YESAYA 15 - BIVHILI KHETHWA Mafhungo Madifha

U lozwiwa ha Muaba

¹ Malaedzwa a no amba Muaba ngeano: Muḓi wa Ara u re Muaba wo phusukanywa, wo lozwiwa nga vhusiku vhuthihi fhedzi! Muḓi wa Kiri u re Muaba wo phusukanywa, wo lozwiwa nga vhusiku vhuthihi fhedzi!

² Vhathu vha Diboni vha khou gonya thembeleni; vha raha mivhundu vha yo ṋekedza zwiṱhavhelo vha tshi lila; vhathu vha Muaba vha gonya Nebo vha honḓa, vha ima Medeba vha tshema. Vho palula ṱhoho, vho vheula ndebvu nga u pfa vhuṱungu.

³ Vhathu magondoni vho ambara madzanganda, vha honḓa vhe nṱha ha ṱhanga dza nnḓu, vha rothisa miṱodzi na mikotoni.

⁴ Vhathu vha Heshebono na Eliali vha ṱavha mukosi, tshililo tshavho tshi pfala u swika Jahatsi. Vhahali vha Muaba vha ṱavha mukosi nga nyofho, a vha tshee na nungo.

⁵ Mbilu yanga i lilela Muaba; ḽi nga kholomo ya miṅwaha miraru i sa tendi u hwala dzhogo, i vho shavha ya vhuya ya swika Tsuara; vha gonya mabama vho livha Luhithi, vha tshimbila vha tshi lila; vhaṅwe vha shavhela Horonaimi vha tshi tou gomela nga u vhona ndozwo.

⁶ Zwisima zwa Nimirimu zwo xa, hatsi ha puta, miri ya fa, a hu tshee na tshidala tsho salaho;

⁷ vhathu vha wela Govha ḽa Miṋengeledzi vha tshi linga u shavha na thundu dzavho dzo salaho;

⁸ hoṱhe-hoṱhe masakhani a Muaba hu pfala mukosi wa tshililo tshavho; u honḓa havho hu pfala u swika Egilaimi; tshigomelo tshavho tsha pfala na Bieri Elimu.

⁹ Ngei Dimoni mulambo wo tswuka nga malofha, fhedzi hu kha ḓi ḓo ḓa zwihulu; ee, vhoṱhe vho salaho Muaba vha ḓo vhulawa nga dzindau, ha pondwa vho salaho shangoni.