YESAYA 18 - BIVHILI KHETHWA Mafhungo Madifha

Malaedzwa a no amba Kushu

¹ Shango ḽiḽa ḽo navhaho na milambo ya Kushu, milongani ya Nile, hu no pfala u ṅoṅa, ḽi ḓo zwi vhona.

² Shangoni ḽeneḽo hu bva vhaḓinḓa, vha ḓa vha tshi tala maḓini nga magungwa o fhaṱwaho nga ṱhanga. Inwi vhaḓinḓa vha luvhilo, humani, ni vhuelele ha lushaka lwa haṋu, lwa vhathu vhalapfu, vha lukanda lu penyaho, vha no ofhiwa nga ḽifhasi ḽoṱhe, lushaka lwa mukundulela lu no levha, lwa shango ḽo fhandekanywaho nga milambo.

³ Inwi noṱhe ni no dzula shangoni! Inwi vhathu vha ḽifhasi ḽoṱhe! Tshiga tsha nndwa tshi tshi imiswa dzithavhani, ni tshi sedze! Phalaphala i tshi lila ni thetshelese!

⁴ Muṋe washu o mmbudza a ri, “Ndi ḓo ri tshete, nda sokou sedza ndí vhudzuloni hanga, nda nga biso ḽo dzikaho ḓuvha ḽi tshi penya, nda nga khuli i tshi tiba ḓuvha ḽi tshi fhisa tshilimo.

⁵ Maswina a ḓo lozwa Vhakushu zwa nga lufhanga lu tshi tumula davhi ḽa munḓirivhe, maḓadzwane a khwathiwa maluvha ó no fhufhurea, nḓirivhe dzi tshi vho vhibva, dzi sa athu fulwa.

⁶ Zwitumbu zwavho zwi ḓo sala zwi tshi ḽiwa nga maanga a thavha na zwivhanda zwa ḓaka; zwi ḓo ḽiwa nga maanga tshilimo tshoṱhe, vhuriha hoṱhe zwa ḽiwa nga zwivhanda.”

⁷ Musi wonoyo Muṋe washu Mulangazwoṱhe u ḓo ṋekedzwa nduvho nga lushaka lwa vhathu vhalapfu, vha lukanda lu penyaho, na nga lushaka lwa kule lu no ofhisa u fhira na vhenevho, lushaka lwa mukundulela lu no levha, lwa shango ḽo fhandekanywaho nga milambo. Vha ḓo dzi ḓisa thavhani ya Tsioni hune Muṋe washu Mulangazwoṱhe a luvhiwa hone.