YESAYA 17 - BIVHILI KHETHWA Mafhungo Madifha

U lozwiwa ha Aramu na Israele

¹ Malaedzwa a no amba Damasko ngea: Damasko a u tsha ḓo vha muḓi, u ḓo sala u thulwi ya matumba.

² Miḓi ya Aruere a i tsha ḓo dzula vhathu, i ḓo sala i pfulo ya nngu na kholomo; a hu na ane a ḓo dzi khadela kule.

³ Kha ḽa Efraimi a hu tsha ḓo sala muḓi wo tingeledzwaho nga mutsheṱo; Damasko a u tsha ḓo vhusa; hu ḓo sala Vhaaramu vha si gathi, vha vho ḓo lingana na Vhaisraele. Ho amba Muṋe washu Mulangazwoṱhe.

⁴ Musi wonoyo vhugala ha vhaḓuhulu vha Jakopo vhu ḓo fhela; mapfura a muvhili a ḓo vha fhelela.

⁵ Zwi ḓo nga mukaṋi a tshi kaṋa, a tshi ṱhukhula ṱhotshe nga tshanḓa tshawe, zwa nga muthu a tshi ṱala ṱhalane govhani ḽo vhibvelaho ḽa Refaimi.

⁶ Hu ḓo sala hu tshi tshila vha si gathi; vha ḓo nga muolivi wo dzinginyiswaho, nyolivi dza wela fhasi, ha sala mbili kana tharu kha matavhi a nṱha-nṱha, na dziṅwe dzi si gathi kha matavhi a fhasi. Ho amba Muṋe washu Mudzimu wa Israele.

⁷ Musi wonoyo vhathu vha vho ḓo sedza Muvhumbi wavho; vha ḓo ṱalela Mukhethwa wa Israele.

⁸ A vha tsha ḓo fulufhela aḽiṱari dze vha vhumba nga zwanḓa zwavho, a vha tsha ḓo sedza mishumo ya zwanḓa zwavho – thanda dza mudzimutshisadzi Ashera na aḽiṱari dza u fhisela zwioro.

⁹ Musi wonoyo vhathu vha ḓo hwalwa miḓini yo dzivhelwaho, ya sala i matumba, zwa nga zwiḽa Vhaisraele vha tshi swika, vha wana dzithavhani ḽi ḓaka fhedzi; ḽi ḓo sala ḽi soga.

¹⁰ Vhaisraele, no hangwa Mudzimu Mutshidzi waṋu; a ni tsha humbula bako ḽine na khuda ngaḽo. Hufha ni tshi vho limela Adonisi ngade, na simela midzimu maḓadzwane.

¹¹ Naho ni tshi ri u zwi ṱavha zwa mbo ḓi simuwa, zwa fhufhumisa ḓuvha ḽeneḽo, ni ḓo kaṋa thulwi ya khombo, na ḓadza maḓulu nga maṱungu a sa lafhei.

Maanḓa a dzitshakha a si na mushumo

¹² Ipfani tshakha dzo halifha, dzo halifha unga lwanzhe lu tshi bvuma; ipfani vilinga ḽa dzitshakha, dzi unga sa magabelo a tshi kuḓana!

¹³ Naho tshakha dzi tshi unga sa magabelo a tshi kuḓana, Mudzimu a tou dzi kaidza dzi mbo ḓi humela murahu, dza pandamedzwa unga mathukhwi o hwalwaho nga muya dzithavhani, dza nga luguli lwo hwalwaho nga tshiḓumbumukwe.

¹⁴ Nga madekwana vha mbo ḓi welwa nga zwi ofhisaho, ḽi sa athu tsha vha wanala vha si tsheeho. Ndi wone mukovhe wa vhane vha ri ṱangula; ndi yone pfufho ya vhane vha ri kandekanya.