YESAYA 16 - BIVHILI KHETHWA Mafhungo Madifha

¹ Ṋemashango u dzula muḓini wa Tsioni; inwi ni re Sela, mu luvheni nga ngwana; rumani vhaḓinḓa vha dzi ḓise nga nḓila ya phangani.

² Vha mu vhudze vha ri, “Vhasadzi vha Muaba vha nga zwiṋoni zwo shushwaho tshiṱahani tshazwo, zwa fhufha, vha sokou tendeleka maḓambuwoni a mulambo wa Arinoni;

³ nga ri ṋewe nyeletshedzo, yone ambadzifhele! Ri dzitshavhi, nga ri dzumbwe hune muthu a nga si ri wane! Ri tsireledzwe unga muri une wa ḓisa murunzi u rotholelaho ḽi tshi fhisa masiari tshivhangalala; ro fhalala, ri songo kovhelwa maswina!

⁴ Tshavhi dza Muaba nga dzi litshwe dzi dzule shangoni ḽa thovhele, ri tsireledzwe, ri si lozwiwe!” Mukandeledzi zwi ḓo mu fhelela, ndozwo i ḓo fhela, mudzia-u-levha u ḓo pfuluwa shangoni.

⁵ Pfamoni ya Dafita hu ḓo imiswa khuluṋoni yo tewaho kha u fulufhedzea; ane a dzula khayo u ḓo fulufhedzea, a tshi haṱula ha nga ṱaluli, u ḓo mbo ḓi lwela zwi re zwone.

Jerusalema u nga si lamulele Muaba

⁶ Vhathu vha Juda vha ḓo ri, “Ro zwi pfa uri Vhamuaba vha a ḓihudza; ri a ḓivha uri vha a ḓiḓivha, vha a ḓikukumusa, vha na mukundulela, hone mazuwo avho ndi mahandana,

⁷ vha ḓo honḓa, vha ḓo tshema, vha ḓo lila vho kulea nungo, vha tshi elelwa madzanga e vha vha vha tshi a ḽa muḓini wa Kiri Hareshethe.

⁸ Masimu a Hesheboni o oma; minḓirivhe ya Sibima yo puta; mahosi a dzitshakha vho vunḓekanya minḓirivhe yavhuḓi ye ya vhuya ya adza ya guma Jaasere, ya swika phangani, maḓadzwane ayo a navha u swika lwanzheni.

⁹ Na nṋe ndi a lila unga vha Jaasere vha tshi lila, vha tshi lilela minḓirivhe ya Sibima. Hee Hesheboni! Hee Eliali! Ndi ni sheledza nga miṱodzi! Khaṋo ya mitshelo na nḓirivhe yo kaṱudzwa nga mukosi wa maswina.

¹⁰ Tshikovhani tsho vhibvelaho a hu tsha pembelwa; a hu na ane a fhululedza masimuni a minḓirivhe, a hu na a no ṱavha mukosi wa dakalo, a hu na a no suka nḓirivhe bonḓeloni a inga waini, mukosi wa dakalo wo fhela.

¹¹ Mbilu yanga i ṱungufhalela Muaba, luvalo lwa tetemela unga mbila dzi tshi ndiliii – ndi tshi humbula Kiri Hareshethe muṱoḓo wanga u a tumuwa.

¹² Vhamuaba vha tshi ḓidina nga u gonya mivhundu vha tshi yo ṋekedza zwiṱhavhelo vha tshi yo rabela thembeleni, ndi u sokou ḓinetisa.”

¹³ Ndi yone ndaedzo ye ya buliwa kale nga Muṋe washu a tshi amba Muaba.

¹⁴ Hone zwino Muṋe washu u ri, “Hu tshi tou fhela miṅwaha miraru, hu tshi vhaliwa miṅwedzi na maḓuvha, vhukumakuma lupfumo luhulu lwa Muaba lu ḓo vha lwo nyamalala; naho zwino ḽi na vhathu vhanzhi, hu ḓo tou sala vha si gathi; vha ḓo vha vha si tshee na nungo.”