YESAYA 19 - BIVHILI KHETHWA Mafhungo Madifha

U fulufhuwa ha Vhaegipita

¹ Ndaedzo i no amba Egipita ngeino: Vhonani, Muṋe washu o namela gole ḽa luvhilo, u khou ḓa Egipita. Midzimu ya Egipita i tshi mu vhona i a tetemela; mbilu dza Vhaegipita dzi tou ṋoka.

² Muṋe washu u ri, “Ndi ḓo luṱanya Vhaegipita vha lwa nga tshavho, mukomana a lwa na murathu, muhura a lwa na muhura, miḓi ya vutshelana, mivhuso ya lwa.

³ Vhaegipita vha ḓo kanganea; ndi ḓo piringanya maano avho; vha ḓo ṱoḓa nyeletshedzo kha midzimu na vhadzimu na mingome na milomo ya vhadzimu.

⁴ Vhaegipita ndi ḓo vha kumedza muvhusi wa tshiṱuhu; vha ḓo vhuswa nga khosi i ofhisaho.” Ho amba Muṋe washu Mulangazwoṱhe, Ene Muṋe wazwo.

⁵ Mulambo wa Nile u ḓo xa, ḓuvha ḽa gotsha, mavu a sala o oma mulamboni;

⁶ milonga yawo i ḓo nukha, maḓi a fhungudzea migeroni ya Egipita, ṱhanga na madzhesi zwa puta,

⁷ khathihi na zwimela zwi re miṱangani hune Nile wa shela, na masimu oṱhe a navhaho na mulambo a do oma, zwimela zwa puta zwa vhudzulelwa kule nga muya, zwi sa tsha vha hone,

⁸ vhoṱhe vha no tshila nga u rea khovhe mulamboni wa Nile vha gomela, vha honḓa, vha fhelela, zwilazwulo zwavho na mambule zwa si tsha vha na mushumo.

⁹ Vhahoṱi vha muḓali vha ḓo ḓaḓa, vhaluki vha masila vha kulea nungo;

¹⁰ vhaluki vha masila vha ḓo ṱungufhala, vhashumi vha no hola vha hanganea.

¹¹ Vhahulwane vha muḓi wa Tsuani vha tou vha matsilu; vhaṱali vha vhaṱali vha no eletshedza Farao vha eletshedza zwa vhutsilu fhedzi. Ni vhudza Farao na ri, “Nṋe ndi muṅwe wa vhaṱali, ndi muḓuhulu wa mahosi a kale!” Hone ni nga amba hani nga u ralo?

¹² Iwe khosi ya Egipita, vhaḽa vhaeletshedzi vhau vha vhuṱali vha ngafhi? Khamusi vha nga u sumbedza, vha u vhudza zwe Muṋe washu Mulangazwoṱhe a dzudzanyela Egipita.

¹³ Vharangaphanḓa vha Tsuani vho tsilufhala; vhahulwane vha Nofo vho fhurea; vhone khokho dza lushaka, vho pambusa Vhaegipita nḓilani.

¹⁴ Muṋe washu o vha ṱanganya dziṱhoho, vha pepeleka unga tshidakwa, vha ḓaḓisa Egipita kha zwoṱhe zwine ḽa ita; ḽi pepeleka unga tshidakwa tshi tshi redzemuswa nga maṱanza atsho.

¹⁵ A hu na na muthihi Egipita ane a nga ḓitshidza – hu mupfumi, hu mushai, hu muḓivhalea, hu a no nyadzea.

Fulufhelo ḽa Vhaegipita

¹⁶ Musi wonoyo vhanna vha Egipita vha ḓo ofha unga vhasadzi; vha ḓo tetemela nga nyofho vha tshi vhona Muṋe washu Mulangazwoṱhe o angaladza tshanḓa a tshi ṱoḓa u vha rwa.

¹⁷ Shango ḽa Juda ḽi ḓo dzula ḽi tshi ofhisa Vhaegipita, vhoṱhe vhane vha pfa hu tshi ambiwa Juda, vha tshi humbudzwa zwo vha livhaho zwe vha dzudzanyelwa nga Muṋe washu Mulangazwoṱhe.

¹⁸ Misi yeneyo hu ḓo vha na miḓi miṱanu ya Egipita hune ha ambiwa Tshiheberu; vhathu vha henefho vha ḓo ana nga dzina ḽa Muṋe washu Mulangazwoṱhe; muṅwe wa miḓi yeneyo u ḓo pfi Muluvhaḓuvha.

¹⁹ Musi wonoyo hu ḓo vha na aḽiṱari ya Muṋe washu tshivhindini tsha shango ḽa Egipita, masakhani aḽo ha vha na phuphu ya tombo ya tshihumbudzo tsha uri Ene u hone henefho.

²⁰ Tshi ḓo vha tshone tshiga tshi no ṱanzilela Muṋe washu Mulangazwoṱhe shangoni ḽa Egipita, uri musi vha tshi kandeledzwa vha ḓo ri u ṱavhela Muṋe washu mukosi, Ene a ruma mutshidzi, a vha lamukisa a vha vhofholola.

²¹ Muṋe washu u ḓo ḓidzumbululela Vhaegipita; musi wonoyo ndi hone vha tshi ḓo ḓivha Muṋe washu vha mu luvha, vha mu ḓisela zwiṱhavhelo na nduvho, vha mu anela vha dovha vha ita zwe vha ana.

²² Muṋe washu u ḓo rwa Vhaegipita lu ṱungufhadzaho, a dovha a vha fhodza; vha ḓo rembulutshela khae, Ene a thetshelesa thabelo dzavho a vha fhodza.

²³ Musi wonoyo hu ḓo vha na gondo ḽi no bva Egipita ḽi tshi ya Ashuru; Vhaashuru na Vhaegipita vha ḓo dalelana, vha luvha Mudzimu vhe tshithu tshithihi,

²⁴ vha vhuraru vha vha Vhaisraele, tshakha dzoṱhe dza ḽifhasi dza wana mashudu nga Israele.

²⁵ Muṋe washu Mulangazwoṱhe u ḓo vha shudufhadza a ri, “Ndi a u shudufhadza iwe Egipita, vhathu vhanga, na iwe Ashuru, wone mushumo wa zwanḓa zwanga, na Israele, vhathu vhanga vhe nda vha nanga.”