele milindini nga u vhona u ofhisa ha Muṋe washu na vhugala ha maanḓa awe.

¹¹ Musi wonoyo vha u ḓihudza vha ḓo ṱukufhadzwa, vha u kuruluwa vha nyadziswa; Muṋe washu u ḓo vha muhulwane e eṱhe.

¹² Muṋe washu Mulangazwoṱhe u ḓo ṱukufhadza vhoṱhe vha no ḓihudza na u ḓiḓivha, na vhoṱhe vha re na maanḓa,

¹³ a lozwa mikedara milapfu ya Libanoni yo adzaho, na miri yoṱhe mihulwane ya Bashani,

¹⁴ a phusula dzithavha na mivhundu zwa linganela,

¹⁵ na thawara dzoṱhe ndapfu, na mitsheṱo i sa konadzei,

¹⁶ a mbwandamedza zwikepe zwoṱhe zwihulu na zwo nakesaho.

^17-18 Musi wonoyo vha u ḓihudza vha ḓo ṱukufhadzwa, vha u kuruluwa vha nyadziswa, midzimu i si na mushumo a i tsha ḓo vha hone, Muṋe washu a sala e muhulwane e eṱhe.

¹⁹ Vha ḓo dzumbama mapakoni a dzinngwa, vha shavhela milindini nga u vhona u ofhisa ha Muṋe washu na vhugala ha maanḓa awe, musi a tshi ḓa u dzinginyisa ḽifhasi.

²⁰ Musi wonoyo vha ḓo laṱa midzimu i si tshithu ya siliva na musuku ye vha vhumbela u i luvha, vha i posa mbevha na milemalema,

²¹ vha yo dzumbama mapakoni a dzinngwa, vha shavhela pharani nga u vhona u ofhisa ha Muṋe washu na vhugala ha maanḓa awe, musi a tshi ḓa u dzinginyisa ḽifhasi.

²² Litshani u fulufhela muthu, hufha o tou vhudzulelwa muya ningoni. Ene muthu u tou vha mini?